Sabahdan etibarən Məhərrəmlik ayı başlayır. Qafqaz Müsəlmanları İdarəsi Qazılar Şurası da bununla bağlı fətva verib.
Dini Qurumlarla İş üzrə Dövlət Komitəsinin sədr müavini Gündüz İsmayılov Modern.az-a açıqlamasında Məhərrəmlik ayı ilə bağlı komitənin görəcəyi tədbirlərdən danışıb:
“Dini Qurumlarla İş üzrə Dövlət Komitəsi Məhərrəmlik ayının başlanması ilə əlaqədar Qafqaz Müsəlmanları İdarəsi (QMİ) ilə birlikdə əvvəlcədən hazırlıq işləri görür. Bilirsiniz, bu yaxınlarda bununla bağlı QMİ-nin fətvası olub. Bu baxımdan Məhərrəmlik ayının başlanması ilə bağlı hər il olduğu kimi bu il də Dini Qurumlarla İş üzrə Dövlət Komitəsində tədbirlər planı işlənib hazırlanır.
Həmin tədbirlər planına uyğun olaraq işlərimizi Məhərrəmlik ayı başlamamışdan öncə görürük. Dini icmalar, din xadimləri, eyni zamanda dindarlarla müvafiq izahatlar aparırıq. Bu izahatlar əsasən iki istiqamətdədir. Birincisi, maarifləndirici, ikincisi isə qanunun müvafiq tələblərinin izahı ilə bağlıdır. Bu istiqamətdə bütün işlər aparılıb və din xadimləri, dini icma sədrləri məsələ ilə bağlı kifayət qədər məlumatlıdırlar. Bizim fəaliyyətimiz əsasən Məhərrəmlik ayında bütün mərasimlərin qanunvericilik çərçivəsində təşkilinə, Azərbaycan xalqının, İslam dininin yüksək mədəni normalarına uyğun keçirilməsinə yönəlib”.
G.İsmayılov qeyd edib ki, bununla əlaqəli tədbirlər Məhərrəmlik ayının sonuna qədər davam edəcək:
“Eyni zamanda əsas məqsədlərimizdən biri QMİ-nin fətvasında göstərilən tövsiyələrə əməl olunması ilə bağlıdır. Bu istiqamətdə idarə ilə birlikdə işlərimizi Məhərrəmlik ayının sonuna qədər davam etdirəcəyik. Hər il bu sahədə irəliləyişlər göz qabağında olur. İnanırıq ki, bu il də Məhərrəmlik ayında keçirilən istər Aşura mərasimləri, istərsə də təziyə mərasimləri ilə bağlı əvvəlki illərə nisbətən müsbət nəticələr əldə olunacaq”.
Qeyd edək ki, Məhərrəmliklə bağlı QMİ-nin fətvasında deyilir ki, Hicri-qəməri təqvimi ilə 1438-ci il başa çatır. Yeni Hicri 1439-cu ilin başlanğıcı – Məhərrəm ayının 1-i Miladi təqvimlə 2017-ci il sentyabrın 22-nə təsadüf edir.
Bu il Aşura günü oktyabrın 1-nə təsadüf edəcək.