Modern.az

Media kapitanlarından Mehman Əliyevin saxlanılmasına  ETİRAZ

Media kapitanlarından Mehman Əliyevin saxlanılmasına  ETİRAZ

25 Avqust 2017, 18:08

Azərbaycan Mətbuat Şurasının sədri Əflatun Amaşov və bir sıra aparıcı media rəhbərləri “Turan” İnformasiya Agentliyinin baş direktoru Mehman Əliyevin ötən gün axşam saatlarında saxlanılmasına münasibət bildiriblər.

 

“Ölkə.Az”-ın məlumatına görə, media rəhbərləri Mehman Əliyevin peşəkar jurnalist olduğunu və Azərbaycanın müstəqilliyi üçün çox xidmətlər göstərdiyini söyləyərək, onun saxlanılmasına etiraz ediblər. 

Milli Məclisin deputatı, Azərbaycan Mətbuat Şurasının sədri Əflatun Amaşov söyləyib ki, doğrudan da “Turan” İnformasiya Agentliyi keçmişi, tarixi olan media qurumlarımızdandır: 

 

“Onun rəhbəri Mehman Əliyev kifayət qədər peşəkar jurnalistdir, səriştəli idarəçidir. Ancaq son zamanlar agentlik media məkanımızda sanki yox kimidir. Bunu müxtəlif amillərlə əsaslandırmaq mümkündür. Cəmiyyət dəyişir, jurnalistika dəyişir, prinsiplər və dəyərlər də həmçinin. Zamanla oxşar proseslərin müxtəlif media qurumlarının timsalında şahidi olmuşuq. Bu proses müəyyən mənada təbiidir.

Bu günün media reallığından uzaq kimi görünən “Turan”ın materiallarına çox az hallarda istinad var. Xəbərlərinə demək olar rast gəlinmir. Ümumən yaradıcılıq dəst-xətti nəzərə çarpmır. Halbuki əvvəllər belə olmayıb.

Onu da deyim ki, nəinki son aylar, hətta son illər belə hec bir rəsmi qurumun, vəzifəli şəxsin “Turan”ın hansısa yazısından narahatlığına, etirazına rast gəlməmişəm. Mətbuat Şurasına da “Turan”ın materialından heç bir şikayət daxil olmayıb. Belə olan halda Vergilər Nazirliyinin media qurumunda yoxlamalar aparmasını siyasi amillərlə bağlamaq istəyi hətta nəzəri cəhətdən də düzgün deyil. Kimlərsə buna cəhd edirsə, hesab edirəm ki, niyyətləri tamam başqadır”.

 

Ə.Amaşov vurğulayıb ki, Vergilər Nazirliyi dövlət orqanıdır: “Onun yoxlamalarına gəlincə, qurum hər hansı təşkilatın hesabına xaricdən və daxildən gələn maliyyə vəsaitini araşdırır. Konkret olaraq həmin vəsaitdən zəruri vergi ödənişlərinin edilib-edilmədiyini müəyyənləşdirir. İndiyədək ən müxtəlif təşkilatlarla, o cümlədən jurnalist təşkilatları və kütləvi informasiya vasitələri ilə bağlı eyni mexanizm tətbiq olunub.

Mətbuat Şurası olaraq biz “Turan” İnformasiya Agentliyi ilə bağlı məsələni diqqətdə saxlayırıq. Vergilər Nazirliyinə də müraciət etmişik. İnanırıq ki, informasiya agentliyi ilə əlaqədar araşdırmalar tam şəffaf şəkildə, qanunlarımıza tam riayət olunmaqla həyata keçiriləcəkdir”.

“Yeni Müsavat” qəzetinin baş redaktoru Rauf Arifoğlu  deyib ki, Mehman Əliyevin saxlanılması və ona qarşı ittihamlar absurddur:

 

“Biz dostumuz Mehman Əliyevi müdafiə edəcəyik”.

 

“Ölkə.Az” xəbər portalının Baş direktoru Məmməd Gülməmmədov bildirib ki, Mehman Əliyev Azərbaycan mətbuatına öz töhfəsini vermiş peşəkar jurnalistdir. 

 

Əməkdar jurnalist, hüquq müdafiəçisi Azər Həsrət də Mehman Əlliyevin saxlanmasına çox təəssüfləndiyini söyləyib:

 

“Mehman Əliyevin saxlanılmasına çox üzüldüm. Bunu görməyi arzu etməzdim. Hələlik rəsmi səbəb kimi vergi məsələsi göstərilib. Araşdırma aparılacaq. Arzu edərdim ki, obyektiv aparılsın. Ona qədərsə, məncə, Mehman bəyi içəridə saxlamağın Azərbaycana böyük zərəri var. Bu adam onsuz da heç yerə qaçan deyil. Araşdırmadan da çəkinmir. Günahı sübut ediləcəyi təqdirdə onu etiraf etməyi bacaran birisidir. Belə bir adamı içəri salıb dünyanı üstümüzə qaldırmağın mənası nədir axı?”. 

Xatırladaq ki, Azərbaycan Mətbuat Şurası da “Turan” İnformasiya Agentliyinin baş direktoru Mehman Əliyevlə bağlı Azərbaycan prezidenti İlham Əliyevə müraciət ünvanlayıb.

 

Whatsapp
Bizə yazın!
Keçid et
Hərbi gəmilər döyüşə hazır vəziyyətə gətirildi