22 aprel 2018, Bazar
Ana Səhifə - CƏMİYYƏT - Eldar Həsənovdan İlyas İsmayılovun cəsarətli addımı ilə bağlı ŞOK ETİRAF
Eldar Həsənovdan İlyas İsmayılovun cəsarətli addımı ilə bağlı ŞOK ETİRAF
15.03.2018, 23:56
Maraqlı fikirlərinə və obyektiv mülahizələrinə həmişə ehtiyac duyduğumuz və mətbuatda tez-tez görünməyi sevməyən, sözünün yerini və dəyərini bilən hörmətli ziyalımız, tanınmış hüquqşünas, peşəkar səfirimiz Eldar Həsənova, həmkarı, Azərbaycanın görkəmli şəxsiyyətlərindən biri İlyas İsmayılovun 80 illik yubileyi ilə bağlı təbrik göndərməsi xahişimizi böyük məmnuniyyətlə qəbul etdiyinə görə təşəkkürümüzü bildiririk. Eldar müəllimin özünəməxsus dəsti xəttinə sadiq qalaraq yazdığı səmimi təbrik mətnində İlyas müəllimin layiq olduğu xoş və obyektiv sözlərlə yanaşı Azərbaycanın yaxın tarixi ilə bağlı maraqlı və indiyə qədər səsləndirilməyən fikirlər və faktlar da yer aldığından, mətni olduğu kimi oxucularımızın diqqətinə çatdırmağı qərara aldıq. Ümumiyyətlə, Eldar müəllimin özündən əvvəl və sonrakı həmkarlarının, birgə çalışdığı, yaxından tanıdığı insanların şəxsiyyətini və xidməti fəaliyyətini bu qədər səmimi və obyektiv dəyərləndirməsi, həm də məmur etikası və mədəniyyəti baxımından təqdirəlayiq bir örnəkdir. 
 
 
 
Ədalətli insan İlyas İsmayılov...

 
Ədalət ... şərəflə yaşamaq, başqasına ziyan vurmamaq, 
hər zaman hər kəsə haqqı olanı verməkdir. 
Qədim Roma hüquqşünası Ulpian
 
 
Xalqımızın dəyərli ziyalısı, tanınmış hüquqşünas alimi İlyas İsmayılovun adı gələndə, onun haqqında ağıla gələn ilk və ən önəmli fikir İlyas müəllimin adil və qətiyyətli insan olmasıdır. Şərəfli həyat yolu keçmiş İlyas müəllim, həm prokurorluq və ədliyyə orqanlarında çalışdığı dövrlərdə, həm də elmi yaradıcılıq sahəsində öz dərin savadı, dəst xətti və prinsipiallığı ilə hər zaman seçilmişdir. İlyas müəllim, öz müstəqil, obyektiv və cəsarətli mövqeyi ilə tanınan hüquqşünas alim olmaqla bərabər, hər bir insanın, ələlxüsus məhkəmə hakimiyyəti və hüquq-mühafizə orqanlarında çalışan şəxsin yaşatmalı və qorumalı olduğu əvəzsiz nemətlərdən biri kimi, ədalət prinsipini öz fəaliyyətində daima, o cümlədən ikinci dəfə müstəqillik qazanmış Azərbaycan Respublikasının ilk ədliyyə naziri, sonralar millət vəkili və ictimai-siyasi dövlət xadimi kimi fəaliyyəti zamanı da qətiyyətlə müdafiə etmişdir. 
Bununla yanaşı, hələ ötən əsrin 80-90-cı illərində ictimai-siyasi mühitin çox mürəkkəb və keşməkeşli dövründə Azərbaycan SSR Prokurorluğunda rəhbərliyi dönəmində, hətta SSRİ Baş Prokurorluğunda çalışdığı müddətdə İlyas müəllim milli vətənpərvərlik hisslərinə də sadiq qalmışdır.   
Ədalətliliklə yanaşı, İlyas müəllim, onun şəxsiyyətini önə çıxaran digər bir önəmli və dəyərli keyfiyyətini – cəsarətliliyini və mərdliyini də o çətin dövrlərdə qoruyub saxlaya, hətta heç nədən çəkinmədən nümayiş etdirə bilmişdir. 
 
Bununla bağlı bir tarixi faktı xatırlatmaq istərdim. 1988-ci ildə  Azərbaycan rəhbərliyinin xahişi və Mixayil Qorbaçovun göstərişi ilə Azərbaycana Moskvadan “əliyevçilər”lə bağlı 162 nəfərlik əməliyyat istintaq qrupu göndərilmişdi. Qrupa SSRİ daxili işlər nazirliyindən general Aslambek Aslaxanov, SSRİ Baş prokurorunun müavini Aleksandr Katusev və Azərbaycan SSR-in daxili işlər nazirinin birinci müavini Viktor Barannikov rəhbərlik edirdilər. O vaxt Bakıya gələn əməliyyat istintaq qrupunun fəaliyyəti heç bir qanuni, hüquqi normaya sığmayan üsul və metodlarla aparılırdı. Məqsəd hansı yolla olursa - olsun Heydər Əliyevə və onun ən yaxın ətrafına qarşı ifadələr almaq, təqsirləndirici materiallar toplamaq idi. Həbs olunanlar hamısı Şüvəlanda yerləşən istintaq təcridxanasında ayrıca korpusda saxlanılırdılar və onlara qarşı əməliyyat-istintaq qrupu tərəfindən hər cür işgəncə və amansızlıq tətbiq edilirdi. O zaman bu özbaşınalığın və qanunsuzluğun qarşısını almaq üçün ilk dəfə olaraq öz rəsmi etirazını bildirən şəxs Azərbaycan SSR prokuroru İlyas İsmayılov oldu. İlk dəfə İlyas müəllim açıq və cəsarətli şəkildə öz mövqeyini ortaya qoydu və bu qanunsuzluğun qarşısının alınmasını tələb etdi. Bu addım həmin dövrdə SSRİ miqyasında bir məmurun sərgilədiyi görünməmiş bir cəsarət idi. Onu da qeyd etməliyəm ki, istintaq qrupunun Heydər Əliyevə qarşı ifadələri qanunsuz üsullarla toplamasını ilk dəfə sənədləşdirən və bu barədə İlyas İsmayılovu məlumatlandıran, ona müraciət edən o zaman İslah Əmək Müəssisələrinin Baş idarəsinin rəisi olan peşəkar əməliyyatçı, cəsarətli polkovnik Əzim Piriyev olmuşdur. İlyas İsmayılov bu məlumatı alan kimi dərhal həmin təhqiqat materiallarını tələb etmiş və 1989-cu ilin mayında öz imzası ilə SSRİ əməliyyat-istintaq qrupunun qanunsuz əməllərinə qarşı cinayət işi başlatmışdır. O dövrdə İlyas müəllimin bu cəsarətli qərarı SSRİ miqyasında böyük sensasiyaya səbəb olmuşdu. SSRİ-nin tabeliyində olan bir respublika prokurorunun İttifaqın əməliyyat-istintaq orqanlarının əməkdaşlarına qarşı cinayət işi başlatması o dövrün ən böyük məmur, özü də yüksək çinli vəzifəli məmur cəsarəti idi. Nəzərə alaq ki, o dövrlərdə SSRİ Daxili İşlər Nazirliyi və Baş Prokurorluğunun istintaq əməliyyat qrupu Özbəkistanda heç bir müqavimətə rast gəlmədiyindən öz qərəzli və məqsədli istəklərinə tam nail oldular. 
 
Qeyd edim ki, 1997-ci ildə müəyyən zərurət yarandığından bu hadisə ilə bağlı Ulu Öndər Heydər Əliyevə ətraflı məruzə edib təhqiqat sənədlərinin və cinayət işi başlanma qərarının nüsxələrini təqdim edəndən sonra o, məsələdən xəbəri olsa da hadisələrin və İlyas müəllimin cəsarətinin bu miqyasda olduğunu bilmədiyini söylədi. Bu hadisə ilə bağlı, bir məsələni də demək yerinə düşər ki, 1988-1990-cı illərdə SSRİ-nin Baş prokuroru olmuş Aleksandr Yakovleviç Suxarev 1998-ci ildə Azərbaycan prokurorluq orqanlarının 80 illik yubileyi ilə bağlı tədbirlərdə iştirak üçün Bakıda səfərdə olanda Prezident Heydər Əliyev onun və mənim iştirakım ilə keçirilən görüşü zamanı (sonra onlar təkbətək bir neçə saat söhbət etdilər) nə üçün 1989-cu ildə Qorbaçovun göstərişinə rəğmən Baş prokuror kimi onun həbsi ilə bağlı qərar vermədiyini Suxarevdan birbaşa soruşdu və A.Y.Suxarev ona belə bir cavab verdi: “Mən sizə indi deyə bilərəm ki, ciddi göstərişə rəğmən mən bunu etmədim, amma bu yanlış olar. Əslində, həmin dövrlərdə qəbul etdiyiniz qərarlar, imzaladığınız sənədlər, verdiyiniz göstərişlər araşdırılarkən hər hansı qanunazidd faktın aşkar olunmasına nail ola bilmədik. Çünki, bütün qərarlar və sərəncamlar əsasən qanun və yüksək dövlət məmurunun məsuliyyəti çərçivəsində verilmişdir, imzalanmışdır. Amma Azərbaycana ezam olunmuş əməliyyat istintaq qrupu daxil olmuş ərizə və şikayətlər üzrə  konkret təlimat almışdı və bu təlimatı yerinə yetirmək üçün imkanları da var idi. Bunun üçün Azərbaycanda şərait də yaradılmışdı, konkret materiallar da verilmişdi. Onların öz xidməti vəzifələrinin sona qədər yerinə yetirə bilməsinin, məqsədlərinə çatmamalarının yeganə əsas səbəbi İlyas İsmayılovun Bakıya gəlmiş əməliyyat istintaq qrupunun barəsində başladığı cinayət işi oldu. Məhz bu səbəbdən mənəvi-psixoloji zərbə alan qrup üzvləri ehtiyatlanaraq Sizin həbsiniz üçün bizə lazım olan materialı və sübutları toplaya bilmədi, verə bilmədi. Beləliklə də mən Mixail Qorbaçova hüquqi əsas olmadığından Heydər Əliyevin həbsi ilə bağlı qərar verə bilməyəcəyimi rəsmi bildirdim. Sözsüz ki, Mixail Qorbaçov mənim qərarımdan məmnun qalmadı. Heydər Əliyeviç, bunlar tarixdir, faktdır, həqiqətdir, amma bu gün şükürlər olsun hər ikimiz də görüşürük, həyatdayıq, hətta Mixail Qorbaçov da sağdır. Siz isə öz müstəqil ölkənizdə prezidentsiniz.” Bu an Heydər Əliyev, dərindən nəfəs alıb fikrə getdi... Sonra onlar baş-başa qaldılar...
 
Düşünürəm ki, tarixə çevrilmiş bu epizod İlyas müəllimin qanunun aliliyinə və ədalət mühakiməsinin adilliyinə hər zaman verdiyi önəmin göstəricisi olmaqla yanaşı, onun ədaləti təmin etmək üçün zəruri olan qətiyyət, cəsarət və mərdliyi çəkinmədən ortaya qoymaq keyfiyyətini də bir daha sübut etmiş olur. Onu da qeyd etmək yerinə düşər ki, nə Heydər Əliyevin prezidentliyi dövründə, nə də ondan sonra, hətta bu günə qədər belə, İlyas İsmayılov qəbul etdiyi bu cəsarətli qərarı heç vaxt dilinə gətirmədi, başqaları kimi istifadə etmədi. Etiraf edək ki, hamımıza yaxşı məlum olan müasir zəmanəmizdə bu hər kəsə xas olmayan nadir insani dəyərdir, ləyaqətdir, qürurdur! Elə deyilmi?!!! 
Bu ləyaqətinə, ədalətli, obyektiv və cəsarətli dövlət məmuru keyfiyyətlərinə görə, heç də sadə olmayan siyasi proseslərə baxmayaraq mərhum Prezident Heydər Əliyevin, İlyas İsmayılova qarşı şəxsi hörmət bəsləməsinin də, o illərdə, şahidi olmuşam. 
 
İlyas İsmayılov qeyd etdiyim keyfiyyətləri ilə yanaşı, həm də yüksək əxlaq və mədəniyyət sahibidir. Ümummilli lider Heydər Əliyev dünyasını dəyişəndə, müxalifət partiyalarının rəhbərlərindən biri kimi İlyas İsmayılovun yas mərasiminə gəlməsi, onun, milli adət-ənənələrimizə, iqtidar-müxalifət münasibətlərində siyasi mədəniyyət, ədəb-ərkanın gözlənilməsinə verdiyi dəyərin, önəmin göstəricisidir. Mən bu ləyaqətli hərəkəti ilk dəfə o zaman Prezident Heydər Əliyev rəhmətlik Əbülfəz Elçibəyin yas mərasiminə gələrək, mərhumun ailə üzvlərinə baş sağlığı verəndə və onlara səmimi qayğı ilə yanaşanda görmüşəm.       
 
Yeri gəlmişkən, hər bir azərbaycanlı xalqımızın tarixlər boyu qoruyub saxladığı, yaşatdığı və bizə əmanət etdiyi mənəvi-əxlaqi dəyərlərə, milli adət-ənənələrimizə öz əməli, davranışı və sözü ilə ləyaqətlə, şərəflə əməl etməlidir. Əfsuslar olsun ki.....
 
Prokurorluq və ədliyyə orqanlarında işlədiyi müddətdə, İlyas müəllim, həmçinin çoxsaylı kadrların yetişməsində müstəsna rol oynamışdır. Yetişdirdiyi həmkarları da İlyas müəllim barədə təsdiqləyə biləcəkləri kimi, o, xidməti fəaliyyətində kadrları heç bir ayrı-seçkilik, yerlibazlıq, qohumbazlıq və sosial mənsubiyyətcə üstünlüyü deyil, yüksək bilik, bacarıq, iş qabiliyyəti, obyektivlik, mənəvi təmizlik kimi müsbət şəxsi keyfiyyətlərlə yanaşı vətənpərvərlik və milli təəssübkeşlik cəhətlərini nəzərə almaqla qiymətləndirmiş, belə əməkdaşları müxtəlif rəhbər vəzifələrə layiq bilmişdir. Tale elə gətirdi ki, hüquq-mühafizə orqanlarında çalışdığım illərdə o kadrların bir çoxu ilə işləməli, onları yaxından tanımalı oldum və bu keyfiyyətləri şəxsən gördüm. Qeyd etməliyəm ki, dünyanın hər yerində olduğu kimi ölkəmizdə də Respublika prokuroru kimi yüksək vəzifədə işləməklə, qanun keşiyində duran prinsipial bir məmur kimi xalqın rəğbətini, hörmətini qazanmaq heç də asan məsələ deyil. Çünki, burada söhbət bir çox digər peşə sahiblərindən fərqli olaraq, qanunun aliliyini təmin edən prokurordan gedir və əgər belədirsə, onda, müəyyən opponentlərin, sevməyənlərin və ya hansısa qərəzli fərdlərin olması da təbiidir. 
 
Hüquq-mühafizə orqanlarının əməkdaşlarının və şəxsən İlyas müəllimin tabeliyində çalışmış vicdanlı prokurorluq işçilərinin fikirlərinə görə ötən əsrin 80-ci illərində totalitar rejimin təhdid və təzyiqlərinin genişləndiyi və bu təzyiqlərə baxmayaraq əksinə, digər respublikalar kimi Azərbaycanda da milli dirçəliş və azadlıq hərəkatının başladığı bir dövrdə ozamankı hakimiyyət və dövlət məmurları arasında ilk dəfə “milli qeyrət” ifadəsini rəsmi çıxışlarında, yazılarında, görüşlərində dilə gətirmiş və bütün fəaliyyəti dövründə bu dəyərə sadiq qalmışdır. 
 
İlyas İsmayılovu tanıdığım vaxtdan onu daim dərin mütaliə edən görmüşəm, özü də təkcə hüquq ədəbiyyatını deyil, müxtəlif sahələrlə bağlı, xüsusilə tarixi və bədii əsərləri mütəmadi olaraq mütaliə edir. Bu səbəbdəndir ki, İlyas müəllim geniş dünyagörüşünə, zəngin elmi və ədəbi-bədii biliklərə malikdir. O, bir neçə monoqrafiyanın, çox sayda elmi əsərlərin müəllifi olmaqla yanaşı, həm də gözəl publisistdir. Azərbaycanın və dünyanın tanınmış tarixi şəxsiyyətləri haqqında yazdığı məqalələrdə böyük xidmətləri olan Camal Əbdul Nasir, Şarl de Qoll, İbn Sina, Siseron, Çingiz xan, Firudin Köçərli, Abdulla İbrahimov və s. kimi dahi şəxsiyyətlərin yalnız fəaliyyətlərindən bəhs etmir İlyas müəllim, həm də onların cəmiyyət üçün örnək ola biləcək xüsusiyyətlərini önə çəkir, insanların, xüsusilə gənclərin maariflənməsinə, onlarda vətənə sevgi hissinin aşılanmasına da töhfə verir. 
 
Məsələn, onun Şarl de Qoll haqqında yazdığı məqalədə qeyd etdiyi bir fikir, hesab edirəm ki, xüsusilə dəyərlidir: “Ən böyük qəhrəmanlığın psixoloji əsası ancaq Vətənə məhəbbət ola bilər. Hər bir insanın qiyməti cəmiyyətə, insanlara verdiyi fayda, tarixi əhəmiyyəti isə Vətən qarşısındakı xidmətləri ilə müəyyən olunur. Şəxsi ləyaqət də özündən bədgümanlıqda deyil, Vətənə vurğunluqda və bunun əməldə nümayiş etdirilməsində böyük məna kəsb edir.” 
 
İlyas İsmayılov işlədiyi dövrlərdə dövlətinə və xalqına, həmçinin həmkar və dostlarına münasibətdə sədaqətli və səmimi olduğu kimi, hansı sahədə çalışmasından asılı olmayaraq məsələlərə münasibətdə obyektiv, ədalətli mövqeyi ilə və bu mövqeyini çəkinmədən bəyan etməsi və həyata keçirməsi ilə fərqlənən prinsipial bir şəxsiyyətdir. Zənnimcə, hər bir düşüncəli insan belə ali keyfiyyətlərin cəmiyyət və dövlətçiliyimiz üçün nə dərəcədə əhəmiyyətli olduğunu etiraf edər, fərqinə varar.  İlyas müəllimin özünün də qeyd etdiyi kimi, ədalət ləyaqətin, comərdliyin və səxavətin təməlidir; ancaq ədalətli olan faydalı, səmərəli olar. Bu anlamda da əminliklə demək olar ki, İlyas müəllim ədalətli və mərd insan olaraq həm də xalqı üçün, dövləti üçün faydalı bir şəxsiyyətdir. 
 
Fürsətdən istifadə edərək, yüksək elmi bilikləri, intellektuallığı, dərin hüquqi savadı, alicənablığı və ziyalılığı ilə seçilən tanınmış hüquqşünas alim və ictimai-siyasi xadim, həmçinin vətənpərvərliyi və qətiyyəti ilə örnək şəxsiyyət - İlyas müəllimə bu yubiley günündə möhkəm can sağlığı, gözəl ailəsi ilə birlikdə xoşbəxt günlər və işlərində uğurlar arzulayıram! (Moderator.az)
 
Eldar Həsənov,
Sabiq Baş prokuror,
hüquq elmləri doktoru, professor 

xeber, parlament, ölkə, qarabağ, müsahibə, müəlliflər, təhsil, iqtisadiyyat, reportaj, gündəm, mədəniyyət, dünya, media, ədəbiyyat, fotosöhbət, Azərbaycan, xəbərlər, Russia, Turkey, Azerbaijan, Bakı, Baku

Şərh yaz

Bu kateqoriyadan olan xəbərlər
SON XƏBƏR
Qaradağda palçıq vulkanı püskürüb - FOTO
22.04.2018, 12:23

Qaradağda palçıq vulkanı püskürüb - FOTO

Sabirabadda 26 yaşlı gənc bıçaqlanıb
22.04.2018, 12:19

Sabirabadda 26 yaşlı gənc bıçaqlanıb

Polis Paşinyanı saxladı - Ermənistanda polislə aksiyaçılar arasında TOQQUŞMALAR - VİDEO
22.04.2018, 12:05

Polis Paşinyanı saxladı - Ermənistanda polislə aksiyaçılar arasında TOQQUŞMALAR - VİDEO

“Novruz Məmmədov ən əsası milli adamdır”
22.04.2018, 11:54

“Novruz Məmmədov ən əsası milli adamdır”

Nazirlik: Ermənistanın kriminal rejimi yalan və təxribat xarakterli müxtəlif məlumatlar yayır
22.04.2018, 11:30

Nazirlik: Ermənistanın kriminal rejimi yalan və təxribat xarakterli müxtəlif məlumatlar yayır

Sarkisyan və Paşinyanın görüşü nəticəsiz YEKUNLAŞDI
22.04.2018, 10:55

Sarkisyan və Paşinyanın görüşü nəticəsiz YEKUNLAŞDI

İki nəfər dənizdə batıb - SUMQAYITDA
22.04.2018, 10:36

İki nəfər dənizdə batıb - SUMQAYITDA

Binəli Yıldırım Novruz Məmmədovu təbrik etdi
22.04.2018, 10:32

Binəli Yıldırım Novruz Məmmədovu təbrik etdi

Sarkisyan istefa şərtlərini AÇIQLADI
22.04.2018, 10:02

Sarkisyan istefa şərtlərini AÇIQLADI

Oğuz silkələndi
22.04.2018, 09:53

Oğuz silkələndi

Bakı Şəhər İcra Hakimiyyətində QADIN RƏHBƏR   
22.04.2018, 09:48

Bakı Şəhər İcra Hakimiyyətində QADIN RƏHBƏR  

Abituriyentlər bu gün imtahan verir
22.04.2018, 09:47

Abituriyentlər bu gün imtahan verir

Ermənilər atəşkəsi 97 dəfə pozub
22.04.2018, 09:45

Ermənilər atəşkəsi 97 dəfə pozub

Vətəni ailədən öndə tutan QƏHRƏMAN - Kişilik NÜMUNƏSİ
22.04.2018, 09:09

Vətəni ailədən öndə tutan QƏHRƏMAN - Kişilik NÜMUNƏSİ

Səudiyyə Ərəbistanında partlayış və atışma - kral təxliyyə edildi
22.04.2018, 00:01

Səudiyyə Ərəbistanında partlayış və atışma - kral təxliyyə edildi

Siyahı YSK-ya təqdim olundu – İYİ Partiya seçkilərə qatılır
21.04.2018, 23:46

Siyahı YSK-ya təqdim olundu – İYİ Partiya seçkilərə qatılır

Yeni təyin edilən nazirlər hansı tanınmışların övladıdır?
21.04.2018, 23:20

Yeni təyin edilən nazirlər hansı tanınmışların övladıdır?

Həmyerlimizlə xal itirən şahmat "hökmdarı" mətbuat konfransına gəlmədi
21.04.2018, 22:48

Həmyerlimizlə xal itirən şahmat "hökmdarı" mətbuat konfransına gəlmədi

Qarlı dərəyə düşmüş avtomobildəki 6 nəfər xilas edilib
21.04.2018, 22:43

Qarlı dərəyə düşmüş avtomobildəki 6 nəfər xilas edilib

Vəzifəsiz qalan Abid Şərifov danışdı:
21.04.2018, 22:10

Vəzifəsiz qalan Abid Şərifov danışdı: "Sədaqətlə xidmət edəcəm"

Bakı-Moskva reysi ilə uçan təyyarə məcburi eniş etdi
21.04.2018, 21:58

Bakı-Moskva reysi ilə uçan təyyarə məcburi eniş etdi

Ermənistan prezidenti müxalifət lideri ilə görüşüb
21.04.2018, 21:50

Ermənistan prezidenti müxalifət lideri ilə görüşüb

Yeni Baş nazirin hökuməti - Təyinat olan və olmayan bütün VƏZİFƏLƏR
21.04.2018, 21:41

Yeni Baş nazirin hökuməti - Təyinat olan və olmayan bütün VƏZİFƏLƏR

Moskvada güclü qasırğa -  2  ölü, 17  yaralı
21.04.2018, 21:23

Moskvada güclü qasırğa -  2  ölü, 17  yaralı

Şimali Koreya bu gündən bütün nüvə sınaqlarını dayandırır
21.04.2018, 21:17

Şimali Koreya bu gündən bütün nüvə sınaqlarını dayandırır

Xərçəngin diaqnostikası üçün xüsusi mikroskopu hazırlandı
21.04.2018, 21:03

Xərçəngin diaqnostikası üçün xüsusi mikroskopu hazırlandı

Deputatların sayı azaldı - SƏBƏBLƏR
21.04.2018, 20:42

Deputatların sayı azaldı - SƏBƏBLƏR

Gənc nazirin uğurlu karyera yolu - DOSYE 
21.04.2018, 20:31

Gənc nazirin uğurlu karyera yolu - DOSYE 

Yeni nazirin 38 yaşı var - Bioqrafiya
21.04.2018, 20:18

Yeni nazirin 38 yaşı var - Bioqrafiya

Dmitri Medvedev yeni Baş nazir Novruz Məmmədovu təbrik etdi
21.04.2018, 20:07

Dmitri Medvedev yeni Baş nazir Novruz Məmmədovu təbrik etdi

Hacıbala Abutalıbov, İnam Kərimov və Samir Nuriyev vəzifəsindən azad EDİLDİ - SƏRƏNCAM
21.04.2018, 19:39

Hacıbala Abutalıbov, İnam Kərimov və Samir Nuriyev vəzifəsindən azad EDİLDİ - SƏRƏNCAM

Novruz Məmmədov şöbə müdiri vəzifəsindən azad olunub
21.04.2018, 18:50

Novruz Məmmədov şöbə müdiri vəzifəsindən azad olunub

Abutalıbov baş nazirin müavini oldu
21.04.2018, 18:10

Abutalıbov baş nazirin müavini oldu

Bəzi nazirlik və komitələrə rəhbər təyin olunmadı - ADLAR
21.04.2018, 17:55

Bəzi nazirlik və komitələrə rəhbər təyin olunmadı - ADLAR

Bu məmurlar vəzifəsini itirdi – Səlim Müslümov, Heydər Əsədov, Abid Şərifov, Əli Həsənov, Elçin Əfəndiyev, İsmət Abbasov...
21.04.2018, 17:44

Bu məmurlar vəzifəsini itirdi – Səlim Müslümov, Heydər Əsədov, Abid Şərifov, Əli Həsənov, Elçin Əfəndiyev, İsmət Abbasov...

ARXİV
SORĞU
Ali məktəblərə qəbul imtahanlarının qiymətlərinə necə baxırsınız?
İmtahan qiymətləri çox yüksəkdir(10.2%)
İmtahan qiymətləri normalıdr(6.12%)
İmtahan qiymətləri aşağıdır(0%)
Qiymətlər ləğv edilməli, imtahanlar pulsuz olmalıdır(71.4%)
İmtahan qiymətləri azaldılmalıdır(4.08%)
İmtahan qiymətləri artırılmalıdır(8.16%)