Artıq Novruz bayramına sayılı günlər qalır. Baharın gəlişindən xəbər verən bu bayram ərəfəsində bazarlara üz tutanların sayında artım olur. Hamı istəyir ki, bayramda süfrəsini daha zəngin etsin. Əlbəttə ki, maddi imkan yol verdiyi həddə qədər.
Bəs bazarlarda qiymətlər ciblərə uyğundurmu? Modern.az-ın əməkdaşı paytaxtın ən məşhur bazarlarından olan “8-ci km bazarı”na baş çəkib.
Bazarda canlanma müşahidə olunsa da, hamı şikayətçi idi. Alan da, satan da...
15 ildir bazarda satıcı işləyən Teyyub Verdiyev qiymətlərin o qədər də yüksək olmadığını dedi:
“Mart ayı gələndən alverdə nisbətən artım müşhidə olunur. Əvvəlki aylarda bazara hamı tez-tez gəlmir. İnid əksinədir. Amma hamı hər şeyi daha ucuz almaq istəyir. Bəs düşünmürlər ki, biz də əziyyətlə pul qazanırıq? Burda istirahət etmədən, isti-soyuq demədən ailəmizi dolandırmaq işləyirik. Müstərilər gəlirlər, meyvələri özləri seçmək istəyirlər, elə olanda da birini əzirlər, biri əllərindən düşür, başqa müştəri də onu almır”.
Digər satıcı Elman Əliyev isə müşəri azlığından gileyləndi:
“Piştaxtaya müştəri yaxınlaşanda sevinirik. Onlar da qiyməti soruşurlar, ciblərinə uyğun olmadığını biləndən sonra uzaqlaşırlar. Meyvə-tərəvəzi əvvəl hansı qiymətə satırdıqsa, yenə də həmin qiymətə satırıq. Çox az miqdarda artım var. Bu da normaldı, hər şeyin qiyməti qalxır, meyv-tərəvəzin qiyməti necə stabil qala bilər? Mart bayram ayı olduğu üçün biz də istəyirik ki, pul qazanaq, özümüz də bazarlıq edək. Amma günün sonunda baxırıq ki, heç bir nəticə yoxdur”.
Bazar alıcı qismində gələn Gövhər Məmmədovanın sözlərinə görə, burada qiymət marketlərdən daha bahadır.
“Əvvəl daha sərfəli qiymətə alış-veriş etmək üçün bazara üz tuturduq. Bura gəlmədən əvvəl marketdə qiymətlərə baxmışam. Marketlərdə mallar buradakılardan daha ucuzdur. Satıcılar bilir ki, bayramdı, hamı nəsə alacaq, ona görə də qiymətləri baha deyirlər. Qiymətlərdən heç də razı deyiləm. Metro girişlərinin yanında yarmarkalar açılıb, orada qiymət bazardan fərqlənmir. Qazanan hər zaman satıcılar olur”.
Növbəti müsahibimiz olan aatıcı Murad Əliyev deyir ki, Azərbaycan əhalisi aldanmağı sanki xoşlayır:
“Biz burada ucuz və keyfiyyətli məhsullar satırıq. Amma onlar marketlərdəki yalançı qiymətlərə aldanırlar. Marketdə malı bir qiymətə qoyurlar, kassada isə başqa bir qiymət olur. Mən çərəz satıram, qiymətlər də o qədər baha deyil. Amma əhalidə çərəzləri almağa pul yoxdur. Qiymətlər son vaxtlar 50 qəpik -1 manat arası yuxarı qalxıb. Çünki burada elə məhsullar var ki, biz onu xaricdən alırıq. Məcburuq ki, üstünə pul qoyaq ki, yerhaqqı və bir tikə çörəkpulumuzu qazanaq”.
Qəssab Fərman Musayev də alıcı qıtlığından şikayətləndi:
“Alıcılıq qabiliyyəti çox aşağıdır. Daimi gələn müştərilərimiz var idi, ay ərzində ən azı 6 kiloqram ət alırdılar, indi 3 kilo ilə kifayətlənirlər. Mən mal ətini 11, quzu ətini isə 12 manata satıram. Bu qədər əziyyətin müqabilində isə mənə qəpik-quruş qalır. O da heç mənim gördüyüm işin əziyyətinə belə dəyməz. Amma neyləmək olar, çörəyimizin xətrinə buna da məcburuq”.
Elmira adlı daha bir müştəri də bahalıqdan narazı idi:
“Bazara böyük bir siyahı ilə gəlmişdik, amma qiymətləri görəndən sonra siyahıda ixtisarlar etdik, meyvələri azaltdıq, bəzilərin ümumiyyətlə sıradan çıxardıq. Bazara hər dəfə gələndə qiymətləri daha da artan görürük. Hər şeyə qənaət edirik ki, bir təhər yaşayaq. Bazarlıq təkcə ərzaqla bitmir. Evdə tək yoldaşım işləyir. Onun da aldığı maaş 700 manatdır. Bu pulla bir ailə necə yaşasın?.. Əvvəllər ayda 5-6 kq ət alardıq. İndi 2-3 kilonu güclə alırıq. Bazardakı satıcıları da qınamıram. Onlar da aldıqlarının üzərinə pul qoymalıdılar ki, dolana bilsinlər. Onlar da bu soyuqda burda dururlar ki, evlərinə bir tikə çörək aparsınlar, amma qiymət qalxıb, hamı sadəcə qiymətləri soruşur. Qiymət baha olunca da, mənim kimi kor-peşman geri dönürlər”.
Başqa bir alıcı Rövşən Musayev dedi ki, tək bazarda deyil, hər yerdə qiymətlər od tutub yanır.
“İki uşağım var, bütün valideynlər kimi mən də onlara hər şeyin yaxşısını vermək üçün çalışıram. Uşaqla bazara gəlməyə üzüm utanır, nəsə istəyəndə ala bilmirik. Uşaqların sağlamlığı üçün keyfiyyətli qidalardan istifadə vacibdir. Amma qiymətlər o qədər yüksəkdir ki, heç nədən normasında ala bilmirik. İşığı və qazı da qənaətlə istifadə edirik ki, limiti keçməyək. Yeni ilin gəlişinə çox az vaxt qalıb, amma heç kimdə bayram təəssüratı qalmayıb. Bazara hər dəfə gələndə qiymət artımı ilə rastlaşırıq. Əvvəl satıcılar qiymətdə endirim edirdilər, amma indi heç o da yoxdu, satıcı dediyi qiymətdən aşağı düşmür”.
Modern.az-ın əməkdaşı bazardakı malların qiymətlərini dəqiqləşdirib. Onlarla siz də tanış olun:
Səməni 1-15 manat
Tərəvəz
Pomidor 2 manat 30 qəpik – 3 manat
Xiyar 2 manat 30 qəpik – 3 manat
Soğan 60 qəpik
Kələm 25 qəpik
Turp 1 manat
Kartof 70 qəpik – 1 manat 20 qəpik
Turşular 1-10 manat
Göyərti 1—20 qəpik
Göbələk 3,5- 5 mana
Badımcan 1 manat 60 qəpik
Meyvələr
Alma 50 qəpik - 2.50 manat
Armud 2.50 - 3.50 manat
Nar 2-4 manat
Limon 20-50 qəpik
Portağal 1.20-2 manat
Kivi 2-2.50 manat
Heyva 1.50 -3 manat
Narıngi 2-3manat
Banan 2 manat – 2 manat 50 qəpik
Üzüm 3 manatdan başlayır
Ananas 5 manatdan başlayır
Kök 50 qəpik
Ət və süd məhsulları
Quzu əti 12 man
Mal əti 11manat
Hinduşka 13 manat
Toyuq kq 3,5-5 manat
Pendir 3.50-5 manat
Qatıq - 1 manat
Balıqlar
Kütüm 14-15 manat
Naxçıvan sazanı 8 manat
Kifal 11 manat
Sazan 6.50 manat
Sudak 3 manat
Belamur 8 manat
Quru meyvələr və çərəz
Qoz (qabıqlı) 4 manat, ləpə -16-18 manat
Fındıq (qabıqlı) 4 manat, ləpə 15 20 manat
Badam (qabıqlı) - 8 manat, ləpə 20 manat
Kişmiş 7-18 manat
Şabalıd 8-10 manat
İnnab 5-10 manat
İydə 7 manat
Düyü (uzun) 2 manat
Şəki düyüsü 3 manat
Tamaşa 3 manat
Sultan düyü 3 manat
Şahənşah 3 manat
Lərgə 3,5 manat
Noxud 3,5 manat
Qaragöz lobya 4 manat
Lobya 4 manat
Maş 4 manaat
Meyvə qurusu 8 manat
Qaysı 9 manat
Xurma 3 manat
