Milli Məclisdə 2018-ci il dövlət büdcəsinin layihəsi ilə bağlı müzakirələr başa çatdıqdan sonra sənəd hökumətə təqdim olunub. Hökumət deputatların təkliflərinə Milli Məclisin dekabrın 1-də keçiriləcək iclasında cavab verəcək.
Maraqlıdır, deputatlar 2018-ci il dövlət büdcəsinin layihəsi ilə bağlı hansı təkliflər irəli sürürlər?
Modern.az saytı bu sualla bir neçə parlamentariyə müraciət edib.
51 saylı Qusar seçki dairəsindən deputat Azər Badamov deyir ki, 2018-ci ilin dövlət büdcəsi layihəsi bu günün reallıqlarına uyğun və gələn ilin çağırışlarını nəzərə alınaraq hazırlanıb:
“Reallığımız odur ki, dövlət başçımızın apardığı düşünülmüş sosial-iqtisadi siyasəti sayəsində geniş spektirli iqtisadi islahatlara start verilib, iqtisadiyyatın neftdən asıllığını aradan qaldırılması istiqamətində atılmış addımlar öz nəticəsini verməyə başlayıb, manatın məzənnəsi xarici valyutalar qarşısında sabitləşib və 2017-ci ildə Azərbaycanda makroiqtisadi sabitlik təmin olunub. 2018-ci ilin dövlət büdcəsi layihəsində xərclərin 33,5% -nin sosialyönümlü olması onu göstərir ki, dövlət siyasətimizin təməlində Azərbaycan vətəndaşı durur və insanların rifahının yaxşılaşdılması dayanır. Düşünürəm ki, 2018-ci ildə ölkəmizdə sənayeləşmə prosesi sürətlənəcək, yeni müəsisələrin açılışları olacaq və gələcək illərdə dövlət büdcəmizin daha da çox artımlarla layihələşdirilməsinə imkanlar yaranacaq.
Sənaye müəsisələrin açılışı istiqamətində regionlarda emal sənayesinin inkişaf etdirilməsinin də əhatə olunmasına böyük ehtitac var. Müstəqilliyimizin ilk illərində regionlarda yerləşən emal müəsisələri özəlləşdirilib, lakin hər bir infrastrukturu olmasına baxmayaraq illərdir ki, istifadə olunmur və dağılmış vəziyyətdədir. Belə müəsisələr təmsil olunmduğum Qusar rayonda da var. Çox təəsüf ki, zavodları özəlləşdirmiş şəxslər nəinki bu müəsisələri istifadə etmir, hətta dirçəltmək istiqamətində heç bir addım da atılmır. Dövlət başçımızın aqrar sektora yüksək diqqətlə yanaşdığı və kənd təsərrüfatının süətlə inkişaf etdiyi bir zamanda emal zavodların dirçəldilməsinə ehtiyac var. Zavodları almış şəxslərin qabağında şərt qoyulmalıdır ki, ya özləri işlətsinlər və ya da geri alınaraq işlədə bilmək bacarığı olan sahibkarlara verilsin. Əgər həmin müəssisələrin iş fəaliyyəti bərpa edilərsə, bu, həm regionlarda yeni iş yerləri deməkdir, həm də ixracyönümlü məhsullarının istehsalı olmaqla dövlət büdcəsinə gələcək gəlirlərin yeni mənbəyi olardı”.
Deputat deyib ki, mədəniyyətin inkişaf etdirilməsi istiqamətində müvafiq addımlar atılmalıdır:
“Mədəniyyətimizin inkişafı və dünyada tanıdılmasında 1-ci vitse-prezdent Mehriban xanım Əliyevanın əməyi əvəz olunmazdır. Ona görə də biz mədəniyyətin inkişafına xüsusi yanaşma etməliyik və ayrılan vəsaitlərə yenidən baxmalıyıq. Qeyd etmək istəyirəm ki, rayonlarda yerləşən mədəniyyət şöbələri 2017-ci ildən regionlaşdırılıb. Bu yaxşı haldır. Amma vəsaitin azlığından regionlarda müəyyən ixtisarlar həyata keçirilib. Məsələn, təmsil olunduğum Qusar rayonunda 2017-ci ildə 4 kənd kitabxanasının və 3 kənd mədəniyyət evinin fəaliyyəti dayandırılıb. Bu da 17 nəfər mədəniyyət işçisinin ixtisar edilməsilə, yəni 27 min manat əmək haqqı fonduna qənaət etdirilməsiylə nəticələnib. Əgər mədəniyyət işçilərinin böyük məvacib almadığını da nəzərə alsaq, kənd yerində 17 nəfərin işsiz saxlamasına nə ehtiyac var? Bu, dövlət büdcəmiz üçün böyük vəsait də deyil. Biz kitabxana və mədəniyyət evlərini ixtisar yox, təmir edib müasirləşdirməliyik. Çünki, mədəniyyət evləri və kitabxanalar insanların intelekt səviyyəsinin, mədəniyyətin inkişafına xidmət edir. Hörmətli maliyyə və mədəniyyət nazirimizdən bu istiqamətə diqqət yetirmələrini xahiş edirəm”.
64 saylı Sabirabad ikinci seçki dairəsinin deputatı Rüstəm Xəlilov deyib ki, 2018-ci il üçün dövlət büdcə layihəsi müvafiq qanunauyğun olaraq hazırlanıb.
“Büdcə layihəsi vətəndaşların yaşayış vəziyyətinin yaxşılaşdırılması və sosial yönümlüdür. Növbəti ildə qeyri-neft sektorunun gəlirlərinin bu illə müqayisədə 20 faiz artması nəzərdə tutulub. Bu, ölkə iqtisadiyyatımızın inkişafının göstəricisidir. Dövlət başçısının tapşırığına əsasən, iqtisadiyyatın neftdən asıllığını aradan qaldırılması istiqamətində addımlar atılıb və manatın məzənnəsi xarici valyutalar qarşısında sabitləşib. Həmçinin, prezident İlham Əliyevin rəhbərliyilə quruculuq işlərinin davam etdirilməsi, ipoteka kreditlərinin faiz dərcələrinin aşağı salınması istiqamətində atılan addımlar, aztəminatlı ailələr üçün sosial evlərin inşası, yeni iş yerlərinin açılması müsbət hallardır.
Gələn ilin büdcəsində ipoteka ilə bağlı artım isə onu özündə ehtiva edir ki, insanlar güzəştli ipoteka şərtləri ilə yeni mənzillərə sahib ola biləcəklər. Mən bunu çox müsbət qiymətləndirirəm. Bildiyimiz kimi, 2017-ci ildə “Əsrin müqaviləsi”nin müddəti 2050-ci ilə qədər uzadıldı, Bakı- Tbilisi- Qars layihəsi reallaşdı. Sözügedən layihələrin həyata keçirilməsi ölkəmizdə gəlirlərinin artmasına, turizmin inkişafına və digər sahələrə müsbət təsir göstərəcək. Bu baxımdan düşünürəm ki, dəmiryolu sisteminin müasirləşməsi, müvafiq strukturun yaradılması ilə bağlı vəsaitin artırılmasına ehtiyac var. Son illər ölkə başçısının tapşırığına əsasən, Sabirabad rayonunda da quruculuq, yenidənqurma işləri aparılır. Artıq “H” kanalının birinci hissəsi uğurla yenidən qurulub, istifadəyə verilib. Bu kanalın istifadəyə verilməsində əsas məqsəd kəndlərin su təminatını yaxşılaşdırmaq və əkin yerlərinin suvarılmasını təmin etməkdir. Həmçinin, 2017-ci il ərzində rayonda şəhərdaxili yolların çəkilməsi, yenidən qurulması, yeni su və kanalizasiya xətlərinin çəkilməsi istiqamətində də işlər aparılıb. Bu işlər növbəti ildə də davam etdiriləcək. Sonda isə onu deyə bilərəm ki, 2018-ci ilin dövlət büdcəsi layihəsi ölkəmizin bu günün reallıqlarına uyğun və gələn ilin çağırışlarını nəzərə alınaraq hazırlanıb”.
63 saylı Sabirabad birinci seçki dairəsindən deputat Elçin Quliyev bildirib ki, 2018-ci ilin dövlət büdcəsi layihəsi mükəmməl hazırlanıb.
“Mən gələn ilin dövlət büdcəsindən Sabirabad rayonuna əlavə vəsaitin ayrılmasını təklif edirəm. Belə ki, Sabirabad rayonuna yeni su xətləri çəkilib. Amma vəsait çatışmazlığından kanalizasiya çəkilməyib. Mən hökumətdən xahiş edirəm ki, gələn ilin büdcəsində konkret olaraq Sabirabadda müasir şəhərdaxili kanalizasiyanın çəkilişi nəzərdə saxlanılsın. Həmçinin, şəhərdaxili su xətlərinin çəkilişi zamanı yolların asfalt örtüyü dağılıb. Bu problemin də həll olunması üçün növbəti ilin dövlət büdcəsindən vəsaitin ayrılmasını təklif edirəm. Dövlətin qayğısı ilə son illər əkin sahələrinin su təminatını yaxşılaşdırmaq üçün müəyyən işlər görülür. Böyük bir ərazidə kəndlərin su təminatını yaxşılaşdırmaq üçün dövlət başçısının tapşırığı ilə “H” kanalının birinci hissəsi uğurla yenidən qurulub. Təklif etdim ki, Sabirabad rayonun Sərxanbəyli, Moranlı, Balahəşimxanlı, Əlləmbəyli kəndlərinin əkin sahələrinin suvarılması üçün “H” kanalının ikinci hissəsinin tikintisi üçün büdcədən vəsait ayrılsın”.
