20 yanvar 2019, Bazar
Ana Səhifə - REPORTAJ - Atalar və övladlar: Söhrab Tahirin niskil dolu həyatı… “Atam anasıyla düz 25 il sonra görüşdü”
Atalar və övladlar: Söhrab Tahirin niskil dolu həyatı… “Atam anasıyla düz 25 il sonra görüşdü” +
31.05.2017, 16:30

“İngilis sahibkarın iti ilə dostluğu atamı kor olmaqdan xilas etdi”


Modern.az
 saytının “Atalar və övladlar” layihəsində tanınmış ziyalılar - elm, mədəniyyət, incəsənət, idman, ədəbiyyat xadimləri, eləcə də, ictimai, siyasi simalar onları böyüdüb, boya-başa çatdıran atalarının həyat hekayətini danışırlar. Bir növ, atalarının keçdiyi ömür yolunu xarakterizə edirlər. Təkcə yazının deyil, həm də fotoların diliylə...

Həmçinin, dünyasını dəyişən məşhur atalar barəsində də övladları danışır, onların portretini gözümüz önündə canlandırır.

Bu dəfə o tay-bu  taylı Azərbaycanın sevimli şairi olan, taleyi ilə bir Vətənin ikiyə bölünmüş ağrısının portretini çəkən mərhum Xalq şairi Söhrab Tahir (Azər Azər) haqqında qızı Nəsibə Tahir Anadil danışacaq.

Nəsibə xanımın xatirələrində Söhrab Tahirin bilmədiyimiz tərəfləri ilə tanış olacaq, dillərə dastan olan 25 illik ana ayrılığının tarixçəsini biləcək və başqa maraqlı məqamlardan agah olacağıq:

 

 Məşhur Tahirilər nəsli, İngiltərə auksionundakı kitab

 

-Söhrab Tahir - Azər Azər XX əsr Azərbaycan ədəbiyyatının vahidlik simvoludur. Xalqımızın qaysaqlanmayan yarası onun şəxsiyyət, ədib və lider kimi formalaşmasında mühüm rol oynayıb və tale kitabını yazıb. Bəlkə də bir əsrdə üç inqılab edən xalqın şanlı nəslinin nümayəndəsi olmaq Allahın bir lütfüdür. “Azadlıq” hayqıran xalq hərəkatına tarixin müxtəlif məqamlarında qoşulan Tahirilər nəsli qədim Ərdəbil torpağındandırlar. Qədim Parfiya dövlətindən (Baxtriyadan) çıxan, Aşqanilər adlanan döyüşkən tayfa e. ə. 250 – 226-cı illərdə mövcud olan ilk türksoylu dövlətin - Aşqanilər dövlətinin təməlini qoydu. Şairin ulu babası Mirzə Tahirin nəsil şəcərəsi haqqında yazdığı kitab məşhur “Sotheby” auksionuna çıxarılmışdı.


Ömrün ilk zədələri, ingilisdən vəfalı it

-Döyüşkən nəslin davamçısı kimi gənc Söhrab da inqilab burulğanına atılaraq, öz gələcəyinin nəqşəsini cızmış oldu. Bir neçə adamın taleyinin birində cəmləşməsi atamın qədəri idi. Ucaboylu, enlikürəkli, “Tarzan” rolunun məşhur ifaçısı aktyor Conni Vaysmüllerə bənzəyən atletik bədənli, həmişə şıqgeyimli Söhrab hələ uşaq ikən sürgünlərə məruz qalan ailəsinə, atasına yardım etmək üçün məktəbi buraxıb işə başlayır. İranın cənub-qərbinə Kirmanşaha sürgün edilən ailənin başçısı, Əbülfəz Tahiri böyük oğlu Söhrabla ingilislərin neft şirkətinin zavodunda fəhlə işləməyə məcbur olur. Bir gün atam dəzgahda çalışarkən gözündən zədə alır. Kiçicik dəmir parçası dəzgahdan çıxıb onun gözünə girir. Anası Nəsibə xanım səhərədək nəm çay liflərindən kompres qoysa da, köməyi olmur. İstehsalatın həkimi atamın şişib bərbad vəziyyətə düşən gözünü görüncə, aciz şəkildə başını yelləyir. Ona çatacaq pulun fərqini almaq üçün zavodun həyətində duran Söhrab ingilis mühəndis mister Smitin itinin ona tərəf yüyürdüyünü görür. Nəhəng itin şəlpə qulaqları da, istidən ağzının yan tərəfindən sallanan dili də, hətta gözünün parıltısı da onun sevincindən xəbər verirdi. Zəhmli itin xəstə uşağa tərəf hücumunu görən hər kəs donub qalır. Oradakıları insan yerinə qoymayan mister Smit belə, narazılıqla dönüb bu səhnəni izləməyə məcbur olur. Təkcə hamının “Tufan” deyə çağırdığı Söhrab sakit idi. Dəhşətli ağrı onu iflic etmişdi. İt hoppanıb qabaq pəncələrini onun sinəsinə dayayır......və duz kimi yalamağa başlayır. Mister Smitin marağı itir, o yanındakı ustadan bu uşağın kim olduğunu soruşur. Usta onun burada fəhlə işlədiyini və istehsalatda zədə aldığını xəbər verincə Smit çomaqlı əlini qaldırıb Söhrabı hələ də yalayan və quyruq bulayan itinə işarə verir. İt təəssüflə dostuna baxıb əmrə müntəzir vəziyyətdə sahibinin arxasınca qaçır. Birdən Smit çönüb ustaya deyir:

- Onu apar mənim həkimimin yanına, de ki, mister Smitin itinin dostudur, mən göndərmişəm, qəbul etsin.

Beləcə, hər gün evdən gətirdiyi naharı zavodun həyətində gəzişən zorba itlə paylaşaraq dostlaşan Söhrabı kor olmaqdan sahibkar iti ilə dostluğu xilas etdi. Həkim maqnitli göz aparatı ilə Söhrabın gözündəki dəmiri çıxarıb müalicə etdi.


Həm o taylı, həm bu taylı…

-Atamgilin ailəsinin sürgün həyatı nə az, nə çox düz on bir il çəkdi. 1941-ci ilin əvvəllərindən İranda ictimai-siyasi vəziyyət gərginləşməyə başladı. Tahirilər ailəsi 1943-cü ildə Kirmanşahdan Həmədana, bir il sonra isə Təbrizə köçür.

1944-cü ildə Təbrizə gələn gənc Söhrab, atası Əbülfəz ağa və sonralar şah tərəfindən dar ağacıdan asılaraq edam edilən əmisi Hidayət ağa bütün Cənubi Azərbaycanı bürüyən milli-azadlıq hərəkatına qoşulurlar.

Atamın yaddaşında dərin iz buraxan maraqlı və tarixi hadisələrdən biri də noyabr ayının 18-də Təbrizdə keçirilən ümumşəhər mitinqi olub. Mitinqə 20 mindən artıq adam toplaşmışdı. Mitinqi Seyid Cəfər Pişəvəri özü aparırdı.

21 Azər – 12 dekabr günü təkcə o taydan gələn demokratların deyil, onların bala, nəvə və nəticələri üçün də müqəddəs bir gündür. Biz hər il bu günü – 21 Azər gününü qeyd edirik. Bu bizim alın yazımız, qəriblik örpəyinə bürünən taleyimiz, minnətli qədərimiz, lakin bütün bunlara baxmayaraq, fəxr etdiyimiz şanlı tariximiz və əyilməz vüqarımızdır! Biz nə o taylıyıq, nə də bu taylı. Həm o taylıyıq, həm də bu taylı. Atam “Anam Nəsibə, qızım Nəsibə” şeirində yazırdı:

Arazın içində bir ada oldum,
Nə o tərəfdənəm, nə bu tərəfdən
Həm o tərəfdənəm, həm bu tərəfdən.



Araz dibindəki “paslı” çörək

-Atamın maraqlı, duzlu-məzəli söhbətləri vardı. Ötən əsdə 1960-cı illərin sonu, 70-ci illərin əvvəllərində Cənubi Azərbaycan ədəbiyyatı antologiyasında “Kakə-Həmə” adlı hekayəsi çap edilmişdi. Hazırda məndən başqa heç kimin bilmədiyi ayrı ədəbi təxəllüslə. Uşaqkən mənimlə Araz qırağında keçən doğma Astara həyatından söhbət açar, maraqlı hadisələri bölüşərdi. Sonralar Kakə-Həmənin ümumiləşdirilmiş obraz olduğunu anladım. Uşaqlar yayda Araza baş vurub çimərdilər. Xarici şirkətlər sıradan çıxan dəzgahları, müxtəlif maşınları, metal əşyaları camaata çatmasın deyə Araza atardı. Yerli əhali də bundan kiçik, lakin təhlükəli çörək qazanmaq üsulu kimi faydalanmaq istəyirdi.  Çay qırağında yaşayan uşaqlar, yeniyetmələr yaxşı üzməyi bacarırdılar. Üzmək aludəsi olan Söhrab da onlara qoşulmuşdu. “Gəzinti” qorxulu idi. Onlar Arazın dibindən gücləri çatan metalları çıxarır, bazarda yaxşı qiymətə satırdılar. Paslı metallardan alınan zədələr, nəfəsin dərinlikdə kəsilməsi və ən başlıcası isə həmin ərazidə qurulan dövlət nəzarət qüllələrindəki nəzarətçilər tərəfindən açılan atəş qənimləri idi bu oğlanların. Lakin damarlarında qan yerinə inqilab axan bu cəsur gənclər hər şeyə rəğmən həyatlarını təhlükə qarşısında qoyurdular. Xüsusilə, Tufan, yəni, atam…

Təbriz şəhərinin fərasətli “tələbəsi”

-Söhbətlərimizdən yadımdadır, atam Təbrizə əmisigilə qonaq gedir. Göbəkkəsdisi olan əmisi qızı ilə sözləri çəp gəlir, evdən küsüb çıxır. Təbrizdə pulsuz-parasız qalır. Özünü itirmir. Kinoteatrlarda gedən son Amerika bədii filmlərindən fotolar çəkib tüccarlıqla məşğul olan varlı hacı uşaqlarına satır.

Bir xatirəni də danışım: günlərin birində mərkəzdə toplanan izdihamı görüncə ora tələsir. Yaxınlaşdığında Amerikadan təzə və işlənmiş ikinci əl  malların düz meydanın ortasında müftə verildiyini görür. Özünə xardal rəngində qabardin parçadan modern təzə kostüm seçib götürür. Deyirdi, - “Əynimdə qutu kimi, şux qalırdı. Geyindim, qetdim əmimgilə. Əmiqızı ilə barışdım. Sonra geriyə, evə qayıdanda “kostumu” qonşumuza satdım”.


Ekspert

-Atam mənimçün hamıdan fərqlidir. Təkcə atam olduğuna görə deyil. Zəhmli olmasına baxmayaraq, uşağa qarşı həddən ziyadə diqqətli idi. Çoxlarının ağlına gəlmədiyi şeyləri belə, düşünürdü. İnsanları fizioqnomiyaya əsasən qiymətləndirirdi. Mənə uşaq yaşlarımdan insanlara fiziki göstəricilərə görə yanaşmağı öyrədirdi. Əla psixoloq idi. Həyatda bir çox dəyərli xüsusiyyətlərim üçün ona borcluyam. Müdrik, siyasətçi idi atam.

Onun 5 – 10 il öncə dünyada baş verən hadisələrə verdiyi analitik proqnozun indi reallaşdığını görəndə artıq təəccüblənmirəm, çünki hazıram.

Anam, anam və uşaqlıq…

-Mənə layla oxuyardı. “Arım, balım, pətəyim” mahnısını zümzümə edərdi. İndiyədək səsini eşidirəm. Həftənin altıncı günü məktəbdən evə qayıdanda xörəyi qaşıqla özü mənə yedirərdi. Ən sevdiyim gün idi. Bağa, dənizə çimərliyə bərabər gedərdik. Rəhmətlik anam evin bütün yükünü boynuna götürmüşdü ki, həyat yoldaşı yaradıcı adamdır. Atam çörəyin harada və neçəyə satıldığından xəbərsiz idi. Anamın məhz, bu zəhməti sayəsində bu gün Söhrab Tahir oxucuları onun zəngin ədəbi irsi ilə tanış olurlar. Hər yaradıcı adamın ailəsində bir fədakarı olur. Olmasa, bir şey çıxmaz. Tanıdığım , “əmim” dediyim bütün şair və yazıçıların xanımları əsl ədəbiyyat fədailəri idilər. Hamısı da şeir, sənət həvəskarı... Atam deyərdi ki, Azərbaycanda xanımlar 6 “stavka” işləyir.

Sutka ərzində 3-4 saat yatardı. Səhər yeməyini mənə şəxsən özü hazırlayardı. Şirin çayı sevdiyimi bilirdi. Qəsdən çayımı qarışdırarkən qaşığın səsinə oyanım deyə, bir az bərk vurardı. Səhərlər qəhvəaltı etmək adətimə görə atama borcluyam. Kinoteatra getməyi xoşlayırdım. Uşaq yaşlarından özünün kinoya olan həvəsini itirməmişdi. Boyük həvəslə bərabər gedərdik. Seans bitdikdən sonra şəhəri ayaqla dolaşar və tamaşa etdiyimiz filmi müzakirə edərdik. Mənim saysız suallarıma həvəs və təmkinlə cavab verər, başa salardı. Sonralar anladım ki, bu bir tərbiyə metodudur.


Ehh, o günlər, o günlər…

-İlin hər fəslini sevərdi atam. Yazda ağacların budaqlarındakı fidanların pardaqlanması, yayda dəniz səfərlərimiz, payızda parkların xəzəlinə doğru əl-ələ verib qaçmağımız, qışın gecə gəzintiləri zamanı anamın hazırladığı “peraşki”lərlə şaxtalı havanın canlı sintezdə rövnəqlənməsi ləzzət verirdi.

Albalı bağlarındakı bağımız əsl Bakı bağı idi. Yerdən, qarşısı tavanlı, qapı-pəncərəsi göy rəngli...Yay aylarında nahardan sonra atam arxa eyvanda “Vef” radiosunu İran dalğalarına kökləyərdi. Həzin musiqi sədaları altında samovar çayı hamımıza xüsusi zövq verərdi.

Səməd Vurğun küçəsindəki birotaqlı mənzilimizdən qonaq əskik olmazdı. Müasir Azərbaycan ədəbiyyatının korifeyləri bizdə toplaşar, süfrə açılar, məclisi-şüara başlayardı. Xanımlar kiçicik mətbəximizdə əyləşib Yazıçılar İttifaqının bütün son xəbərlərini, ən əsası isə yazıçının, şairin son kitabından xanımına nə hədiyyə etməsindən danışardılar.

Ağrılı həyatdan etüdlər

-Atam mərd və igid adam idi. Qəriblikdə təkbaşına qalsa da, heç kəsin əlinə möhtac olmadı. Dəmiryolu vağzalında ayaqqabılarını balınc əvəzi çütləyib başının altına qoyanda da, səhər milis əməkdaşları skamyalarda yatanları oyadanadək üzünü şüşə qırıntısı ilə qırxanda da məğrur atam əyilmədi, heç kimə ağız açmadı.

1947-ci ildə Bakı Hərbi Piyadalar Məktəbinin müdavimi doğma evinə, ata yurduna qayıda bilmədi. Sərhəd bağlı, Cənubi Azərbaycan Milli Hökuməti pərən-pərən, edamlar... Bu tərəfdə isə demokratik ruhlu gənc zabitlərin məhv edilməsi üçün plan hazırlanırdı. Atamla gələnlərin bir çoxunu İrana qaytarmaq adı ilə Qazaxıstan, Sibir çöllərinə tökdülər. Oğlunun sağ qalıb-qalmadığından xəbərsiz olan Nəsibə ananın ağzı dualı imiş, bu dəfə də ölüm Söhrabın başı üstündən yan ötdü. Hərbi məktəbdəki komandiri onu yanına çağırıb xəbərdar etmişdi ki, ehtiyatlı olsun.

Həmin tarixi görüş… 25 illik həsrətə son

-Atamın anası Nəsibə xanımla görüşü el arasında ana-balanın ayrılıq dastanına çevrilmişdi. 25 illik ayrılıqdan sonra görüşdülər. Ana tam 25 il idi ki, şah məmurlarının qapılarını gəzərək, oğlu ilə görüşmək üçün icazə ala bilmirdi. Fars dilini bilmədiyi üçün ananı qəbul etmək istəmirdilər. Oğlunun Şurəvidə (Sovetlər Birliyində) olduğunu bilən kimi üz çevirirdilər. Sonuncu dəfə bu işlərlə bağlı generalın qəbulunda növbəti rədd cavabını alan ana üzünü ona tutub demişdi:


- Mən qocayam, oğlumu görmədən ölsəm, qoy haqqım sənin boynuna yazılsın.

General ilan vuran kimi yerində dik atılır.

- Necə yəni mənim? Mən bu yükün altına girə bilmərəm.

Qapıda əyləşən sərbazı çağırıb anadan sənədləri qəbul etməsini tapşırır. Bax beləcə, 1971-ci ildə 25 illik ana-bala həsrətinə son qoyulur.
Onun gəlişi də macəralarla dolu oldu. Söhrabın anasının pişvazına Azərbaycanın müxtəlif bölgələrindən saysız-hesabsız dostlar, tanışlar axışıb gəlmişdilər Dəniz limanı gül-çiçək dəstələri, fotoaparatlar, bəzənib gəlmiş insanlarla dolu idi...Ən gözəl libasımızı geyinmişdik. Xalq şairi rəhmətlik Nəbi Xəzri Azərbaycan Dövlət Televiziya və Radio Verilişləri Komitəsinin sədri idi və xüsusi çəkiliş qrupu təşkil etmişdi. Lakin həmin gün ana gəlmədi. Xəbər yayıldı ki, “Quryev” gəmisi Mazandaranda karantinə görə saxlanılıb, bir neçə gün gecikəcək. 1961-ci ildə artıq bir infarktını yaşamış atamın nə hallara düşməsini təsəvvür etmək çətin deyil. Atam hər səhər işdən əvvəl limana gedərdi. Cənubi Azərbaycan inqilabının fədailərindən olan, eyni zamanda qohumluğu çatan Məmi Dehqani də səhərlər buraya gələrdi. Hər gün Söhrabın limanda dayanıb gözlərini üfüqə zilləməsi artıq narahatlıq doğurmağa başlamışdı. Belə günlərin birində oğul uzaqdan gələn “Quryev” gəmisini görür... Gözlərinə inanmır. Gəmi artıq yaxınlaşırdı. Gəminin girdə pəncərələrindən ağ saçlı bir qadın bu pəncərədən o birinə qaçaraq əli ilə sanki çirkliymiş kimi şüşələri silirdi. Xırda üzünü soyuq şüşəyə yapışdırmışdı. Kimisə görmüş kimi pəncərədən ayrılıb göyərtəyə qalxır. Artıq aralarında bir neçə metr qalmışdı.

- Məmi, ədə ölməyəsən səni, heç dəyişməmisən.

Məmi Dehqan deməyə söz tapmamış ananın gözləri Söhraba tərəf tuşlanır:

- İsrafil, sənsən?

Gənc oğlunu yola salan ana qarşısında püxtələşmiş kişini görüncə onu dayısı İsrafilə bənzədir.

- Yox, ana, mənəm, Söhrabdır.

Ana yavrusundan uzaq düşən yaralı quş kimi qiyyə çəkir, xırda yumruğunu həsrətdən qurumuş sinəsinə çırpır və göyərtədə çökür.

Artıq bu dünyanın heç bir gücü Söhrabı saxlaya bilməzdi. Hövlnak götürülüb limana yenicə endirilən pillələrlə alıcı quş tək göyərtəyə qalxır. Ananı qolları arasına alıb sinəsinə sıxır. Komanda heyəti sanki ovsunlanmış kimi bu səhnəni müşahidə edirdi. Zavallı qadını gəminin yardıma yetişən həkimi özünə gətirər-gətirməz oğlunun boynunu bərk-bərk qucaqlayıb deyir:

- Ədə, oğlan, ayıbdı, qoy məni yerə.

Nənəm zarafatcıl qadın idi. Bəlkə də bu xasiyyəti olmasaydı, dəli olardı. Atam həmişə mənə deyərdi ki, qərib, dərdli adam deyən-gülən olur. Güləndə də hamıdan bərk gülür ki, dərdini unutsun. Düz imiş...Nəsibə ana oğlunun ürəyinin xəstə olduğunu eşitmişdi, ona görə də zarafat etdi:

- Məni burda kim qarışlayacaq, çıxsın qabağıma görüm.

- Ana, nə qarışlamaq?

- Məktubda yazmışdın “qarışlayacaqlar”. Biz də anlamadıq. Bakıdan çoxdan köçən qardaşlar var idi, onlardan soruşduq, dedilər ki, Şurəviyə ilk dəfə qədəm basanları qarış-qarış ölçürlər. Odur ki, deyirəm, kimdi, gəlsin görüm.


- Yox, ana, “qarışlamaq” yox, “qarşılamaq”, yəni pişvazına çıxmaq.

Gülüşdülər. Nənəm 6 ay qaldı Bakıda. Atam Azərbaycanın ən səfalı yerlərində onu gəzdirdi. Göygölə aparanda 400 pilləkənə anasını qucağında qaldırdı. Nənəm Göygölü görən kimi başındakı yaylıqla yaşmaqlandı. Atam təəccübləndi:

- Ana, kimdən utanırsan?


- Oğlan, o gözəlliyə birdən baxmaq olmur, adam həya edir.


“Şah toyu”,  Türmənçayla Gülüstanın “ləğvi”

-Ağdamda məşhur xalçaçı-rəssam Əli Təbrizi-Fərruxinin oğlu Eldarın toyuna dəvət aldıq. Toy büsatını görən nənəm dedi ki, İranda heç şah belə toy eləmir ki, siz eləyirsiniz. Şuşanın da görüşünə getdi nənəm. Gəncədə ailəmizin yaxın dostu rəhmətlik şair İrani İman əminin evində Cənubla Şimal birləşmişdi sanki, aşıq Hüseyn Cavan sazıyla ürəkləri riqqətə gətirirdi. Bakıdakı evimizdə hər gün qonaqlıq idi. Aşıqlar, şairlər, bəstəkarlar. Azərbaycan bizim kiçik evimizdə qovuşurdu, Türkmənçayla Gülüstan müqavilələri sadə xalq tərəfindən ləğv edilirdi sanki. Nənəmə şeirlər yazılırdı. Məmməd Araz, Nəbi Xəzri, Cabir Novruz, Nəriman Həsənzadə, Xəlil Rza Ulutürk və bir çox ədəbiyyat korifeyləri Nəsibə xanıma şeirlər, poemalar ittihaf edirdilər. Bu şeirlər onların kitablarında dərc olunub. Nənəm deyirdi ki:

- Söhrab, bəs mən gəlmişdim səni qardaşlarının yanına aparım. Gəldim gördüm ki, bütün ölkə sənin qardaşın, dostundur. Daha səndən arxayınam.

Nənəmin yüngül qədəmi ilə bizə 8-ci mikrorayonda 3 otaqlı məzil verdilər. Köçdük. Nənəm gündüzlər danışar gülərdi, gecələr oğlunun başı üstə səhərədək balasına tamaşa edərdi, səssiz-səssiz ağlayardı. Anam da o biri otaqda səssizcə göz yaşlarını udardı. Mənə deyərdi ki, Həzrət Abbas haqqı, bu dünyanın üzü niyə çönmür, ana balasına həsrət qalıb.


Epiloq… Son söz əvəzi

-Bax beləcə, bölünmüş vətənin istiqlal şairi Söhrab Tahir sevgisində, sevincində və ayrılığında yandı... lakin kül olmadı, közərən ocağı onun zəngin yaradıcılığıdır.

Azad qardaşım var.onunla xoşam,
Mən gərək sahili sahilə qoşam.
İki bölünməkdən elə qorxmuşam,
Çöpü də ikiyə bölmərəm daha.

Mənə deyərdi ki, hər görüşün sonu ayrılıq, hər gülüşün sonu göz yaşıdır. Taleyimizin xəmiri belə yoğrulub. Gəncliyimdə üsyan edərdim. Deyərdim, yox, mən qərib deyiləm, mən bu tayda doğulmuşam, böyümüşəm, mən artıq yerliyəm. Gülümsəyərdi...Sonralar anladım və razılaşdım. Bağlanmıram heç kimə, qorxuram. Çünki mənim də qərib taleyimə dünyaya göz açmadan ayrılıq möhürü vurulubmuş...

Mən iki olkənin vətəndaşıyam,
Iki taleyimi gərək yaşayam.
Öləndə kəfənim ikiqat olsun,
Mən həm o tayınam, həm də bu tayın.


Elmin Nuri

 


xeber, parlament, ölkə, qarabağ, müsahibə, müəlliflər, təhsil, iqtisadiyyat, reportaj, gündəm, mədəniyyət, dünya, media, ədəbiyyat, fotosöhbət, Azərbaycan, xəbərlər, Russia, Turkey, Azerbaijan, Bakı, Baku

Şərh yaz

Bu kateqoriyadan olan xəbərlər
SON XƏBƏR
Azərbaycanın elektrik enerjisi ixracı artıb
20.01.2019, 15:09

Azərbaycanın elektrik enerjisi ixracı artıb

Mədəniyyət Nazirliyinin kollektivi Şəhidlər xiyabanını ziyarət edib - FOTO
20.01.2019, 14:59

Mədəniyyət Nazirliyinin kollektivi Şəhidlər xiyabanını ziyarət edib - FOTO

Sovet qoşunlarının Bakıya müdaxiləsini erməni təcavüzündən ayrı təhlil etmək mümkün deyil - Elçin Əhmədov
20.01.2019, 14:50

Sovet qoşunlarının Bakıya müdaxiləsini erməni təcavüzündən ayrı təhlil etmək mümkün deyil - Elçin Əhmədov

İnsan özünün ya həkimidir, ya qənimi - Məşhur loğman YAZIR
20.01.2019, 14:41

İnsan özünün ya həkimidir, ya qənimi - Məşhur loğman YAZIR

“Avropa Şurasında Azərbaycanın qlobal rolunu yaxşı dərk edirlər”
20.01.2019, 14:30

“Avropa Şurasında Azərbaycanın qlobal rolunu yaxşı dərk edirlər”

Dağıstanda sosial problemlər...
20.01.2019, 14:17

Dağıstanda sosial problemlər...

İmişlidə yol qəzası: ölən və yaralananlar var
20.01.2019, 14:00

İmişlidə yol qəzası: ölən və yaralananlar var

Xalq şəhidlərin xatirəsini ehtiramla yad edir - FOTOLAR
20.01.2019, 13:45

Xalq şəhidlərin xatirəsini ehtiramla yad edir - FOTOLAR

Məzarsız şəhid, yaxud itkin düşmüş arzular...
20.01.2019, 13:32

Məzarsız şəhid, yaxud itkin düşmüş arzular...

Sevgilisinin məktubunu saxladığım şəhid
20.01.2019, 13:20

Sevgilisinin məktubunu saxladığım şəhid

Azərbaycanda ağır qəza: 3 yaralı var 
20.01.2019, 13:10

Azərbaycanda ağır qəza: 3 yaralı var 

Həftənin ilk iş gününün HAVASI
20.01.2019, 13:00

Həftənin ilk iş gününün HAVASI

Bakıda avtobus qəzası: yaşlı qadın ağır yaralandı - FOTO
20.01.2019, 12:45

Bakıda avtobus qəzası: yaşlı qadın ağır yaralandı - FOTO

“İslahat tərəfdarlarını gözdən salmağa çalışırlar” - Qüdrət Həsənquliyev
20.01.2019, 12:33

“İslahat tərəfdarlarını gözdən salmağa çalışırlar” - Qüdrət Həsənquliyev

Həm peşə, həm də Vətən borcu...   
20.01.2019, 12:21

Həm peşə, həm də Vətən borcu...  

Qara dənizdə azərbaycanlı kapitanın cəsədi tapıldı
20.01.2019, 12:06

Qara dənizdə azərbaycanlı kapitanın cəsədi tapıldı

20 Yanvar şəhidlərinin xatirəsi bir dəqiqəlik sükutla yad edildi 
20.01.2019, 12:00

20 Yanvar şəhidlərinin xatirəsi bir dəqiqəlik sükutla yad edildi 

20 Yanvar faciəsinə həsr olunan “Azadlıqla bitən SOS” adlı sənədli film hazırlandı – VİDEO
20.01.2019, 11:50

20 Yanvar faciəsinə həsr olunan “Azadlıqla bitən SOS” adlı sənədli film hazırlandı – VİDEO

“Mehman Hüseynov məsələsini şişirdib Azərbaycana qarşı istifadə edirlər” - Mübariz Qurbanlı
20.01.2019, 11:43

“Mehman Hüseynov məsələsini şişirdib Azərbaycana qarşı istifadə edirlər” - Mübariz Qurbanlı

Bakıda piyada keçidində vurulan qadın həkimdir
20.01.2019, 11:39

Bakıda piyada keçidində vurulan qadın həkimdir

Meksikada baş vermiş faciədə ölənlərin sayı 76-ya çatıb
20.01.2019, 11:34

Meksikada baş vermiş faciədə ölənlərin sayı 76-ya çatıb

İranlı şairənin inqilabı
20.01.2019, 11:22

İranlı şairənin inqilabı

"Bəzi qruplar ölkədə qarşıdurma yaratmağa cəhd edirlər" - Komitə sədri
20.01.2019, 11:21

"Bəzi qruplar ölkədə qarşıdurma yaratmağa cəhd edirlər" - Komitə sədri

20 Yanvar bütün türk dünyasının qürur günüdür - SƏFİR
20.01.2019, 11:10

20 Yanvar bütün türk dünyasının qürur günüdür - SƏFİR

Kamil Cəlilov: “20 yanvar hadisələrində mənim çalğım olmasaydı” - VİDEO   
20.01.2019, 10:56

Kamil Cəlilov: “20 yanvar hadisələrində mənim çalğım olmasaydı” - VİDEO  

İçki məclisində dava düşdü - Bir nəfər bıçaqlandı
20.01.2019, 10:53

İçki məclisində dava düşdü - Bir nəfər bıçaqlandı

Paytaxda yaşayış binasında yanğın   
20.01.2019, 10:36

Paytaxda yaşayış binasında yanğın  

Bakıda bu yollar bağlıdır - SİYAHI
20.01.2019, 10:34

Bakıda bu yollar bağlıdır - SİYAHI

20.01.2019, 10:29

"Arsenal" "Çelsi"ni məğlub etdi - VİDEO

Azərbaycanda zəlzələ olub
20.01.2019, 10:21

Azərbaycanda zəlzələ olub

Prezident və birinci xanım şəhidləri yad etdilər   
20.01.2019, 10:14

Prezident və birinci xanım şəhidləri yad etdilər  

Ermənilər rayonlarımızı atəşə tutdular
20.01.2019, 10:11

Ermənilər rayonlarımızı atəşə tutdular

20 yanvar hadisələri beynəlxalq hüquq kontektində   
20.01.2019, 10:00

20 yanvar hadisələri beynəlxalq hüquq kontektində  

Azadlıq yolunda qalxan bir vuruş...   
20.01.2019, 09:45

Azadlıq yolunda qalxan bir vuruş...  

ABŞ-da Azərbaycanı tanıdan işgüzar xanım...
20.01.2019, 09:38

ABŞ-da Azərbaycanı tanıdan işgüzar xanım...

Rusiyanın Qara dəniz donanması ABŞ gəmisinə qarşı
20.01.2019, 00:58

Rusiyanın Qara dəniz donanması ABŞ gəmisinə qarşı

Gülən xarici ölkələrdə gizlənən təşkilat üzvlərindən danışdı
20.01.2019, 00:32

Gülən xarici ölkələrdə gizlənən təşkilat üzvlərindən danışdı

Alimlərdən XƏBƏRDARLIQ: Uşaqlara qarşı bu hərəkətləri etməyin
20.01.2019, 00:14

Alimlərdən XƏBƏRDARLIQ: Uşaqlara qarşı bu hərəkətləri etməyin

Azərbaycan xalqı 20 Yanvar şəhidlərini yad edir
20.01.2019, 00:00

Azərbaycan xalqı 20 Yanvar şəhidlərini yad edir

Sürücülərə ŞAD XƏBƏR: Bu ərazilərdə dayanmaya icazə veriləcək - VİDEO
19.01.2019, 23:46

Sürücülərə ŞAD XƏBƏR: Bu ərazilərdə dayanmaya icazə veriləcək - VİDEO

“Heç bir ABŞ prezidenti mənim qədər iş görməyib” - Tramp
19.01.2019, 23:26

“Heç bir ABŞ prezidenti mənim qədər iş görməyib” - Tramp

Miqrantları daşıyan gəmi qəzaya uğradı - 117 itkin
19.01.2019, 23:13

Miqrantları daşıyan gəmi qəzaya uğradı - 117 itkin

İSESCO ilk dəfə olaraq 20 Yanvar faciəsi ilə bağlı bəyanat yaydı
19.01.2019, 22:52

İSESCO ilk dəfə olaraq 20 Yanvar faciəsi ilə bağlı bəyanat yaydı

Putin xaç suyuna girdi - VİDEO
19.01.2019, 22:35

Putin xaç suyuna girdi - VİDEO

Avropa İttifaqından daha bir ölkəyə sanksiya
19.01.2019, 22:17

Avropa İttifaqından daha bir ölkəyə sanksiya

Qadın özünü yanan binadan yerə atdı - VİDEO
19.01.2019, 21:58

Qadın özünü yanan binadan yerə atdı - VİDEO

Türkiyə 54 min suriyalıya vətəndaşlıq verib
19.01.2019, 21:41

Türkiyə 54 min suriyalıya vətəndaşlıq verib

“Qarabağ” Çexiya klubuna qalib gəldi
19.01.2019, 21:26

“Qarabağ” Çexiya klubuna qalib gəldi

Aksiyada 12 nəfər saxlanıldı
19.01.2019, 21:15

Aksiyada 12 nəfər saxlanıldı

Bakıda sərnişin avtobusu qəza törətdi
19.01.2019, 21:01

Bakıda sərnişin avtobusu qəza törətdi

ARXİV