Fevralın 2-də Milli Məclisin qış sessiyası öz işinə başlayıb. Amma sessiyanın ilk iclasında xoşagəlməz mənzərə yaşanıb. Belə ki, iclasın ikinci hissəsində bəzi deputatlar zalda göz dəyməyib və məlum olub ki, onlar müxtəlif bahənalərlə parlament binasını tərk ediblər.
Bu isə, Milli Məclisin sədri Oqtay Əsədovu özündən çıxarıb. Günün ikinci yarısında bəzi deputatların iclasda olmamasına əsəbiləşən spiker bu mənzərəyə sərt şəkildə irad tutub:

“Kimi dindirirsən, deyir ki, görüşüm, işim var. İndi necə edək? Günün ikinci yarısında qeydiyyat aparaq ki, kim burdadır, kim yox? Xahiş edirəm, gəlin bir-birimizə hörmət edək. Səni bura kimsə zorla deputat seçməyib ki? Bizim işimiz Milli Məclisdədir axı!”.

Bəs Milli Məclisin İntizam Komissiyası bu faktı nəzərə alaraq, tədbir görəcəkmi?

Modern. az saytı məsələ ilə bağlı Milli Məclisin İntizam Komissiyasının sədri, deputat Ağacan Abiyevlə əlaqə saxlayıb. Komisiyanın sədri saytımıza açıqlamasında iclasa qatılmayan bəzi deputatlarla bağlı tədbir görüləcəyini istisna etməyib.

“Milli Məclisin sədri Oqtay Əsədovun bəzi deputatlar barədə çıxışından sonra yaxın vaxtlarda qərar veriləcək. O zaman bəzi deputatların nə üçün iclası buraxdığı müəyyənləşəcək. O cümlədən, bəzi deputatların plenar iclaslara qatılmaması barədə də araşdırma aparılacaq. Əgər üzrlü səbəblərdən bir neçə deputat plenar iclasa qatılmayıbsa, onlar nəzərə alınacaq. Yox əgər heç bir səbəb yoxdursa, həmin deputatla təkbətək söhbət aparılacaq. Bir daha belə halın təkrarlanmaması tövsiyə olunacaq”.

Namidə BİNGÖL