Azərbaycan tarixən ermənilərə verilmiş torpaqlar üzərində varislik hüququnu bərpa etməlidir. Bu təkliflə Milli Məclisin deputatı, Tarix İnstitutunun direktoru Yaqub Mahmudov parlamentin bu gün keçirilən iclasında çıxış edib. Deputat bildirib ki, İrəvan da daxil olmaqla, Azərbaycan Xalq Cümhuriyyəti dövründə ermənilərə verilmiş 9 min kv.km torpağın Azərbaycan xalqına qaytarılması barədə məsələ qaldırmalıyıq.


Tarixçi deputat Fəzail İbrahimli həmkarının təklifinə münasibət bildirib. Deputat Modern.az saytına açıqlamasında deyib ki, Y.Mahmudovun təklifini düzgün başa düşmək lazımdır.


“Burada “İrəvana hücum edirik, İrəvanı tutacağıq” kimi fikirlər səslənmir. Söhbət İrəvana hücumdan getmir. Sadəcə olaraq, tarixi bir andan– 1918-ci ilin 29 may tarixli Milli Şuranın qərarından söhbət gedir. Yaqub Mahmudov təklif edir ki, bu qərar ləğv olunsun”-deyə o bildirib.


F. İbrahimli qeyd edib ki, özü də vaxtı ilə belə təşəbbüslə çıxış edib.

“Amma bu, gündəmə gəlmədi. Cənab prezident də özü dəfələrlə bəyan edib ki, Azərbaycan ikinci erməni dövlətinin yaranmasına imkan verməyəcək. Bunların hamısının fonunda Milli Məclisin bir qərarı ola bilər. Milli Məclisin belə qərarı olarsa ki, Milli Şuranın filan tarixli qərarı ləğv olunsun, bu, dünyaya bir mesaj olar. Yəni, dünyaya mesaj verərik ki, bu torpaqların hamısı Azərbaycanın olub və bu ərazidə ikinci erməni yarana bilməz”.

Aqşin Kərimov