Azərbaycanın xalq şairi Fikrət Qoca ilə ABŞ-ın İndiana ştatında görüşdük. İyulun 21-dən ştatın baş şəhəri İndianapolisdə, qızı Günay xanımın evində qonaqdır. Dediyinə görə, sentyabrın 1-dək burada istirahət edəcək. Əhval-ruhiyyəsi çox gözəldir.

Xalq şairi ABŞ-da da yaradıcılığından qalmır. Ötən bir neçə gündə iki şeir də yazıb. Həmin şeirləri oxuculara təqdim edirik:

Pərviz əsgərə gedir

Əsgərlikdə olan, əsgərə gedən balalarımız üçün

- Qızım, rəfiqələrin
böyüyüb ərə gedir,
hərə bir yerə gedir.
- Ana, sevgisiz olmaz
mən Pərvizi sevirəm,
Pərviz əsgərə gedir.
- Pərviz yaxşı oğlandı,
Əsgər- kişi işidi.
Yolunu gözləyərsən,
qayıdanda görərsən,
ağıllı bir kişidi…
Biz də: Amin!- deyirik
Gözləyəyin Pərvizi!
Getsin ad-san qazansın
Məğrur eyləsin bizi.
Biz də toyuna gələk.
“Oğlan igid, qız mələk,
Ay qız, toyun mübarək!”-
Pərviz, toyun mübarək!
Təki sevənlər hamsı
Sizin kimi qovuşsun.
Evlərin bacasından
sehirli leylək uçsun.
Ömür nağıla dönsün,
Göydən üç alma düşsün...

27.07.2016

Qısqanc it və gözəl


Qonşuda bir gözəl var
Yanından keçilməyib.
Hələ onun əlindən
bir qab su içilməyib.
Qızılı saçlarına
hələ əl toxunmayıb.
Dodağının istəyi
gözlərlə oxunmayıb.
Nəhəng qısqanc iti var
baxarsan, göz bərəldər.
Hırıldasan? Mırıldar!
O itin qorxusundan
bu gözələ kim baxar?
Vaxt heç kəsi gözləmir,
vaxt gəlib keçəcəkdir.
Gözəllik bir çiçəkdir,
Onu da it qoruyur.
Ondan qız xoşallanır,
Amma qız da aldanır.
İt o qızı ən yaxşı
oğlanlardan qoruyur.
Bəlkə də baxt ulduzu,
gözəl yardan qoruyur.
Bir də baxıb görəcək,
evdə qalıb, qarıyır...

25.07.2016

Elman Eldaroğlu,
ABŞ, İndianapolis