Bu gün Azərbaycan Musiqi Mədəniyyəti Dövlət Muzeyi Üzeyir Musiqi Günü ilə əlaqədar Niyazinin Ev Muzeyinin 15 illiyinə və Zülfüqar Hacıbəyovun 125 illiyinə həsr olunmuş tədbir keçirilib.Tədbiri giriş sözüylə açan Azərbaycan Musiqi Mədəniyyəti Dövlət Muzeyinin direktoru Alla Bayramova ev muzeyi haqqında məlumat verib. Bəstəkarlar İttifaqının sədri Firəngiz Əlizadə Niyazinin Ev Muzeyinin əhəmiyyətindən danışaraq onun fəaliyyətini yüksək qiymətləndirib. Zülfüqar Hacıbəyovun yaradıcılığından söz açan bəstəkar onun əsərlərini musiqi sənəti üçün qiymətli xəzinə hesab edib: “Nə qədər ki, Azərbaycan musiqisi yaşayır Zülfüqar Hacıbəyov və Maestro Niyazi yaşayacaq”.
Millət vəkili Rafael Hüseynov Maestro Niyazi ilə bağlı xatirələrini danışaraq onu nadir sənətkar adlandırıb. “Tələbə vaxtı bu evə gəlib bəzən səhərə qədər Maestro ilə sənət söhbətləri edirdim. Bu evdə dünyanın ən böyük sənətkarları qonaq olub.Niyaz musiqiyə, sənətə qarşı çox tələbkar adam idi. Onun sənəti ölməzdir, musiqi xəzinəmizin ən qiymətli nümunələrindəndir.”
Tədbirdə həmçinin Heydər Əliyevin muzeyin açılışında iştirakını əks etdirən video sujet və 15 illik fəaliyyətinə həsr olunmuş slayd-şou nümayiş etdirilib.Yubiley mərasimində Azərbaycan Dövlət Opera və Balet teatrının solistlərinin ifasında Zülfüqar Hacıbəyov, Niyazinin əsərləri səslənib
Cavid Zeynallı