Modern.az

…Şəhidlik zirvəsində gül kimi bitdi Sənan! - FOTOLAR

…Şəhidlik zirvəsində gül kimi bitdi Sənan! - FOTOLAR

25 İyun 2016, 10:12

Milli Ordumuzun şəhid polkovnik-leytenantı Axundov Sənan Tahir oğlunun əziz xatirəsinə


Milli ordumuz böyük qürur və fəxarət duyduğumuz Aprel sınağından hünərlə çıxdı. Həmin o tarixi günlərdə hər bir Azərbaycan insanını «Bayrağım, haraya sancılmaq istərsən, söylə, səni oraya sancım» düşüncəsi sarmışdı. Aprel müharibəsi bütövlükdə Azərbaycan xalqının, Azərbaycan dövlətinin və milli ordumuzun iradəsini ortaya qoymuşdu. O tarixi günlərdə Vətən uğrunda şəhidlik zirvəsinə yüksələnlərdən biri də milli orumuzun polkovnik-leytenantı Axundov Sənan Tahir  oğlu oldu.

Ömürlüyündən: ... 29 sentyabr 1979-cu il tarixdə  Füzuli  rayonunda anadan olmuşdu. Bakı Ali Hərbi Məktəbini,Almaniya Hərbi Akademiyanı (alman dilində), BDU-nun  hüquq fakultəsini bitirmişdi. Müdafiə Nazirliyində sektor müdiri işləyirdi. Aprel hadisələrində təkidlə rəhbərliyə müraciət edərək doğulub boya-başa çatdığı  Füzuli bölgəsinə getmiş və Lələtəpədə vəzifə səlahiyyətlərini icra edərkən şəhid olmuşdu.

O, milli qəhrəmanlıq tariximizin simvolları olan Koroğlunun, Babəkin, Həzinin, Mehdinin, İsrafilin, Mübarizin hər kəsə örnək olan döyüş ruhunu, əzmini bir daha nümayiş etdirdi və şəhid adı, ünvanı ilə təsəlli verdi ki:

Əyləşdim şəhidlik taxtına, xalqım,
Elə bil gün doğdu baxtıma, xalqım.
Başını uca tut, könlünü dikəlt,
Az qalıb zalımın vaxtına, xalqım.

...Vətən ölməsin deyə ölümə getdi Sənan! Şəhidlik zirvəsində gül kimi bitdi Sənan!

Xalqımızın, milli ordumuzun iradəsinin, döyüş hazırlığının sınağa çəkildiyi Aprel savaşı günlərində ailənin tək oğul övladı, içində general olmaq arzusunu yaşayan  Sənan Axundov əyləşməyə şəhidlik taxtından uca bir yer görmədi.

Əgər bu dünyada ruhların qayıdıb başımız üzərində dolanması inamı həqiqətdisə, onda şəhid qardaşımız Sənanın da ruhu hər gün bizimlədi. Hər bir halıyla o ölməz ruh anası Roza xanıma təsəlli verir, atası Tahir müəllimə «möhkəm ol» deyir,

bacısı Mehriban xanıma, ömür-gün yoldaşı Nəcibə xanıma və gül balaları-Tahirlə Nəzrinə şərəf verir ki, vətən yolunda qurban getdi, təhlükə, qorxu önündə gözlərini belə qırpmadı.

Şəhidlik tarixi şans, əbədi dirilikdir…

Axundov Sənan Tahir oğlu bu şansı, xoşbəxtliyi qaçırmadı. Hər kəsə görk olsun deyə ən yüksək şanslarını əbədiyyət səlahiyyətinə güzəştə getdi. Xalqımız, azadlığımız, Vətənimiz, dövlətimiz yaşasın, ucalsın deyə!

Ruhu şad olsun!


Dayandur Sevgin

Salam, şəhidliyə ucalan igid,
Mübarək adına-sanına alqış.
Beş arşın kəfənə deyil, müqəddəs,
Bayrağa rəng verən qanına alqış.

 

Hər gələn axşamın öz xəbəri var,
Hər gələn səhərin öz aydınlığı.
Sən şəhid adının ucalığıyla,
Gətirdin yurduna göz aydınlığı.

 

Qovuşub o doğma, əziz torpağa,
Qanın çiçəklədi, qanın gül açdı.
Böyük Füzulinin nigaran ruhu,
«Şəhidim, xoş gəldin» deyib dil açdı.

 

Demərəm arzular qaldı yarımçıq,
Demərəm ulduztək söndü o gecə.
Bir evin yeganə oğluydun, indi,
Bir xalqın oğluna döndün o gecə.

 

Salam, şəhidliyə ucalan igid,
Mübarək adına, sanına qurban.
Nə ki, həyatım var, nəfəsim gəlir,
Mən qurban deyirəm şanına qurban.

Telegram
Hadisələri anında izləyin!
Keçid et
Ukraynadan hər kəsi şok edən xəbər: Azərbaycanlı jurnalist vəfat etdi