“Daçiya” klubu rəsmi saytındakı təxribat xarakterli yazıda düzəliş edib. Apasport.az xəbər verir ki, Kişinyov təmsilçisi baş verən anlaşılmazlığa görə üzr istəyib.

Belə ki, yazıda Mərdəkan qəsəbəsinin adının erməni əsilli olduğu, burda həmin xalqın heç bir nümayəndəsinin yaşamadığını vurğulansa da, bu səhv artıq aradan qaldırılıb. “Daçiya” rəsmiləri bunu Makrudyan deyil, Mərdəkan olduğunu qeyd ediblər.

Avropa Liqasının I təsnifat mərhələsində “Kəpəz”lə oyun üçün paytaxtımızda olan “Daçiya” rəsmi bəyanat yayaraq, klub prezidenti Adlan Şişxanov adından Gəncə təmsilçisindən və Azərbaycan xalqından üzr istəyib: “Dünən gecə “Dalğa Arena”da keçirilən məşqdən sonra yaranmış vəziyyətlə əlaqədar öz üzrxahlığımızı bildiririk. Gizli səbəbdən “Daçiya”nın rəsmi saytı oyunun erməni adına uyğun bir yerdə keçiriləcəyini bildirmişdi. Ancaq reportajda vurğulamışdıq ki, adda ermənilərə xas heç nə yoxdu. Klubumuzun rəhbərliyi və mətbuat xidməti qeyd edir ki, “Daçiya” heç vaxt təxribatda maraqlı olmayıb. Belə bir niyyətimiz yoxdu. Biz bunun üçün gəlməmişik. Onu da istisna etmirik ki, bizimlə bağlı düzgün informasiya yayılmayıb. Şübhəsiz ki, rəqibimizə və bütün Azərbaycan xalqına hörmətlə yanaşırıq. Bununla əlaqədar yaranmış xoşagəlməz insidentlə bağlı üzr istəməyi vacib sayırıq. Ümid edirik ki, bu hadisə bizim ənənəvi dostluq münasibətimizə xələl gətirməyəcək”.

Klubun prezidenti Adlan Şişxanov özü də birbaşa üzr istəyib: “Mətbuat xidmətinin buraxdığı səhvə görə, səmimi üzrxahlıq edirəm. Həm Azərbaycan xalqı, həm də “Kəpəz” azarkeşlərindən buna görə üzr istəyirəm. “Daçiya” heç vaxt siyasətlə məşğul olmayıb. Bu kobud səhvə görə bizi bağışlamağınızı xahiş edirik. Biz heç bir halda kiminsə hissi ilə oynamağı istəməmişik”.


Modern.az