Modern.az

“Artur Rasizadə nazirlərdən daha əlçatandır” - Ambisiyasız Baş nazir, iddialı nazirlər...

“Artur Rasizadə nazirlərdən daha əlçatandır” - Ambisiyasız Baş nazir, iddialı nazirlər...

18 Dekabr 2017, 11:23

Baş nazir Artur Rasizadə "Azərbaycan Respublikası Nazirlər Kabineti Aparatının strukturunun ştat cədvəli”ndə dəyişiklik edilməsi barədə qərar imzalayıb. Dəyişikliyə əsasən, Baş nazirin köməkçilərinin sayı 7-dən 3-ə endirilib. Baş nazirin köməkçilərinin sayının azaldılması Nazirlər Kabinetinin ləğvi barədə fikirlərə yol açıb.

Məsələ ilə bağlı Milli Məclisin deputatı Zahid Oruc Modern.az-a deyib ki, Nazirlər Kabinetinin strukturunda müəyyən dəyişikliklərin aparılması zamanın çağırışıdır:


“Çünki ayrı-ayrı sahələr üzrə dəyişikliklər edilib. Eləcə də Baş nazirin köməkçilərinin sayı azaldılıb. Bu o anlama gəlir ki, həmin sahələr üzrə fəaliyyətin daha ciddi koordinasiya olunmasına ehtiyac var. Digər tərəfdən, bu, qətiyyən Baş nazirin səlahiyyətlərinin azaldılması anlamına gəlmir. Çünki hər biriniz şahidsiniz ki, Artur Rəsizadə dövlətə, millətə sədaqətlə çalışıb. Bu illər ərzində onu fərqləndirən ən mühüm xüsusiyyətlərdən biri xüsusi ambisiyalara yol vermədən dövlətin mənafeyini əsas götürərək, öhdəliyinə düşən vəzifələri yerinə yetirməyə çalışıb. Bildiyiniz kimi, bu strukturun tərkibində ayrı-ayrı nazirlərin müxtəlif dövrlərdə ölkə əleyhinə, dövlətçiliyin mənafeyi ziddinə fəaliyyətləri olduğu təqdirdə, Artuz Rəsizadə öz sabit mövqeyini qoruyub saxlayıb, prezidentə sədaqətlilik və əsas strateji hədəflər uğrunda fəaliyyətini davam etdirmək xəttindən kənara çıxmayıb. Ona görə də ölkə rəhbəri tərəfindən də hər zaman Baş nazirə yüksək ehtiramı müşahidə edirik. Bu, çox önəmli məsələdir. Çünki müxtəlif vəzifə sahibləri ayrı-ayrı ölkələrin timsalında bəzən fərqli mənafe savaşlarına yol açır, onların maraq konfliktlərini tənzimləmək o qədər də asan olmur. Ən fərqli səviyyələrdə verilən məxfi yaxud açıq informasiyaları təhlil edərək düzgün qərarlar qəbul etmək o qədər də sadə deyil. Biz çox yaxşı bilirik ki, hökumət strukturunda təmsil olunan insanlar müxtəlif dünyagörüşünə malikdirlər, baxışları fərqlidir. Bu səbəbdən də köməkçilərin sayının artırılıb-azaldılması onun fəaliyyətinə hər hansı təsir göstərmir. Önəmli iş ondan ibarətdir ki, cəmiyyətin tələblərinə, istəklərinə adekvat cavab versin”.

 

Deputat nazir postlarında baş verən dəyişikliklərə də münasibət bildirib:


“Dövlət rəhbəri hökumətin tərkibində xeyli dəyişikliklər edib. Bunların hamısı büdcə vəsaitlərinin şəffaf xərclənməsindən tutmuş hesabatlılıq, xalq qarşısında məsuliyyətin daşınması, maliyyə ünvanlılığının təmin edilməsi üçün mexanizmlərin və s.-nin yaradılması məsələlərini əhatə edir. Hər kəsə bəllidir ki, prezidentli respublika üçün əsas qərarlar dövlətin birinci şəxsi tərəfindən verilir. Belə olan təqdirdə hökumətin üzərinə daha fərqli işlər düşür. Burada vacib məqam odur ki, müxtəlif hakimiyyət qollarının arasında o əlaqələri düzgün qoruyub saxlayasan, mənafe davalarına yol verməyəsən, intriqalara meydan açmayasan. O biri yandan da heç şübhəsiz ki, dünən qayğıları fərqli idi, bu gün tamam fərqlidir. Düşünürəm ki, Artur müəllimin soyuqqanlılığı ötən fərqli dövrlər ərzində öz xidmətlərini yerinə yetirməyə imkan verib”.


Z.Oruc Artur Rasizadənin parlament üzvləri üçün də əlçatan bir insan olduğunu qeyd edib:

“Əgər mühüm dövləti görüşlər, xarici qonaqların qəbulu yoxdursa, istənilən parlament üzvü, qarşısında hər hansı bürokratik zireh görmədən Baş nazirlə görüşə, istənilən məsələ ilə bağlı müzakirə apara bilir. Geniş kabinetlər içərisində dövlət ədəb-ərkanını göstərmək baxımından biz, o insandan çox yaxşı davranışlar görmüşük. Bunlar hər kəs üçün çox əhəmiyyətlidir. İnsanlar adətən vəzifə pillələrində yanlışlığa yol verə bilirlər ki, bu da onların faciələrini doğurur. Amma Artur Rəsizadə tamam fərqlidir”.

 

Deputat vitse-prezidentlik institutunun tam fəaliyyətindən sonra Nazirlər Kabinetinin buraxılacağı iddialarını belə cavablandırıb:


“Mən hesab edirəm ki, vitse-prezidentlik institutu çox uğurlu şəkildə dövlət idarəetmə sisteminin fəaliyyətini gücləndirəcək. Nazirlər Kabineti hər zaman olacaq. Burada heç bir paralelçilikdən, yaxud hər hansı şəkildə dövlətin birinci şəxsi tərəfindən verilən qərarların yerinə yetirilməsində qarışıqlıqdan söhbət gedə bilməz. Amma vitse-prezidentlik institutunun Nazirlər Kabinetinə qarşı qoyulması və bunun idarəetmə sistemində böhran kimi qələmə verilməsi, yaxud Nazirlər Kabinetinin bu əsasla ləğv edilməsi haqqında baxışları düzgün saymıram. Ali icra orqanı sistemi kimi Amerika Birləşmiş Ştatlarında da federal bir ölkə modelindən çıxış olunur. Burada da nazirlər və hökumət üzvləri mövcuddur. Baxmayaraq ki, hər bir ştat özünün ayrıca qanunverici, məhkəmə və idarəetmə orqanlarına malikdir.

 

Azərbaycan unitar quruluşdadır. Belə olan təqdirdə mütləq dövlət başçısının yürütdüyü siyasəti məhz Nazirlər Kabineti sayəsində gerçəkləşdirmək mümkündür. Ona görə də bu strukturu ləğv edərək yalnız dövlət başçısı yanında fəaliyyət göstərən hər hansı qurumlar üzərindən fəaliyyətin tənzimlənməsi qeyri-mümkündür. Biz hökumətin fəaliyyətində ayrı-ayrı sahələr üzrə mövcud olan problemlərin aradan qaldırılmasını təklif etməklə yanaşı, bunu  Nazirlər Kabinetinin ləğvi qənaətilə yekunlaşdırmaq yanlışdır”.

Telegram
Hadisələri anında izləyin!
Keçid et
Ukraynadan Rusiyaya ardıcıl zərbələr: Vəziyyət kritikdir