"Boko Haram" radikal qruplaşması silahlılarının hücumundan sonra 105 məktəbli itkin düşüb. Modern.az xarici mediaya istinadən xəbər verir ki, radikal qruplaşma bu dəfə Nigeriyanın şimal-şərqindəki Yobe ştatının Dapçi kəndini hədəf seçib.
Məktəbli qızların valideynlərinin verdiyi məlumata görə, itmiş qızların siyahısı tərtib edilib: "Siyahıda 105 nəfərin adı var”.
Məktəblilərin valideynlərinin qrup rəhbəri Bəşir Manzo bildirib ki, hakimiyyət orqanları əvvəlcə "Boko Haram" döyüşçüləri tərəfindən məktəbli qızların oğurluğu faktını inkar edib: "Bununla əlaqədar olaraq biz onların azad olunması üçün birlikdə hərəkət etməyə qərar verdik".
Nigeriya hakimiyyəti itmiş qızların sayı haqqında rəsmi məlumatı hələ elan etməyib. Məktəb fevralın 19-da hücuma məruz qalıb. İtmiş məktəblilərin yeri indiyədək naməlumdur.