ABŞ-ın Federal Ehtiyatlar Sisteminin (FED) Açıq Bazar Əməliyyatları üzrə Komitəsi ötən axşam uçot dərəcəsini 0,5-0,75% artırıb. FED 2017-ci ildə uçot dərəcəsini daha üç dəfə artacağını bəyan edib. Bunun isə neftin ucuzlaşacağına, ABŞ dollarının bahalaşacağına gətirib çıxaracağı gözlənilir.

Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov Modern.az-a açıqlamasında bu qərarın yaxşı heç nə vəd etmədiyini deyib:

“Bu, bütün dünyaya, maliyyə bazarlarına, neftin qiymətinə, Azərbaycan manatına ciddi mesajdır. Ümumiyyətlə çoxdan uzadılan və gözlənilən qərar verildi. Müəyyən məsələlər baş verəcək. Uçot dərəcəsinin artırılması ilə avro ucuzlaşacaq, dollar isə əksinə bir az da möhkəmlənəcək. Bu qərarın bizə çox ciddi təsirləri olmasa da, təsirsiz də ötüşməyəcək”.

V.Əhmədov proseslərin  gedişində manatın daha da dəyərdən düşəcəyini açıqlayıb:

“Manat onsuz da ucuzlaşır. Mərkəzi Bankın apardığı siyasət nəticəsində yumşaq devalvasiya gedir. Proses, manat öz həqiqi bazar dəyərini alana qədər davam edəcək. Tələb və təklif, idxal və ixrac burada mühüm rol oynayacaq. İxracda və tədiyyə balansında müsbət saldo yaranacaqsa, onda manat da həmin vəziyyətə adekvat olacaq.

Fikir verirsinizsə, neftin qiyməti artıb-azalan kimi Rusiyada rubla, Qazaxıstanda tengeyə təsir edir. Bizdə isə Mərkəzi Bank tərəfindən tənzimlənən siyasət həyata keçirildiyindən hər hansı dəyişiklik baş vermir.

Mənim fikrimcə 2017-ci ildə manatın ucuzlaşması prosesi davam edəcək. Ola bilər ki, ilin sonlarına doğru manat öz həqiqi dəyərini alacaq”.

Manatın konkret hansı həddə qədər uclaşacağına gəlincə, deputat bildirib ki, bu, Azərbaycanın apardığı iqtisadi siyasətdən, islahatlardan, idxal-ixrac əmləliyyatlarından asılı olacaq”.

Gülşən RAUFQIZI