Texnologiya inkişaf etdikcə, yollardakı qayda pozuntularını da aşkarlamaq asanlaşır. Bunun üçün bir çox texniki vasitə var. Bu sahədə 2015-ci ildə ölkəmizə gətirilən yol patrul avtomobillərində olan “İ-patrul” sistemi xüsusilə seçilir. Bu “hərəkət edən radar” istənilən yerdə durub qayda pozuntularını aşkarlaya bilər. Amma iddialara görə “İ-patrul” texniki vasitəsi Standartlaşma, Metrologiya və Patent üzrə Dövlət Komitəsindən lisenziya almayıb. Bu iddialar nə qədər doğrudur?
Məsələ ilə bağlı Modern.az-a danışan Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovniki Kamran Əliyev deyib ki, dövlət tərəfindən alınmış xüsusi texnikanın lisenziyası olmaya bilməz.
“Patrul avtomobillərində mövcud olan “İ-patrul” sistemi hər il Standartlaşdırma, Metrologiya və Patent üzrə Dövlət Komitəsində müvafiq standartlardan keçir. “İ-patrul” sisteminin standartdan keçdiyi tarix və növbəti yoxlamadan keçəcəyi tarix komitənin tərtib etdiyi protokolda öz əksini tapır. Əgər kiminsə onunla bağlı bir şübhəsi, narazılığı varsa, müraciət edə bilər, onunla bağlı biz ətraflı məlumat verərik. Amma hər bir şəxs arxayın olsun ki, onlar dövlət səviyyəsində alınmış xüsusi texniki vasitələrdir. “İ-patrul” sistemi təkcə sürət həddini aşanları qeydə alımır, bir çox funksiyaları var. O cihazların istifadəsi qanunvericilikdədə nəzərdə tutulub. Həmin cihazlar avtomatik rejimdə çalışır, onun ölçməsində insan faktoru yoxdur. Kimsə düşünməsin ki, polis əməkdaşı patrul avtomobilinin içərisində oturub istədiyi avtomobili radara salır. Əgər “İ-patrul”un görünüş sahəsində hər-hansı bir avtomobil yol hərəkəti qaydalarını pozursa, o halda həmin avtomobil qeydə alınır və Baş Dövlət Yol Polisi İdarisinin Mərkəzi İnformasiya sisteminə göndərir, nəticədə real vaxt rejimində həmin şəxs barədə inzibati xəta haqqında elektron protokol tərtib edilir.
K.Əliyevin sözlərinə görə, yol patrul avtomobili istənilən yerdə dayanıb qayda pozuntularını aşkarlaya bilər.
“Yol patrul avtomobilləri hətta hərəkətdə olan zaman belə «İ-patrul»lar qarşıdan gələn, onunla eyni istiqamətdə gedən müəyyən olunmuş sürət həddini aşan nəqliyyat vasitələrinin sürət həddini müəyyən edə bilir və onların sürücüləri haqqında elektron protokol tərtib edir. Amma müəyyən ərazilər var ki, təhlükəlidir. Məsələn, yaşayış məntəqələrində, xüsusilə də rayonlararası yolların üzərində yerləşən yaşayış mənqələrinin bəzilərində sürət həddi 60 km/saat müəyyən olunur, sürücülər o sürət həddinə riayət etsinlər deyə, həmin ərazilərdə nizamlanmayan piyada keçidi olduğundan təhlükəsizliyin təmin olunması məqsədi ilə patrul avtomobillərini saxlayırıq ki, ən azından sürücülər patrul avtomobilini görəndə sürət həddini aşağı salsın. Bu da bir çox yol qəzalarının, xüsusilə də piyada vurma hadisələrinin qarşısını alır”.
