“Türküstan” qəzetinin redaksiyasında Azərbaycan Respublikasının Prezidenti İlham Əliyevin sərəncamı ilə mətbuat işçilərinə tikilmiş ikinci binadan mənzil alınması üçün  namizədlərin müəyyənləşdirilməsi məqsədilə iclas keçirilib.

İclasda KİVDF-də yaradılmış müvafiq komissiyanın üzvü, Mətbuat Şurasının sədr müavini  Müşfiq Ələsgərli iştirak idib.

“Türküstan” qəzetinin baş redaktoru Aqil Camal dövlətin mediada çalışan vətəndaşların mənzil-məişət şəraitinin yaxşılaşdırılması ilə bağlı atdığı real addımları qeyd edərək, növbəti binadan mənzillərin paylanılması zamanı ehtiyacı və xidməti olan media işçilərinin bu imkandan yararlana biləcəklərinə inandığını söyləyib.

Komissiya üzvü Müşfiq Ələsgərli namizədlərin müəyyənləşdirilməsi prosedurları haqda məlumat verib. Bildirib ki, qəbul olunmuş qaydalara görə həftəlik qəzet redaksiyaları mənzil almaq üçün 3 namizəd irəli sürə bilər.

Müzakirələrdə mənzilə ehtiyacı olan bir neçə qəzet əməkdaşının olduğu bildirilib. Bununla belə, mediada iş stajına, xidmətlərinə, həmçinin, mənzil ehtiyacına görə hazırkı vəziyyətdə baş redaktor müavini Araz Aslanlının kriteriyalara daha çox uyğun gəldiyi vurğulanıb.

Bu baxımdan, “Türküstan” qəzeti redaksiyasından bir namizədin – Araz Aslanlının namizədliyinin irəli sürülməsi qərara alınıb.

Qeyd edək ki, Araz Aslanlı Türkiyənin Hacettepe Universitetinin Biologiya, həmçinin, İqtisadiyyat və İdarəetmə Elmləri Fakultəsini bitirərək, “dövlət idarəçiliyi və politologiya” ixtisasına yiyələnib. Ankara Universitetiində magistraturanı bitirib.

2000-2004-cü illərdə ASAM-da Azərbaycan şöbəsinin müdirii, 2004-cü ildən TUSAM-da Ümumqafqaz Şöbəsinin rəhbəri işləyib.

2000-ci ildən araşdırmaçı jurnalistika ilə məşğuldur. 2006-ci ildən “Türküstan” qəzetində əvvəlcə baş məsləhətçi, hazırda isə baş redaktorun müavini kimi fəaliyyət göstərir.

Qarabağ problemi, enerji strategiyası, Azərbaycan xarici siyasətinin müxtəlif istiqamətləri və s. mövzularda 300-dən çox məqalənin müəllifidir.

Məqalələri ingilis, rus, alman, fransız və türk dillərində dünyanın müxtəlif ölkələrinin (Azərbaycan, Türkiyə, Rusiya, ABŞ, Fransa, İngiltərə və s.) qəzet, jurnal və internet saytlarında dərc olunub. 2015-ci ildə TRT-Avaz kanalında hazırladıqları həftəlik “Yeddinci Gün” verilişinə görə “İlin Peşəkar Jurnalisti” mükafatına layiq görülüb.

21 cildlik Türk Dünyası Ensiklopediyasında “Qarabağ” maddəsinin müəllifidir.

“Heydər Əliyev dövründə Azərbaycanın xarici siyasəti” adlı kitabı 2005-ci ildə Ankarada işıq üzü görüb. Bundan əlavə 4 kitabın müəllifi, 7 kitabın isə həmmüəllifidir.

Modern.az