Azərbaycanda müxalifət partiyaları liderlərinin cəbhə xəttinə getməmələri diqqət çəkir. Bəs bunun səbəbi nədir?
Hakim Yeni Azərbaycan Partiyasının (YAP) icra katibinin müavini, deputat Siyavuş Novruzov Modern.az-a açıqlamasında məsələyə aydınlıq gətirib. O bildirib ki, hərbi hissədə görüş keçirmək Müdafiə Nazirliyinin səlahiyyətinə daxil olan məsələdir.
“Əvvəla, hər hansı bir təşkilat belə bir görüş keçirmək, əsgərlərlə fikir mübadiləsi aparmaq istəyirsə Müdafiə Nazirliyinə müraciət etməlidir. Müdafiə Nazirliyi isə müəyyən olunmuş hansısa hərbi hissədə görüşün keçirilməsinə razılıq verə bilər.
Ümumilikdə götürdükdə isə Azərbaycan ordusu ilə istənilən QHT görüşlər keçirirlər. İstər Əfqanıstan müharibəsi veteranları olsun, istər Qarabağ müharibəsi veteranları, istərsə də şəhid ailələri olsun. Yeni Azərbaycan Partiyası bu cür görüşlər keçirib. Aprel hadisələrindən sonra partiyamız həmin rayonlara yollandı. O cümlədən xəstəxanada yatan əsgərlərimizə baş çəkdik”.
YAP funksionerinin sözlərinə görə Azərbaycanda fəaliyyət göstərən müxalifət partiyaları da belə görüşlər keçirə bilər.
“Sadəcə olaraq, hərbi hissələrə getməmək üçün bəhanələr gətirirlər. Əgər görüşürsənsə, hər hansı bir fikir mübadiləsi aparırsansa, sonradan gəlib bu barədə düşmən bölgələrinə yalan informasiya, məlumat ötürmək olmaz. Bu, çox ciddi məsələdir. Biz mütəmadi olaraq, belə halların da şahidi olmuşuq ki, olmayan hadisəni öz mətbuat orqanlarında, sosial şəbəkələrdə işıqlandırırlar”.
Namidə BİNGÖL