Zoologiya İnstitutu fəaliyyəti dayandırılmış ANS teleşirkətinə əmlakının hazırda yerləşdiyi binadan çıxarılması üçün martın 23-dək vaxt versə də, şirkət hələ də ərazidədir. 

Zoologiya İnstitutunun direktoru Elman Yusifov Modern.az-a açıqlamasında məsələ ilə bağlı danışıb. O, bildirib ki, ANS rəhbərliyi ilə əlaqə saxlamaq mümkün deyil.

“Neçə vaxtdır ki, ANS rəhbərliyini tapa bilmirik. Sonuncu dəfə ANS rəhbərliyi demişdi ki, martın 23-ü Zoologiya İnstitutunu boşaldacaq. Amma  onlar hələ də bizim ərazidədirlər. Heç bir boşaldılma işləri aparılmayıb. Rəhbərliyi də tapa bilmirik ki, dərdimizi deyək. Bilək ki, çıxırlar, yoxsa, qalırlar. Əslində, martın 23-də şirkətin ərazimizi tərk etməsini ANS rəhbərliyi bəyan etmişdi. Biz də dedik ki, 23-ü deyirlərsə, olsun 23-ü. Bu gün isə martın 29-dur. Biz isə ANS rəhbərliyini tapa bilmirik. Nədənsə qaranlıq qalan məsələ uzanır. Görək nə olur. Təəssüf ki, telefonlarımıza cavab da vermirlər”.

Xatırladaq ki, 18 iyul 2016-cı il tarixdən saat 18:30-dan etibarən Milli Televiziya və Radio Şurasının qəbul etdiyi qərara əsasən "ANS Müstəqil Yayım və Media" Şirkətinin, həmçinin, telekanalla birlikdə "ANS ÇM" radiosunun fəaliyyəti dayandırılıb. Buna səbəb ANS-in ABŞ-dakı əməkdaşının Türkiyədə hakimiyyət çevrilişinə rəhbərlik etməkdə şübhəli bilinən Fətulla Güləndən müsahibə alaraq, həmin müsahibəni yerli və xarici KİV-lər vasitəsilə anons etdirməsi olub.

Namidə BİNGÖL