Standartlaşdırma, Metrologiya və Sertifikatlaşdırma üzrə Dövlətlərarası Şuranın MDB ölkələri arasında keçirilən müsabiqəsinin nəticələri artıq məlumdur. Məhsul və xidmətlərin keyfiyyəti üzrə nailiyyətlərə görə keçirilən beynəlxalq müsabiqəyə qatılan Azərbaycanın 4 istehsal müəssisəsindən 3-ü ayrı-ayrı kateqoriyalar üzrə I yerə layiq görülmüşlər. Modern.az-ın məlumatına görə, bu barədə Standartlaşdırma, Metrologiya və Patent üzrə Dövlət Komitəsinin mətbuat xidmətindən məlumat verilib.
Dövlətlərarası Şuranın ekspertlərinin rəyləri gizli səsvermədən sonra ümumiləşdirilib. Nəticələrə əsasən, “İşçilərinin sayı 250-dək olmaqla sənaye məhsulları istehsalı” kateqoriyasında 630 xal toplamaqla “NJT2000” firması rəqiblərini arxada qoyub.
“İşçılərinin sayı 250-dək olmaqla xalq istehlakı mallarının istehsalı” kateqoriyasında I yerə 912 xal toplamaqla “Gazelli” MMC, “İşçilərinin sayı 250 nəfərdən çox olmaqla xalq istehlakı mallarının istehsalı” kateqoriyasında isə I yerə 635.7 xal toplamaqla “Qafqaz Konserv Zavodu” MMC layiq görülüb.
