Modern.az

"Qarabağ torpaqlarının işğalı daim məsuliyyətimizi artırır" - Qurban Qurbanov

"Qarabağ torpaqlarının işğalı daim məsuliyyətimizi artırır" - Qurban Qurbanov

24 İyul 2017, 20:50

“Sabah çox vacib oyuna çıxacağıq. Hazırlıq üçün vaxtımız az olub. Rəqibi futbolçulara tanıtmağa çalışdıq. “Şerif”in yaxşı heyəti var”. Modern.az  xəbər verir ki, bunu “Qarabağ”ın baş məşqçisi Qurban Qurbanov Çempionlar Liqasının 3-cü təsnifat mərhələsində sabah Bakıda “Şerif”lə keçiriləcək oyun üçün təşkil olunan mətbuat konfransında bildirib. Baş məşqçi daha sonra jurnalistlərin suallarını cavablandırıb.

 

- Heyətlə bağlı problemləriniz var?

 

- Rəşadla Dani oynaya bilməyəcək. Hər ikisi komandaya qoşulsa da, ancaq fərdi məşqlər edirlər. Ümumilikdə elə bir ciddi problemimiz yoxdu. Bildiyiniz oyunçulardı. Abbas Hüseynov da artıq komanda ilə məşqlərə başlayıb.

 

- Əksəriyyət düşünür ki, “Qarabağ” “Şerif”i asanlıqla keçəcək.

 

- Bir tərəfdən bu fikirdə olanlara minnətdaram. Onlar bizə güvəndiyi üçün belə düşürlər. Bəzi rəqiblərimizlə bağlı bu fikirlərini səsləndirirlər. Biz həmişə ehtiyatlı davranırıq. Çünki rəqib də bizi təhlil edir. ÇL-in III təsnifat mərhələsi daha vacibdir. Çünki bu mərhələni adlayan komanda Avropa Liqasının qrup mərhələsinə vəsiqəni təmin edir. “Şerif”in 7 yeni oyunçusu var. Kifayət qədər yaxşı transferlərdir. Bizim üçün asan rəqib deyil. Asan olsa belə, ehtiyatı əldən verməli deyilik. Onların da fikri mərhələni keçməkdir. Məncə bizim üçün ağır oyunlardan biri olacaq.

 

- Bu gün hamı “Qarabağ”dan Çempionlar Liqasının qrup mərhələsini tələb edir. Bu amil futbolçulara psixoloji cəhətdən necə təsir edir?

 

- Bunun müsbət və mənfi tərəfləri var. Futbolda daim qarşındakı oyunu düşünməlisən. Bu gün Çempionlar Liqasının qrupunu düşünsək, yanılmış olarıq. Futbolçular psixoloji təzyiq altında olar. Hər oyunda komandanı qələbəyə kökləməyə çalışırıq. Qrupa düşmək üçün hələ 2 mərhələ keçmək lazımdır. Bu rəqibi keçdikdən sonra o barədə fikirləşə bilərik. Özümüzü aldatmayaq. Çempionlar Liqası elə-belə turnir deyil.

 

- Əvvəlki rəqibləriniz “Zalsburq” və “Viktoriya” ilə “Şerif”i necə müqayisə edərdiniz?

 

- Heç vaxt belə müqayisə etmək istəmirəm. “Viktoriya” ilə Bakıdakı matçda bir neçə qol şansından istifadə edə bilməmişdik. Rəqibdən zəif deyildik. Ancaq sona yaxın bir epizod yaradıb qol vurdular. Hər komandanın öz çətinliyi var. “Şerif” hər matçda 3 dəfə sistemi dəyişir. Fərqli dəyişikliklər edirlər. Sabah meydanda onları tam dəqiq tanıyacağıq. Oyunun gedişində bizim də bir neçə variantımız olacaq.

 

- Sabah qapını kimə həvalə edəcəksiniz?

 

- Mən oyundan öncə heyət barədə danışmağı xoşlamıram. Heyəti müəyyənləşdirmişəm və problem olmasa, düşündüyüm oyunçuları meydana buraxacağam.

 

- Sabahkı oyunun Ağdamın işğalı günlərinə təsadüf etməsi sizin üzərinizdə təzyiqi artırır?

 

- Ağdamın işğalının sabah və ya bir ay sonra olmasını düşünmürük. Bu hadisə bir gün baş verib. Qarabağ torpaqlarının işğalı daim məsuliyyətimizi artırır. Bütün futbolçuların bundan məlumatı var. Dünən əcnəbi oyunçular bu barədə daha çox maraqlandılar. Bilirlər ki, onlardan nələr tələb olunur.

 

- Mərhələ adlayacağınız təqdirdə yeni transferlər gözlənilir?

 

- Transferlərimizin mərhələ adlamaqla əlaqəsi yoxdur. İlk transferlərimiz də oyuna 4-5 gün qalmış reallaşmışdı. Bu gün də transfer işlərimiz davam edir. Hər il 4-5 oyunçunu dəyişməyi xoşlamıram. Ola bilər ki, kimdəsə səhv edirik. Amma düşüncəmizə uyğun oyunçular almağa çalışırıq.

 

- Son oyunlarda Mahir Mədətov özünü yaxşı tərəfdən göstərə bilmir. Ümumiyyətlə, hansı mövqeyə futbolçu axtarırsınız?

 

- Hücumçu mövqeyinə futbolçu axtarırıq. Amma bunun Mahirin oyunu ilə heç bir əlaqəsi yoxdur. Çünki Mahir son zamanlar özünü ən yaxşı tərəfdən göstərməyi bacarır və onun çıxışı mənim ürəyimcədir. Alternativli heyət düzəltmək istəyirik. Çünki sabah kimsə zədələnə, cəzalana bilər.

 

- Əyalət klubu olan “Qəbələ” heyətinə bir neçə legioner cəlb edib. Bəs “Qarabağ” niyə çoxsaylı futbolçu ilə güclənə bilmir?

 

- Səhv etmirəmsə, “Qəbələ”nin heyətini 9-10 futbolçu tərk edib. Amma bizdə vəziyyət fərqlidir. Əgər bizə 10 futbolçu lazım olsaydı, bəlkə də tapardıq. Hər mövqeyə oyunçu lazım olanda bir qədər asan olur. “Barselona” da transferlərdə çətinlik çəkir. Məsələyə fərqli yanaşmaq lazımdır. Komandanı gücləndirəcək oyunçudusa, artığını da ödəyib gətirərik.

 

- Rəşad Sadıqov sıraya döndükdən sonra Jezniçakla onun arasında seçim etməkdə çətinlik çəkməyəcəksiniz?

 

- Təki hamısı sağlam olsun.

 

- Almeydanın keçmiş komanda yoldaşı onun “Qarabağ”da 550 min avro aldığını bildirib. Həqiqətən belədir?

 

- İlini soruşmaq lazımdır. 550 min söhbətini eşitməmişdim. Biz futbolçudan, o da bizdən məmnundursa, pul məsələsi problem olmamalıdır.

 

Modern.az

Telegram
Hadisələri anında izləyin!
Keçid et
Son dəqiqə- Paşinyan Qazaxın Əskipara kəndinə gəldi