Son 2 il ərzində qanunvericiliyə edilən müvafiq dəyişikliyə əsasən 10 mindən artıq dərman vasitələrinin qiymətləri təsdiq edilib.
Modern.az xəbər verir ki, bunu Tarif Şurasının katibi İlkin Məcidov dövlət qeydiyyatına alınmış dərman vasitələrinin qiymətlərinin tənzimlənməsinə dair mətbuat konfransında deyib. O bildirib ki, beynəlxalq təcrübədə dərmanların qiymətləri tənzimlənir.
“Dərman vasitələrini insanlar özləri almır, həkimlər tərəfindən yazıldıqda alınır və qiymətlər sərbəst buraxıldıqda qiymətlərin artırılması və bundan sui istifadə halları yaranır. Qiymətlərin tənzimlənməsi bahalaşmanın, sui-istifadə hallarının qarşısını almaq, şəffaflığın təmin edilməsi, insanların ən ucuz aptek axtarmaq problemlərini aradan qaldırmaq üçündür. Eyni zamanda əksər dərman vasitələri idxal olunduğu üçün aşağı qiymətlər kütləvi şəkildə pulun ölkədən çıxmasına da yardım edir.
Bu gün dərman vasitələrinin qiymətləri tənzimlənərkən 10 istinad ölkəsi nəzərə alınır. Orada istehsalçı qiymətləri bizim üçün bazis rolunu oynayır və Azərbaycan bazarında şərti satış qiyməti formalaşdırılır. Bunun üzərinə Nazirlər Kabinetində müəyyənləşən marjalar, ƏDV əlavə olunmaqla sabit qiymətlər müəyyənləşdirilir”.
İ.Məcidov qeyd edib ki, dərmanların tənzimlənməsi üçün istinad olan ölkələr Bolqarıstan, İspaniya, Fransa, Yunanıstan, İtaliya, Macarıstan, Polşa , Türkiyə Portuqaliya və Sloveniyadır.
“Dərmanların vahid dünya qiymətinin müəyyənləşdirilməsi hələ mümkün deyil. İlk vaxtlarda bizə çoxlu müraciətlər daxil , eyni zamanda sahibkarlar tərəfindən və qiymətlərin aşağı olmasından narazılıq edirdilər. Biz onlara bütün prosedurları göstərirdik.
Tənzimlənən qiymətlər dolların məzənnəsinin 1.71 manat olan səviyyəsində müəyyənləşib. Və sonuncu dəfə bu 28 noyabr tarixində olub. O dövrdən isə dollar 1.96 manata qədər qalxsa da, dərmaların tənzimlənən qiymətləri dəyişməyib. Tənzimlənən qiymətlər 5 faiz yüksək məbləğdə satıldıqda artıq bizə siqnallar daxil olur".
Gülşən RAUFQIZI
