Bu il Novruz bayramı ilə əlaqədar turist axınının daha çox olacağı deyilirdi. Xüsusilə, İrandan, ərəb ölkələrindən və Rusiyadan Azərbaycana axın edən turistlərin sayının çox olacağı bildirilirdi. Təbii ki, deyildiyi kimi də oldu.
İstər paytaxtda, istərsə də regionlarda turistlərə hər addımbaşı rast gəlmək mümkündür. Digər tərəfdən isə bu il bayram günlərində günəşli havanın yerini qarşı-şaxtalı hava şəraiti əvəz etməkdədir. Belə hava şəraiti turistlərn əhvalına necə təsir edib?
Turistlərin sayının çox olması otellərdə yer problemi yaratmayıb ki?
Azərbaycan Turizm Assosiasiyası (AzTA) sədrinin müşaviri Müzəffər Ağakərimov Modern.az-a açıqlamasında bir çox suallara aydınlıq gətirib.
“İslam Oyunları ərəfəsində turist axını güclənəcək”
“Artıq neçə illərdir ki, turistlər xüsusilə Novruz bayramında Bakıya axın edir. Onların sayı ildən-ilə artır. Turist qəbul edən Azərbaycan artıq bu sahədə böyük təcrübə toplayıb. Ona görə də əcnəbi turistlərin istək və arzularını həyata keçirmək üçün çox işlər görürlər. İranlı turistlərin sayı ildən-ilə daha çox artır. Novruz bayramı Azərbaycanda rəngarəng və maraqlı keçdiyindən turistlər əyləncəli istirahətlərini burada keçirməyə üstünlük verirlər.
Bildiyiniz kimi, bu il Bakıda İslam Həmrəyliyi Oyunları keçiriləcək. Hətta, İslam Oyunları ərəfəsində müsəlman ölkələrindən gələn turistlərin sayı daha da çox olacaq. Turizmin inkişafında sabitlik və qonaqpərvərlik böyük rol oynayır. Məhz bu amillər Azərbaycanda var. Azərbaycan turizmin inkişafı üçün əlverişlidir”.
“Otellərin sayı artırılmalıdır”
Turizm Assosiasiyası sədrinin müşaviri deyir ki, bu il iranlı tuirstlərin çoxu evlərdə qalmalı olub.
“Azərbaycanda turizmin inkişafı ilə əlaqədar otellərin sayı da artırılmalıdır. Xüsusilə, bir və ikiulduzlu otellərin, hostellərin inkişafına üstünlük verilməlidir. Turizm inkişaf edirsə, otellərin sayı çox olmalıdır. Bu il apardığımız müşahidələr göstərir ki, İrandan gələn turistlərin bir çoxu evlərdə qalmalı olub. Bu da otellərin az olmasına dəlalət edir. Məhz Bakıda və regionlarda otellərin sayı artırılmalıdır. Otellərin sayının çox olması həm təhlükəsizlik məsələlərinə görə, həm də dövlətə vergi vermək baxımından vacibdir. Turistlərin otellərdə qalması, evlərdə qalmaqdan daha münasibdir. Çünki evlərdə xidmət yüksək səviyyədə həyata keçirilmir. Həmçinin, regionlarımızda infrastruktur yüksək səviyyədədir. Turistlər Qəbələ, Şamaxı, Quba, Qusar zonalarına üz tutublar”.
“Turistlərin çoxu hələ də Bakıdadır”
Bu ilki Novruz bayramında hava şəraitinin qarlı-şaxtalı keçməsinə gəlincə, Müzəffər Ağakərimov bildirib ki, bu, turistlərin əyləncəsinə təsir etməyib.
“Mart ayı 12 ay içində qeyri-sabit keçən aydır. Bəzən deyirlər ki, “mart çıxdı dərd çıxdı”. Ona görə də mart ayında belə hava şəraiti gözləniləndir. Bu baxımdan da bayram günlərində havaların bu cür keçməsi turistlərin əhvalına pis təsir göstərməyib. Turistlərin çoxu hələ də Bakıdadır”.
“Otellərdə boş yer yoxdur”
Müzəffər Ağakərimov bildirib ki, turistlərlə bağlı qanun pozuntusuna rast gəlinməyib.
“İldən-lə turistlərin sayı çoxaldığından turizm şirkətləri böyük təcrübəyə malikdirlər. Ona görə də turistlərin istək və arzularını həyata keçirmək üçün pul xırdalanmasında, taksi xidmətlərinin göstərilməsində heç bir narahatlıq yoxdur. Bütün işlər yüksək səviyyədə aparılır. Dediyim kimi, turistləri qəbul etmək üçün qurumlar, restoranlar, otellər, nəqliyyat, ekskursiyalar öz fəaliyyətini yüksək səviyyədə həyata keçirir. Həmçinin, bu il turistlərin sayı keçən ilkindən daha çoxdur. Çünki keçən il otellərdə boş yerlər var idi. Bu il isə otellərdə bir dənə də olsun boş yer yoxdur”.
Namidə BİNGÖL
