“Həmsədrlərin Moskvada görüşməsi çox vacib və mühüm məsələdir. Bu görüşün çox böyük önəmi var”.
Bunu Modern.az-a açıqlamasında deputat Rövşən Rzayev ATƏT-in Minsk qrupunun həmsdərlərin Moskvada nəzərdə tutulan görüşünə münasibət bildirərkən deyib.
Deputatın sözlərinə görə Azərbaycan Qarabağa məsələsinin danışıqlar masası ətrafında həll olunmasının tərəfdarıdır.
“Azərbaycan ərazi bütövlüyünü sülh yolu ilə həll etməyə çalışır. Aprel hadisələrindən sonra dünya ictimaiyyəti, aparıcı və həmsədr dövlətlər, həm Azərbayan Silahlı Qüvvələrinin hazırlığını, həm də vətəndaşların bu istiqamətdə mövqeyi ilə daha yaxşı tanış oldu. Ona görə də istənilən görüşdən bir çox şeylər gözləyirik. Bugünkü siyasi ab-hava ondan ibarətdir ki, yaxın zamanlarda bu prosesin içində böyük bir dönüş olacaq. Buna tam olaraq əminəm”.
Rövşən Rzayev həmçinin, ATƏT-ə sədrlik edən Almaniyanın Dağlıq Qarabağ münaqişəsinin həllində xüsusi rolunu qeyd edib.
“Bu gün Almaniya dövləti həm dünyada, həm də Avropada çox böyük nüfuza malik olan dövlətdir. İnanıram ki, onların sədrlik etdiyi müddətdə hər hansısa yeniliyi əldə edə bilərik. Yaxın zamanlarda hər birimiz prezident İlham Əliyevin apardığı siyasət nəticəsində ciddi bir dəyişikliyə nail ola biləcəyik. Vacibdir ki, bu məsələ danışıqlar masası ətrafında həll edilsin.
Birmənalı olaraq bilirəm ki, Azərbaycanın ərazi bütövlüyü təmin olunacaq. Çünki siyasi proseslər də onu göstərir”.
Qeyd edək ki, Dağlıq Qarabağ münaqişəsinin nizamlanmasını üzərinə götürmüş ATƏT -in Minsk qrupu həmsədrləri növbəti məsləhətləşmələr keçirəcəklər.
Rusiya Xarici İşlər Nazirliyinin rəsmi nümayəndəsi Mariya Zaxarova məsləhətləşmələrin sentyabrın 8-də Moskvada keçiriləcəyini bildirib.
O bildirib ki, görüşdə Qarabağ problemi ilə bağlı aktual məsələlər müzakirə olunacaq:
“Mayın 16-da Vyanada və iyunun 20-də Sankt-Peterburqda keçirilən görüşlərdə əldə olunmuş razılaşmaların reallaşdırılmasının gedişatına xüsusi diqqət yetiriləcək”,-deyə o söyləyib.
Namidə BİNGÖL