Modern.az

Bakıda məskunlaşan köçkünlərin Cocuq Mərcanlıya köçü başa çatdı  

Bakıda məskunlaşan köçkünlərin Cocuq Mərcanlıya köçü başa çatdı   

12 İyul 2017, 10:02

Bakıda məskunlaşan məcburi köçkünlərin Cəbrayılın Cocuq Mərcanlı kəndinə köçürülməsi başa çatıb.

Bu barədə Modern.az-a Cəbrayılın Cocuq Mərcanlı kənd inzibati ərazi dairəsi üzrə icra nümayəndəsi Xanlar Zeynalov məlumat verib.

X.Zeynalov Bakıdan köçən sonuncu sakinin özü olduğunu bildirib:

“Əslində mən də ilk günlərdə gələcəkdim. Amma qərara əsasən Bakıdakı sakinlərimizin hamısı köçdükdən sonra qayıtdım”.

Kənd rəsmisi indiyə qədər Cocuq Mərcanlıdan ayrı yaşadığı üçün özünü qınayıb:

“Dünəndən kənddəyəm. Gecə o qədər gözəl idi kəndimiz. Sakitlik və rahatlıq hökm sürür. Fikirləşirəm ki, indiyə qədər Bakıda çox nahaq yerə qalmışam. Təmiz hava, su, işıq, hər bir şərait yerində”.

X.Zeynalov deyib ki, yalnız Biləsuvarda məskunlaşan məcburi köçkünlərin köçürülməsi qalıb:

“Biləsuvarda qalan 11 ailə də “Dövlətqaçqınkom”un göstərişilə bu gün ya da sabah köçürüləcək. Bununla da ilkin mərhələ üçün nəzərdə tutulan ailələrin köçürülməsi yekunlaşacaq”.

Qeyd edək ki, birinci mərhələdə kənddə 10 hektarərazidə 50 fərdi evin və müvafiq infrastrukturuntikintisi aparılıb. Tikilmiş evlərə Cəbrayıl rayonununCocuq Mərcanlı kəndindən olan və əsasən Bakı şəhərində müvəqqəti məskunlaşmış məcburi köçkünlər köçürüləcək. Ümumi sahəsi 3850 kvadratmetr olan mənzillərin 20-si ikiotaqlı, 25-i üçotaqlı, 5-i isə dördotaqlıdır. Həmin evlərdə 50 ailə yaşayacaq.

İkinci mərhələdə daha 100 evin tikintisi həyata keçiriləcək.

Gülşən RAUFQIZI

Twitter
Sizə yeni tvit var
Keçid et
Ukrayna ordusu dəhşət saçdı: Rusiya ərazisi vuruldu