Modern.az

Keçmiş deputatlar nə işlə məşğuldurlar…

Keçmiş deputatlar nə işlə məşğuldurlar…

30 Mart 2017, 11:07

2010-2015-ci illərdə fəaliyyət göstərmiş 4-cü çağırış Milli Məclisin deputatları, indinin eks-millət vəkilləri hazırda nə işlə məşğuldurlar?

Modern.az saytı bəzi keçmiş deputatlarla əlaqə saxlayıb.

Ceyhun Osmanlı hazırda biznes konsultant olaraq çalışır: “Bu, beynəlxalq əhəmiyyətli iqtisadi layihə dünyanın bir sıra ölkələrində həyata keçirilir. Mən iqtisadiyyat üzrə fəlsəfə doktoruyam. Bu sahə həmişə mənim üçün vacibdir. Həm peşəm olaraq, həm də gündəlik fəaliyyət olaraq mənim üçün çox önəmlidir. Həmçinin iqtisadiyyatla bağlı akademik çevrələrdə görüşlərimi, müzakirələrimi və fəaliyyətimi davam etdirirəm. Akademik fəaliyyət, elmi ictimaiyyət mənim həyatımın ayrılmaz bir hissəsidir”.


İlyas İsmayılov
isə partiya işləri ilə məşğul olduğunu deyib: “Bildiyiniz kimi mən Ədalət Partiyasının sədriyəm. Fəaliyyətimi də bu istiqamətdə qururam”.

Gülər Əhmədova deyib ki, son vaxtlar səhhətində problemlər var və onların aradan qalxmasına çalışır: “Bu dəqiqə mənim üçün ən vacib məsələ səhhətimlə əlaqədardır. Ümumiyyətlə isə kitab üzərində işləyirəm. Daha çox elmlə və psixologiya ilə məşğulam. Başqa təkliflər də var ki, onları dəyərləndirirəm. İctimai təşkilatlardan təkliflər almışam və onları dəyərləndirməyə çalışıram. Amma hazırda sağlamlığımla bağlı problemlərin həlli ən önəmli məsələdir”.


Qalib Salahzadə
deyib ki, hazırda bizneslə məşğul olur: “Mən əvvəl də bizneslə məşğul olurdum. İndi də məşğulam. Bakıda yaşayıram. Hər şey qaydasında gedir”.

 

Aydın Abbasov deyib ki, hazırda vaxtını övladına həsr  etməyə çalışır: “Nə işlə məşğul olduğum barədə isə heç nə demək istəmirəm”.


Ərəstun Cavadov isə heç bir işlə məşğul olmadığını bildirib: “Mən indi pensiyaya çıxmışam. Bakı şəhərində də yaşayıram”.

 

Elton Məmmədov deyib ki, elmi-pedaqoji fəaliyyətlə məşğuldur: “Mən deputat olanda da bu işlə məşğul olurdum. Hazırda Azərbaycan Texniki Universitetində işləyirəm. Bakı şəhərinin sakini kimi burada da yaşayıram”.

Etibar Hüseynov bildirib ki, hal hazırda işsizdir: "Qeyri-rəsmi olaraq sayt ve televiziyalarla əməkdaşlıq edirəm. Çoxdan bəri yarımçıq qalmış bir melodramanın ssenarisini yazıram. Qismət olsa gələcəkdə 3 seriyalı film çəkəcəm".


Mirmahmud KAZIMOĞLU

Twitter
Sizə yeni tvit var
Keçid et
Rusiyada ağır döyüşlər: Ukrayna partizanları əraziləri bombalayır