Norveçdə Azərbaycan Respublikası Prezidenti Yanında Gənclər Fondunun dəstəyi ilə Azərbaycanla bağlı fotosərgi keçirilib. Modern.az saytı xəbər verir ki, sərgi Oslo şəhərinin Saqene Könüllülər Mərkəzində və Norveç kraliçasının açılış etdiyi Früset kitabxanasında keçirilib. Azərbaycanın müstəqilliyinin 25-ci ildönümünə həsr edilən sərgidə ölkəmizin tarixinə, təbiətinə, mədəniyyətinə, gənclərinə və tolerantlığına həsr olunan fotolar təqdim olunub. Sərgidə Norveç Azərbaycanlıları Gənclər Təşkilatı və Oslo Azərbaycan Evinin dəstəyi ilə Azpress.AZ xəbər saytının foto-müxbiri Rüstəm İsmayılovun müəllifi olduğu fotolar nümayiş olunub.
Kitabxanada gerçəkləşən və 10-dan artıq ölkənin mədəniyyətinin təqdim olunduğu Sərhədsiz Mədəniyyət Festivalında Azərbaycana həsr edilən sərgidə Rüstəm İsmayılovun 25 əsəri tədbirin iştirakçılarına təqdim olunub. Azərbaycan guşəsi festival iştirakçıları tərəfindən maraqla qarşılanıb. Sərginin iştirakcıları tanınmış foto-müxbirin əsəlirində bir daha Azərbaycan tarixi, mədəniyyəti və tolerantlığın canlı təcəssümünün şahidi olublar. Fotolardakı rənglər harmoniyası, təbiətimizin füsunkar və ecazkarlığını iştirakçılara ustalıqla göstərib.
Foto-müxbir Rüstəm İsmayılovun sərgisi 23 təşkilatı özündə birləşdirən Saqenə Könüllülər mərkəzində oktyabrın 31-dək davam edəcək.
Modern.az