Azərbaycanda vergi amnistiyası elan oluna bilər. Bu haqda Modern.az-a danışan Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov bildirib ki, bu addım ölkə ərazisində orta və kiçik sahibkarlığın inkişafına böyük təkan verəcək:

“Vergi amnistiyası hazırda vergi ödəməkdə müəyyən çətinlikləri olan və onun silinməsilə şirkətlərə, sahibkarlara verilən şansdır. Vergi amnistiyası 2017-ci ilin yanvarın 1-dək vergi borcu olan hüquqi və fiziki şəxslərə şamil olunacaq.

Həmin dövrədək vergi borcu olan şəxslər 2017-ci ilin yanvar ayında borcunun 30%-ni ödəyərsə 70 faizi, fevral ayında 50%-ni ödəyərsə 50 faizi, mart ayında 70%-ni ödəyərsə 30 faizi silinəcək”.

V.Əhmədov bildirib ki, ödəniş nə qədər tez həyata keçirilərsə, sahibkar bir o qədər çox xeyir götürəcək:

“Bu, ümumiyyətlə, kiçik və orta sahibkarlığın inkişafı, iri şirkətlərin maliyyə vəziyyətinin sağlamlaşdırılması üçün əhəmiyyətli addım olacaq. Böyük həcmdə yığılan vergi borclarının azaldılması istiqamətində əhəmiyyətli rol oynayacaq”.

Gülşən RAUFQIZI