Milli Məclisdən Əmək və sosial siyasət komitəsinin sədri Hadi Rəcəbli Azərbaycanda ilk dəfə hazırlanmış “Tütün istehlakının məhdudlaşdırılması haqqında” yeni qanun layihəsi ilə bağlı Modern.az saytının suallarını cavablandırıb.


- Hadi müəllim, artıq bir neçə ildir Milli Məclisdə də ciddi müzakirələrə səbəb olan “Tütün istehlakının məhdudlaşdırılması haqqında” yeni qanun layihəsi hazırlanır. Necə düşünürsünüz, tütünün istifadəsinin məhdudlaşdırılması ilə bağlı bu qanun layihəsi effekt vercəkmi?

- Öncə bildirim ki, dünən BMT-nin təşəbbüsü ilə hər il qeyd olunan ümumdünya qənaət günü idi.

Əslində elə siqaret, tütünün istehlakının məhdudlaşdırılması haqqında olan bu yeni qanun layihəsi də qənaət sisteminin bir hissəsidir.

Ancaq burada iki formada qənaətə keçmək mümkün olur. Siqaret çəkərkən canını da, cibini də xərcləyirsən. Yəni siqaretdən imtina edib tərgitməklə həm cibə qənaət edirsən və həm də can sağlığını təmin etmiş olursan.

Yeni qanun layihəsində tütünün istehlakına qarşı mübarizə məqsədi ilə maarifləndirməyə geniş yer verilib.

İlk dəfə olaraq bu yeni qanunda yalnız siqarət yox bütün növ tütün məmulatlarının məhdudlaşdırılması məsələsi ortaya qoyulur.

Qəlyan, tənbəki, siqar və digər tütünün bütün növlərindən istifadəni məhdudlaşdırırıq.

-Bəs bütün növ tütün məhsullarının məhdudlaşdırılmasının yeri, miqyası necə olacaq?

-Üzərində çalışdığımız bu yeni qanun layihəsi ilə ilk dəfə olaraq tütün məhsullarından istifadənin yer, məkan olaraq məhdudlaşdırılmasının coğrafiyası genişlənir.

Məsələn, artıq yaşayış yerlərində, binalardakı bloklarda, dəmir yol vağzallarındakı perronlara qədər istifadə məhdudlaşacaq.

Bu gün siqaret çəkənlərlə yanaşı, daha çox ziyan ətrafdakılaraonun tüstüsündən əziyyət çəkənlərə dəyir.  

Bu yeni qanunla artıq tütün tüstüsünə məruz qalan vətəndaşların hüquqlarının qorunması da mümkün olacaq. Layihədə həmçinin siqaretin uşaqlara, yeniyetmələrə satılmaması məsələsi  ciddi əksini tapıb.

-Bəs yeni qanun layihəsi siqaret çəkən və bundan əziyyət çəkən vətəndaşlara nə verəcək?

-Qanun hazırlanarkən təbii ki, tütün, siqaret məhsullarından istifadəyə görə asılı vəziyyətə düşmüş, əziyyət çəkən vətəndaşların da hüquqları nəzərə alınıb.

Qanun layihəsində siqareti tərgitmək istəyənlər üçün xüsusi dövlət proqramı əsasında dövlət, bələdiyyə və özəl səhiyyə müəssisələrində pulsuz yardımın göstərilməsi nəzərdə tutulur.   Yəni bu qanunla siqareti tərgitmək istəyən hər bir vətəndaşı dövlət özü pulsuz müalicə edəcək. Siqaret çəkmiyənlərin də hüquqlarının qorunması bu qanunda nəzərə alınıb.

- Tütünün istehlakının məhdudlaşdırılması bu sahənin kənd təsərrüfatında istehsalına mənfi təsir göstərə bilərmi?

-Neçə illərdir ki, ölkədə tütün istehlakına, siqaretə qarşı mübarizə aparılır. Tütünü bu gün daha çox xaricdən alırıq. Əsas məqsədimiz xaricdən ölkəyə daxil olan tütünün həcminin azaldılmasıdır. Tütünün istehlakı Azərbaycanda azaldılmalıdır. Dünyanın o biri başından Azərbaycana tütün gətirilir. Kimə lazımdır axı bu ? !

Bunun onsuz da ziyanı xeyrindən çoxdur. Ölkənin həm də məqsədi tütün istehsalını artırıb xarici ölkələrə ixrac edib, idxalı maksimum azaltmaqdır.

İnşallah, hamılıqla çalışıb cavanların, gənclərin tütündən istifadəsinin qarşısını alacağıq.

 Ağa AKİFOĞLU