Tələbə Qəbulu üzrə Dövlət Komissiyası (TQDK) 2010/2011-ci tədris ilində dövləti xətti ilə Türkiyə Respublikasının universitetlərində təhsil almaq istəyən Azərbaycan gənclərndən sənəd qəbulunun vaxtını elan edib.
TQDK-nın mətbuat xidmətindən Modern.az-a bildirilib ki, 2010/2011-ci tədris ilində Türkiyə Dövləti xətti ilə Türkiyə Respublikasının universitetlərində təhsil almaq istəyən Azərbaycan gəncinin 1 yanvar 2010-cu il tarixinə yaşı 24-ə çatmamalıdır. Orta məktəbi bitirmiş fiziki və əqli cəhətdən sağlam Azərbaycan vətəndaşları ərizə verə bilərlər. Türkiyədə dövlət xətti ilə təhsil alaraq hər hansı səbəbdən təhsilini yarımçıq qoymuş və ya xaric olunmuş, ali məktəb tələbəsi və ya məzunu olan şəxslər ərizə verə bilməzlər.
Ərizələrin qəbulu 5 - 17 aprel 2010-cu il tarixlərində saat 10-dan 17-dək aşağıda göstərilən Sənəd Qəbulu Komissiyalarında aparılacaqdır:

1. BAKI Ş. AZƏRBAYCAN TEXNİKİ UNİVERSİTETİ
2. BAKI Ş. AZƏRBAYCAN MEMARLIQ VƏ İNŞAAT UNİVERSİTETİ
3. NAXÇIVAN Ş. TQDK-NIN NAXÇIVAN REGİONAL BÖLMƏSİ
4. GƏNCƏ Ş. TQDK-NIN GƏNCƏ REGİONAL BÖLMƏSİ
5. SUMQAYIT Ş. SUMQAYIT DÖVLƏT UNİVERSİTETİ
6. LƏNKƏRAN Ş. TQDK-NIN LƏNKƏRAN REGİONAL BÖLMƏSİ
7. ŞƏKİ Ş. TQDK-NIN ŞƏKİ REGİONAL BÖLMƏSİ
8. QUBA Ş. TQDK-NIN QUBA REGİONAL BÖLMƏSİ
9. ŞİRVAN Ş. ŞİRVAN ŞƏHƏR TƏHSİL ŞÖBƏSİ

İmtahanda iştirak etmək istəyənlər şəxsiyyət vəsiqəsini, orta məktəbi bitirdikləri haqqında attestatın əslini və yaxud hal-hazırda 11-ci sinifdə təhsil almaqları haqqında arayışı, 3 x 4 sm ölçüdə 2 ədəd fotoşəkli Sənəd Qəbulu Komissiyasına təqdim etməklə vahid ərizə formasını şəxsən doldurmalıdırlar.
Abituriyentlər ərizə vermək və imtahanda iştirak etmək üçün pul ödəmirlər.

İmtahana buraxılış vərəqələrini almaq üçün abituriyentlər 22-24 aprel 2010-cu il tarixlərində ərizə verdikləri Sənəd Qəbulu Komissiyalarına müraciət etməlidirlər. İmtahana buraxılış vərəqəsini almayan abituriyentlər imtahana buraxılmayacaqlar. İmtahan 2010-cu il aprel ayının 25-də test üsulu ilə keçiriləcək.
Abituriyentlər Türkiyə Respublikasının ali məktəblərinin ixtisasları haqqında məlumatı müvafiq Sənəd Qəbulu Komissiyalarından ala bilərlər. Abituriyentlər imtahanı Azərbaycan və ya rus dilində verə bilərlər.

Müsabiqə Türkiyə Respublikası Öyrənci Seçmə və Yerləşdirmə Mərkəzi tərəfindən aparılacaq. Abituriyentlərin səhvlərinə görə Öyrənci Seçmə və Yerləşdirmə Mərkəzi məsuliyyət daşımır. Müsabiqədən keçən abituriyentlər Türkiyə Respublikasında bir tədris ili müddətində «Türkcə Öyrətim Mərkəzləri»ndə türk dili hazırlıq kursunu keçəcəklər. Əlavə olaraq türk dilindən müvəffəqiyyətlə imtahan verib müsa¬biqədən keçən abituriyentlər hazırlıq kursunda təhsil almadan birinci kursa qəbul olunacaqlar.
Türkiyə Respublikasının ali məktəblərinə daxil olanlar 2010/2011-ci tədris ili üçün Azərbaycan Respublikasının ali məktəblərinə keçirilən qəbul imtahanlarının müsabiqəsində iştirak etmək hüququnu itirəcəklər.

Modern.az