Modern.az

Trampın Avropa Birliyini zəiflətmək PLANLARI - Britaniyadan sonra hədəfdə haradır?

Trampın Avropa Birliyini zəiflətmək PLANLARI - Britaniyadan sonra hədəfdə haradır?

20 Aprel 2017, 15:05

Bu il 60 illiyin qeyd edən Avropa Birliyi dərin böhran içindədir. Brüsselin yürütdüyü siyasi və iqtisadi siyasətdən narazı qalan bir çox ölkələr onun hüquq nəzarətindən azad olmağı və avrodan imtina edərək, milli valyutalarına qayıtmağı düşünürlər.

 

2017-ci il bu mənada Avropa Birliyi üçün önəmli sınaq ili olacaq. Aprelin 23-də Fransada prezident seçkiləri, iyunun 8-də Böyük Britaniyada növbədənkənar parlament seçkiləri və sentyabrda Almaniyada bundestaqa seçkilərin nəticələri Avropa Birliyinin mövcudluğu baxımından həlledici rol oynaya bilər. Bu fonda ABŞ prezidenti Donald Trampın Avropa Birliyini zəiflətmək cəhdi heç kimin gözündən qaçmır. Tereza Meylə görüş zamanı britaniyalıları Brexit-ə görə alqışlayan Tramp vahid və güclü Avropanın yaranmasında maraqlı deyil. Tərəflərin azad ticarət zonası barədə müqaviləni bu günə qədər imzalaya bilməməsi də bununla bağlıdır.

 

Fransada Trampın müttəfiqi rolunda “Milli Cəbhə” partiyasının ultrasağçı namizədi Marin Le Pen çıxış edir. Siyasətçi qadın prezident seçilərsə, Fransanın avrodan imtina edəcəyini və Avropa Birliyindən çıxacağını elan edib. Eyni zamanda, hərbi xərclərin 2 dəfə artırılmasını söz verən Le Penin bu qədər vəsaiti hansı yollarla qazanacağı açıqlanmır.

 

Avropanın nəticələrini dörd gözlə izlədiyi başqa bir seçkidə isə kansler Angela Merkel öz postunu saxlamaq uğrunda mübarizə aparacaq. Martin Şultsla üz-üzə gələcək Merkel almaniyalı seçicilərə Avropa Birliyində qalmağın müsbət tərəflərini göstərməlidir. Sıravi vətəndaşlar ölkələrinin hər il Brüsselə milyardlarla dollar vəsait köçürməsini anlaya bilmir. Digər problem isə  hər il qəbul edilən milyonlarla miqrantla bağlıdır. Almaniya hökuməti onların inteqrasiyası üçün optimal proqramlar təklif etməlidir.

 

Fransa və Almaniyadakı seçkilər Avropa cəmiyyətinin əhval-ruhiyyəsini və Brüsselin gələcək inkişaf yolunu göstərməlidir. Britaniyadakı seçkilər isə baş nazir Tereza Mey tərəfindən özünə parlamentdə daha çox yer qazanmaq və Brüsellə “boşanma”nın şərtlərini daha inamlı şəkildə müzakirə etməyə imkan verməlidir. Meyin inamlı qələbəsi Avropa Birliyinə əlavə problemlər yaradacaq.

 

Berlin və Paris Avropanı öz ətrafında daha sıx birləşdirmək üçün yeni strategiya hazırlamağa və qurumun əhatə etdiyi ölkələrin mərkəzdənqaçma meyllərinin qarşısını almaqda səylərini birləşdirməlidir.

 

Bu, Tramp administrasiyasının planlarına da mane ola bilər. Zəif və ABŞ-ın siyasi təsiri altında olan Brüssel ABŞ-a öz siyasətini yürütmək üçün daha sərfedici variantdır. Lakin Trampın Avropa Birliyi planları Fransa və Almaniya seçkilərdə çıxan nəticələrdən asılı olaraq dəyişəcək.

 

Vüqar İSMAYILOV

Twitter
Sizə yeni tvit var
Keçid et
Ukraynadan Rusiyaya ardıcıl zərbələr: Vəziyyət kritikdir