Əməkdar jurnalist

İllər ötür... Saçlara qar ələnir,
Ayım, ilim sevgin ilə bələnir,
Ömür bitir, son mənzilə dirənir,
Bəs bir ömür hardan hara qədərdir?
Mənim ömrüm  xatirələr qədərdir...

Yollar məni görən hara aparır?
Hər günümü kərpic-kərpic qoparır...
Sağa-sola baxırsan ki,
Hər yan solur-bozarır.
Bilən varmı bu yol hara qədərdir ?
Mənim ömrüm xatirələr qədərdir...

Hər aşiqin sevdiyi yar gözəldir.
Gözəllərin gözəli elə həmin gözəldir.
Qəlbimdə məhəbbətin alovlandı, közərdi,
Bilmirəm bu atəşin istisi nə qədərdir?
Mənim ömrüm xatirələr qədərdi...

Yaşadığım illərin mənə vurduğu zərbə
Bərabərdir gözəlin mənə verdiyi dərdə
Artıq vaxtı yetişib soruşuram bu yerdə
Bilirsən ki, bu dərdin ölçüsü nə qədərdir?
Mənim ömrüm xatirələr qədərdir...

Xatirələr yaşayır, demək məndə varam, var.
Xatirəsiz bir ömrün, görən nə mənası var?
Xatirədə yaşayır yaşananlar, olanlar
Bəs görən xatirənin ömrü hara qədərdir?
Mən deyirəm -
Xatirə elə ömür qədərdir...
Elə ömür qədərdir.