Modern.az

Okeanın o tayından verilən qərar Bakıda dollar qıtlığı yaradıb

Okeanın o tayından verilən qərar Bakıda dollar qıtlığı yaradıb

19 Dekabr 2016, 14:48

Azərbaycan Mərkəzi Bankı ABŞ-ın Federal Ehtiyatlar Sisteminin (FES) uçot dərəcəsini artırmasının valyuta bazarımıza təsir etməyəcəyini bildirsə də, okeanın o tayında qəbul edilən qərar yenidən Bakıda dollar qıtlığı yaradıb.

 

Modern.az xəbər verir ki, bunu iqtisadçı Vüqar Bayramov deyib.

O, hazırda “qara bazar”da dolların kifayət qədər bahalaşdığını vurğulayıb:

 

“Nəticədə, FES-ın qərarından öncə “qara bazar”da 1 dollar 1.83 manata satılırdısa artıq 1 ABŞ pulu üçün 1 manat 90 qəpik ödəmək lazımdır. Bu isə o deməkdir ki, FES-in qərarından sonra “qara bazar”da milli valyutamız hər 100 dollarda 7 manat ucuzlaşıb. Bankların böyük əksəriyyəti valyuta satışını dayandırdığı üçün aydındır ki, onların elan etdiyi kurs real məzənnə deyil və müqayisə predmeti ola bilməz”.

 

Ekspert deyib ki, “qara bazar”ın ləğvi banklarda dollar satışının tam və fasiləsiz bərpası nəticəsində baş verməlidir:

 

“Bu isə o deməkdir ki, FES qərarından sonra və xüsusən də son günlər valyuta bazarında dolların manata nisbətən bahalaşması fonunda Mərkəzi Bank banklarda dolların satışının bərpasına nail olmalıdır. Əks halda, dollar qıtlığı manata psixoloji təzyiqi daha da gücləndirəcək”.

 

ABŞ-ın Federal Ehtiyatlar Sistemi (FED) dekabrın 15-də uçot dərəcəsini 0,5-0,75% artırıb. Bir çox ekspertlərin proznozlarına görə, FED-in uçot dərəcəsini artırması neftin dünya bazarlarında qiymətlərinin aşağı düşəcəyinə səbəb olacaq.

 

 

Gülşən RAUFQIZI

Youtube
Kanalımıza abunə olmağı unutmayın!
Keçid et
Ukraynadan Rusiyaya ardıcıl zərbələr: Vəziyyət kritikdir