14-15 yanvar 2023-cü il tarixlərində Bakı Modern Təhsil Kompeksinin Beynəlxalq Məktəbində “Birləşmiş Millətlər Təşkilatı Modeli” (BMIS IMUN) adlı konfrans təşkil olunub.

Azərbaycan Respublikasının Dövlət Himninin səsləndirilməsindən sonra açılış mərasimi Bakı Modern Təhsil Kompleksinin idarəetmə heyəti iştirakçıları salamlayaraq tədbiri açıq elan edib. Konfransda Bakının müxtəlif özəl və dövlət məktəblərindən 130 şagird iştirak edib.

 

BMIS IMUN adlı konfrans açılış mərasimindən sonra Birləşmiş Millətlər Təşkilatının: 

İnsan Hüquqları üzrə Ali Komissarlığı (OHCHR),  

İqtisadi Sosial Şura (ECOSOC),  

Təhlükəsizlik Şurası (UNSC),  

Baş Assambleyası (UNGA) üzrə komitə sessiyalarında davam edib. 

 

Müvafiq sessiyalar üzrə “Rəqəmsal sferada insan hüquqları”, “Cənubi Amerikada davamlı inkişaf”, “Çin və Tayvan arasındakı gərginlik”, “İnkişaf etməkdə olan dövlətlərdə yoxsulluq səviyyəsinə töhfələr” adlı mövzularda BMT Modeli tətbiq olunub. İki gün davam edən konfransın ilk günündə komitə sessiyaları üzrə müzakirələr aparılmış və növbəti gündə nümayəndələr tərəfindən hazırlanmış nəticələr və həll yolları irəli sürülüb.  
BMT Modeli Birləşmiş Millətlər Təşkilatının Komitə nümayəndələrinin şagirdlər tərəfindən təmsil olunduğu konfransdır. Komitə sessiyalarında çıxış edən iştirakçılar təmsil etdikləri ölkələrin siyasətini araşdıraraq müvafiq mövqedən çıxış etmək üçün siyasi və diplomatik yanaşmalar hazırlayırlar. BMT Modelinin əsas məqsədi şagirdlərə ictimai danışıq, liderlik, debat, araşdırma və komandada işləmək bacarığını öyrətməkdir.