“Bəri başdan deyim ki, 26 illik jurnalist fəaliyyətim dövründə dəfələrlə işsiz qalmışam, ən çox da işlədiyim media orqanının qapanması səbəbindən”.
Bunu Modern.az-a açıqlamasında tanınmış jurnalist Hikmət Sabiroğlu deyib.
Jurnalist bir müddət işsiz qalsa da, hazırda media sahəsində fəaliyyət göstərdiyini bildirib.
“2014-cü ilin son günü “Mediaforum” xəbər saytı fəaliyyətini dayandırmağa məcbur olandan sonra 6 ay işsiz qaldım. 2015-ci ilin iyul ayından 2016-cı ilin sentyabr ayına kimi Transparency.az/cnews səhifəsinin redaktoru oldum. Bu səhifə “Şəffaflıq Azərbaycan” İctimai Birliyinin layihəsi idi, sosial-iqtisadi xarakter daşıyırdı.
Ötən ilin sentyabr ayından Novator.az saytında çalışıram. Baş redaktor müavini olduğum bu saytda iş ictimai əsaslar üzərində qurulub”.
Qeyd edək ki, Hikmət Sabiroğlu 1966-cı ildə Şuşada doğulub. 1991-ci ildə Bakı Dövlət Universitetinin Jurnalistika fakültəsini bitirən Hikmət Sabiroğlu “Azadlıq” qəzetində (müxbir, şöbə müdiri, redaktor müavini), “Press-Fakt” qəzetində (müxbir), “Avropa” qəzetində (baş redaktor müavini), “III Sektor” jurnalında (redaktor), Mediaforum.az xəbər saytında (baş redaktor müavini) çalışıb.
Namidə Bingöl
