Goranboy rayonunun Qaraçinar, Yenikənd, Meşəli və bu ətrafdakı bir neçə kənd sakinlərinin qış günlərində üzləşdiyi problem barədə bir neçə dəfə məlumat vermişik. Bununla bağlı müxtəlif dövlət qurumlarının münasibətini də öyrənmişdik. Məsələ ondadır ki, adları çəkilən kəndlər dağlıq ərazidə yerləşdiyi üçün qış fəsli bu yaşayış məntəqələrində çox sərt keçir. Ona görə də insanlar qışda qızınmaq üçün oduncaqdan istifadə etmək məcburiyyətində qalırlar.
Bu kəndlərdə daha çox Kəlbəcərdən olan məcburi köçkünlər məskunlaşıb. Qəribəsi odur ki, illərdir ətraf kəndlərə gedən qaz xətti Qaraçınar kəndinin ərazisindən keçir, amma Qaraçinarın özünə qaz verilmir.
“Azəriqaz” İstehsalat Birliyinin (İB) mətbuat xidmətinin rəhbəri İbrahim Kərbalayev məsələ ilə bağlı Modern.az-a növbəti açıqlamasında şad xəbər verib.
Qurum rəsmisi bildirib ki, Goranboyun Qaraçinar və Qaramusalı kəndlərində daşıyıcı xətlərə qaz verilib, istismara qəbul edilib:
“2016-cı il dekabrın 29-da bu münasibətlə açılış olub”.
O qeyd edib ki, bir müddət sonra mənzillərə qazın verilişi təmin olunacaq:
“Mənzillərə texniki baxış keçirilib, müqavilələr bağlanıb. Qaraçinarda 552 abonentin mənzilinə birpilləli sistem əsasında 18 min 376 diametrli polietilen , ümumi uzunluğu 1446 metr müxtəlif metal borularla daşıyıcı və məhəllədaxili qaz xətləri çəkilib.
Qaramusalıda isə 224 abonent var. Onların mənzillərinə də bir pilləli sistem əsasında 2389 metr müxtəlif diametrli polietilen, 13 912 metr müxtəlif diametrli metal borularla daşıyıcı və məhəllədaxili qaz xətləri çəkilib.
Hazırda Goranboy rayonun Sarov, Yəhərçi, Yolpak, Qazaxlar, Goranlı və Səmədabad kəndlərində tikinti-quraşdırma işləri davam etdirilir. Yaxın günlərdə tikinti işləri başa çatmış kəndlərdə də təbii qazın verilişi həyata keçiriləcək”.
İ.Kərbalayevin sözlərinə görə, abonentlərlə müqavilə bağlandıqdan sonra mənzillərə qaz veriləcək:
“Qaz xətləri çəkilib, istismara qəbul olunub, daşıyıcı xətlərə qaz verilib, sayğaclar da quraşdırılıb. Hər bir mənzilə texniki baxış keçirildikdə sayğac möhürlənəcək, abonentlə müqavilə bağlandıqdan sonra təbii qazın verilişi təmin olunacaq”.
Gülşən RAUFQIZI
