Prezident İlham Əliyev Luis Ayalooya “Eks-prezidentlər haqqında" qanunu gözləməyi məsləhət görüb

“Eks-prezident Ayaz Mütəllibovun Azərbaycana qayıtması ilə bağlı Azərbaycan Respublikasının dövlət başçısına etdiyi müracit cavabsız qalıb”.
Bu barədə Azərbaycan Sosial Demokrat Partiyasının həmsədri Araz Əlizadə Modern.az-a bildirib. Onun sözlərinə görə, iki il əvvəl Ayaz Mütəllibov müvafiq  müraciət göndərsə də, nəticəsi olmayıb.

“Odur ki, bizim mediaya bu mövzuda deyə biləcəyimiz hər hansı bir yeniliyimiz yoxdur”-deyə A.Əlizadə qeyd edib. ASDP həmsədri həmçinin bildirib ki, A.Mütəllibovun yenidən dövlət başçısına müraciət edib-etməyəcəyi özünün şəxsi qərarından asılı olan məsələdir.

ASDP həmsədri vurğulayıb ki, Sosialist İnternasionalının rəhbəri Luis Ayallo Bakıda olarkən prezident İlham Əliyevlə eks-prezident barədə müzakirə aparıb.

“Luis Ayalooya deyilib ki, yeni parlament seçkilərindən sonra Milli Məclis “Eks-prezidentlər haqqında” qanun qəbul edəcək və o zaman Ayaz Mütəllibovun taleyinə aydınlıq gətiriləcək”-deyə A.Əlizadə bildirib.

A.Əlizadə həmçinin bir sıra millət vəkillərinin Milli Məclisdə qəbul olunacağı gözlənilən “Eks-prezidentlər haqqında” qanunun A.Mütəllibova şamil edilməməsi barədə çağırışlarını pisləyib. Qeyd edək ki, deputat Fəzail Ağamalı bildirib ki, Ayaz Mütəllibov Azərbaycan SSRİ-nin prezidenti olduğundan ona bu qanun şamil edilə bilməz. Araz Əlizadənin sözlərinə görə, bu fikirlərin əsası yoxdur və A.Mütəllibov müstəqil Azərbayanın prezidenti vəzifəsində olub.

Modern.az