Dünyanın tanınmış elmi-analitik informasiya təminatçısı olan "Thomson Reuters" in departament direktoru Oleq Utkin və şöbə müdiri Valentin Boqorov UNEC-in rektoru, professor Ədalət Muradovla görüşüb. "Thomson Reuters" lə universitet arasında gələcək əməkdaşlığın 3 istiqaməti - Beynəlxalq konfransın təşkili, Elmmetrik laboratoriyanın qurulması və Gənc Alimlər Məktəbinin yaradılması görüşün əsas müzakirə mövzusu olub.
Bildirilib ki, UNEC və "Thomson Reuters " in birgə təşkilatçılığı ilə may ayında keçiriləcək "Müasir universitetlərdə elmi fəaliyyətin idarə olunması modeli: innovativ inkişaf çağırışlar və perspektivlər" mövzusunda beynəlxalq konfrans dünyanın nüfuzlu universitetlərinin alimlərini UNEC-də bir araya gətirəcək. Tədbir eyni zamanda ölkədə "Web of Science " platformasına çıxış əldə etməyə dəstək olacaq. Bu isə elmi-tədqiqat işlərinin dünyanın elmi ictimaiyyəti arasında tanıdılmasında mühüm rol oynayacaq. Qeyd edək ki, nüfuzlu dünya universitetlərinin alimlərinin elmi məqalələrinin konfransa təqdim edilməsilə bağlı çoxsaylı müraciətlər daxil olub.
Görüşdə UNEC-in bazasında yaradılacaq Gənc Alimlər Məktəbi geniş müzakirə edilib. O.Utkin bildirib ki, dünya səviyyəli universitet olmaqda iddialı olan UNEC-də bu məktəbin təsis edilməsi gənc alimlərə müasir tələblərə cavab verən elmi nəşrlərin və məqalələrin hazırlanmasına, elmi araşdırmaların keyfiyyətinin artırılmasına xidmət edəcək.
UNEC-də həm Azərbaycanın, həm də regionun digər ölkələrinin maraqlarına cavab verəcək Elmmetrik laboratoriyanın açılması, "Xəzəryanı ölkələrin iqtisadiyyatı" adlı elmi jurnalın nəşri ətrafında da fikir mübadiləsi aparılıb.
Modern.az