NATO Təkmilləşdirilmiş Elmi Araşdırma Konfransının iştirakçıları ilə Azərbaycanın ABŞ-dakı Səfirliyində görüş keçirilib. Azərbaycanın ABŞ-dakı Səfirliyindən Modern.az saytına verilən məlumata görə, cari ilin iyulun 24-də özündə müxtəlif ölkələrin bir sıra nüfuzlu QHT-lərini birləşdirən “Minillik Layihəsi” və NATO tərəfindən birgə təşkil olunan NATO Təkmilləşdirilmiş Elmi Araşdırma Konfransının iştirakçılarının şərəfinə Azərbaycanın ABŞ-dakı Səfirliyində ziyafət verilib. Məlumat üçün bildirək ki, 3 gün davam edəcək bu Konfransa məhz Azərbaycanın sözügedən tədbiri ilə start verilib.
Qeyd edək ki, “Minillik Layihəsi”ndə iştirak edən QHT-lər əsasən tanınmış alimlər, analitiklər və ekspertlərdən ibarətdir və bir sıra nüfuzlu beynəlxalq təşkilatlarla birgə proqramlar həyata keçirir. Hazırkı Konfrans olduqca aktual olan “Potensial terrorçuların müəyyən olunması və onlara qarşı cavab tədbirlərinin görülməsi – Yaranmaqda olan texnologiyalar və terrorizmə qarşı yeni mübarizə strategiyaları” mövzusunda keçirilir.
Tədbir zamanı qonaqları salamlayan Azərbaycanın ABŞ-dakı Səfirliyinin müşaviri Məmməd Talıbov adıçəkilən konfransın əhəmiyyətini qeyd edərək, ölkəmizin terrorizmə qarşı mübarizədə verdiyi töhfə və bu sahədə Azərbaycanda atılan addımlardan danışıb. O, Azərbaycanın regionda daim inkişafın və qabaqcıl düşüncənin aparıcı qüvvəsi olduğunu bildirərək, ölkəmizdə 1918-ci ildə şərqdə ilk demokratik respublika qurulduğunu və dinindən, etnik kimliyindən və cinsindən asılı olmayaraq hər vətəndaşına bərabər hüquqlar verildiyini vurğulayıb. M.Talıbov müstəqillik illərində Azərbaycanın liderliyi ilə həyata keçirilən irimiqyaslı iqtisadi layihələr barədə danışmış və həmin layihələrin regiona yeni reallıqlar gətirdiyini qeyd edib. O, həmçinin, həyata keçirilmə ərəfəsində olan Cənub Qaz Dəhlizi layihəsi haqqında danışmış və layihə sayəsində Qafqaz regionunun Avropa ilə bilavasitə təmas yaradacağını bildirib. M.Talıbov eyni zamanda, Ermənistan-Azərbaycan, Dağlıq Qarabağ münaqişəsi barədə məlumat verərək, ölkəmizin 20% ərazisinin indiyədək Ermənistan tərəfinin işğalı altında olduğunu və bunun region üçün ən böyük təhlükə olaraq qalmaqda davam etdiyini vurğulayıb.
“Minillik Layihəsi”nin direktoru Jerom Qlen çıxış edərək, adıçəkilən layihə barədə ətraflı məlumat verdi. O, Azərbaycan tərəfinə tədbirə verilən diqqətə görə minnətdarlığını bildirib, 2013-cü ildə ölkəmizə səfəri və Azərbaycan Prezidenti İlham Əliyevlə görüşü xatırlayaraq, həmin səfər barədə xoş təəssüratlarını bölüşüb.
Konfransın İsraildən olan iştirakçısı Yair Şaran çıxış edərək, 3 il əvvəl ölkəmizə səfər etdiyini, Azərbaycanla İsrail arasında yaxın dostluq əlaqələrinin mövcud olduğunu bildirib və iyulun 24-dən 27-nə qədər davam edəcək NATO Təkmilləşdirilmiş Elmi Araşdırma Konfransının ilk gününün Azərbaycanın ABŞ-dakı Səfirliyində rəsmi qəbulla başlamasının sevindirici hal olduğunu qeyd edib.
Sonda “Minillik Layihəsi”nin fəal iştirakçılarından olan, Azərbaycan Futuroloq Cəmiyyətinin təsisçisi və rəhbəri Reyhan Hüseynova çıxış edərək rəhbərlik etdiyi QHT-nin fəaliyyəti, “Minillik Layihəsi” və həmçinin, bu çərçivədə görülən işlər, ölkə rəhbərliyinin bu sahəyə diqqəti barədə danışıb.
Qeyd edək ki, qonaqlar tədbir zamanı Azərbaycanla bağlı səslənən məlumatları böyük maraqla qarşılamış və ölkəmizin onlara göstərdiyi diqqətə görə minnətdarlıqlarını bildiriblər.
Xatırladaq ki, “Minillik Layihəsi”nin iştirakçıları "Azərbaycanın gələcəyi üçün növbəti böyük addımlar: Azərbaycanın neft sonrası iqtisadiyyatı" mövzusunda təşkil olunan Bakı Gələcək Forumuna qatılmaq üçün 2013-cü ildə ölkəmizə səfər ediblər.
Modern.az
