Bir neçə gündür sosial şəbəkələrdə müzakirə olunan “MTN agentləri” mövzusu hələ də gündəmdən düşməyib. Bu mövzunu gündəmə gətirən mühacirətdəki politoloq, vaxtilə MTN-də çalışmış Ərəstun Oruclu (hazırda ABŞ-da mühacirətdədir) öz bloqunda yazdığı silsilə yazılarda sabiq milli təhlükəsizlik naziri Eldar Mahmudovun MTN-dəki quldur dəstəsilə əməkdaşlıq etmiş agentlərə işarə edən məqamlar açıqlayıb. Artıq bəziləri həmin “MTN agentləri”inin kim olduğunu anlayıb, lakin heç kim konkret adlar çəkmək istəmir…
Elə jurnalistlər də adların Ərəstun Oruclunun özü təfəfindən açıqlanmasını istəyirlər.
Aqil Camal, “Türküstan” qəzetinin baş redaktoru:
“Ərəstun Oruclunun mediada keçmiş MTN agentlərinin olması ilə bağlı iddialarında yeni bir şey görmürəm. MTN ətrafında gedən gəlişmələrdə bu kimi faktlar üzə çıxdı və “mediaçı” adı altında keçmiş MTN rəhbərliyi ilə, onların sifarişi ilə çalışmış şəxslərin bir qismi də ifşa olundu. Burada bir məsələni aydınlaşdırmaq və ayırmaq lazımdır. Bir var, dövlətin təhlükəsizliyinə cavabdeh olan orqanın cəmiyyətin müxtəlif sahələrində adamlarının olması, bu normaldır. Bizdə istər sovet “KQB”si dövründə, istərsə müstəqillik dövründə bütün sahələrdə olduğu kimi, KİV-də təhlükəsizlik qurumuna bağlı adamlar olub, yəqin ki, indi də var və bütün dünyada belədir.
Bir də var, dövlət strukturunun verdiyi səlahiyyətlərdən istifadə edib, media içərisində özünə muzdlular saxlamaq, onları bu və ya digər şəkildə əməliyyat işinə cəlb etmək, kimlərinsə haqqında onlara ifşaedici məlumatlar ötürmək, onlardan təsir vasitəsi olaraq rupor kimi istifadə etmək.
Məlum MTN olaylarında bu kimi faktlarla cəmiyyət tanış oldu. Məsələyə bu kontekstdən yanaşlıdıqda, keçmiş MTN rəhbərliyinə bağlı şəxslər hazırda da mediada qalırsa, inanmıram ki, onlar yenə əvvəlki qaydada fəaliyyət göstərə bilsinlər. Çünki, "krışanı" da itiriblər, məlumat mənbələrini də. Üstəlik də, hazırda Dövlət Təhlükəsizlik Xidməti media adı ilə reketçiliklə məşğul olanlara qarşı ciddi tədbirlər görür. Əgər mediada yenə həmin adamlardan qalıbsa, onlar indi daha çox özlərini gizlətməklə məşğuldurlar”.
Məsələ ilə bağlı tez-tez-Facebook-da paylaşımlar edən müstəqil jurnalist Azər Rəşidoğlu:
“Ərəstun bəy və adlarını çəkə bilmədiyim sabiq DTK və MTN zabitləri ilə çoxsaylı müsahibələr və söhbətlərim olub. Çap etməyə kimsənin hünəri çatmadığı materiallar da olub. Ərəstun Oruclu iki nəfərin - bir kişi fahişə, bir qadın fahişənin - sözün bütün mənalarında- adını çəkib. Lakin yüzlərlə iri agentlər hələ də QHT, mətbuat, siyasi partiyalarda qalıb. Ehtimal edirəm ki, DTK-MTN çetesi Qərb tərəfindən çökdürülür və hakimiyyətin müəyyən qanadı bu işdə yardım edir. İnformasiyalarıma görə, konkret faktlar və sübutlar da sosial şəbəkələr vasitəsilə yayılacaq”.
Ərəstun Oruclu isə yazılarından sonra mövzuya belə münasibət bildirib: “Ortaya 2 eyham atmaq kifayət elədi ki, MTN-dən tutmuş CİA-yadək bütün agentura əhli qıcıqlansın... Mənim heç kəsi ifşa eləmək fikrim yoxdur, elə-belə sözgəlişi yazmışam”.
Qafar Ağayev
