Modern.az saytı “Bir şəklin tarixçəsi” rubrikasında növbəti fotonu təqdim edir.
Fotoşəkil bu günlə - 28 may tarixi ilə bağlıdır. O tarix ki, 99 il öncə bütün həyatını Azərbaycanın istiqlalı uğrunda mübarizəyə həsr edən, hətta bu yolda ailəsini, canından çox sevdiyi övladlarını da qurban verən nəhəng insanlar tərəfindən yazılıb – onların yoxdan yaratdığı bir dövlət - Azərbaycan Xalq Cümhuriyyəti qurulub.
Zaman 1918-ci ilin iyunu… Məkan Türkiyə - İstanbul şəhəri. Bu, Türkiyə-Azərbaycan dostluğunun fotosu - simvoludur.
Bu nadir fotoşəkil Azərbaycan Xalq Cümhuriyyəti ilə bağlı araşdırmalar aparan gənc tədqiqatçı Dilqəm Əhmədin kolleksiyasındandır…
Azərbaycan Heyəti - mürəxxəsəsi İstanbulda Osmanlı nümayəndələri ilə birgə lentə alınıb.
Soldan sağa. Ön cərgə: polkovnik Əbdülhəmid Qaytabaşı, Məhəmməd Əmin Rəsulzadə (Azərbaycan Heyəti-mürəxxəsəsi rəisi), Osmanlı səfiri Muxtar bəy (Heyətin mehmandarı), Xəlil bəy Xasməhəmmədov (mürəxxəs), Aslan bəy Səfikürdski (mürəxxəs).
Arxa cərgə: Miryusif Mirbabayev (müşavir), (?), Əhmədcövdət Pepinov (müşavir) və Osmanlı təmsilçiləri.
Tədqiatçı Dilqəm Əhməd şəkillə bağlı şərhində qeyd edir:
“Rəsulzadə Osmanlı sultanı ilə görüşü barədə Bakıya raportunda sultanın nümayəndə heyətinə belə dediyini yazır:
"Əsarətdən xilas olmuş bu yeni türk və müsəlman hökumətinin təmini-hürriyyət və istiqlalı hökumətimin ən müqəddəs vəzifəsini təşkil edər. Azərbaycanın kəsbi-həyat və qüvvət edərək bərabərlikdə ümumi düşmənlərimizə qalib gələcəyimizi ümid elərəm. Salamımın azərbaycanlı qardaşlarımıza təbliğini arzu edərəm".
Sultan sözündə durdu, Ənvər Paşanın planı ilə Bakı işğaldan azad edildi...”.
A.Qorxmaz