Türkiyə xüsusi xidmət orqanları İstanbulun "Reina" klubunda Yeni il gecəsi qətliam törədən terrorçunu həbs edib.

Modern.az Türkiyə KİV-nə istinadən xəbər verir ki, terror aktının icraçısının şəxsiyyəti ilə bağlı bir çox maraqlı məqamlar üzə çıxıb.

Belə ki, həbs olunan Əbdülqadir Maşaripovun 1983-cü ildə Özbəkistanda anadan olduğu bildirilib.
İstanbul valisi Vasip Şahinin sözlərinə görə, Maşaripov rus dili daxil olmaqla, 4 əcnəbi doldə sərbəst danışır. Onun Əfqanıstanda xüsusi təlim keçdiyi və silahla mükəmməl davrandığı aydınlaşıb.

Maşaripov ilk ifadəsində İŞİD-ə qoşulduqdan sonra özünə Əbu Məhəmməd Xorasani adını götürdüyünü və 3 yaşlı oğlu ilə birlikdə 2016-cı ilin yanvarında qeyri-leqal yolla Türkiyəyə daxil olduğnu etiraf edib.

İstanbulun qərb səmtində yaxalanan Maşaripovun mənzilindən 2 ədəd tapança, döyüş sursatı və 197 min dollar pul tapılıb. Onun tez-tez mənzilləri dəyişdiyi üzə çıxıb.

İŞİD-çi iraqlı köməkçisi və Afrika ölkələrindən olan 3 qadınla birlikdə yaxalanıb.

Yanvarın 16-sı gecə keçirilən əməliyyat zamanı Maşaripov gizlənməyə çalışsa da, xüsusi təyinatlılar güc tətbiq edərək onu zərərsizləşdirib. Ümumilkdıə, onun tutulması üçün 2 min polis əməkdaşı səfərbər olunmuşdu.

"Reina" klubunda 31 dekabr gecəsi baş verən qətliam zamanı əksəriyyəti əcnəbi olmaqla, 39 nəfər həlak olmuşdu.

Vüqar İSMAYILOV