"2018-ci ilin 1-ci rübünün iqtisadi yekunları göstərdi ki, Azərbaycan iqtisadiyyatı sürətli iqtisadi inkişaf dövrünə qədəm qoyub".

Bunu Modern.az-a açıqlamasında Milli Məclisin İqtisadiyyat, sənaye və sahibkarlıq komitəsinin üzvü Tahir Mirkişili növbədənkənar prezident seçkilərindən sonra gözlənilən iqtisadi dəyişikliklərlə bağlı danışarkən deyib:

“Bütövlükdə iqtisadiyyatın 2.3%, qeyri-neft sektorunun 3%, qeyri-neft sənayesinin 10% artması, iqtisadiyyata 3.5 mlrd dollar investiya qoyulması onu deməyə əsas verir ki, ölkə iqtisadiyyatı gözlənildiyi kimi iqtisadi islahatlardan təsirlənərək geniş spektrli və davamlı artım mərhələsindədir. Bu ilin ən böyük hadisəsi prezident seçkiləri idi. Seçkilər artıq başa çatdı və Azərbaycan xalqı inkişafa, güclü liderə və parlaq gələcəyə səs verdi. Yaranmış bu müəyyənlik və gələcəyə yüksək inam iqtisadiyyata da öz müsbət təsirini göstərəcək. Bunu Nobel mükafatı alımış "Davranış iqtisadiyyatı" nəzəriyyəsi də sübut edir”.

Deputat deyib ki, strateji valyuta ehtiyatlarının durmadan artması ölkəni iqtisadi təlatümlərdən qorumaq üçün daha əlverişli şərait yaratmaqdadır:

“Regionlarda yeni müəssisələrin açlıması planları bu il ərzində xeyli yeni iş yerlərini yaradılmasına səbəb olacaq. Xarici investiyaların artımı ölkəyə müasir texnologiyaların axınına şərait yaradacaq. 2018-ci ilin dövlət büdcəsi xərclərinin 2017-ci ilə nisbətən çox olması cari ildə bütün sahərələrdə artımın olacağını deməyə əsas verir. Qazlaşma, içməli su təminatı səviyyəsinin artırılması, yeni məktəblərin və xəstəxanaların tikilməsi ilə bağlı dövlət başçısının verdiyi ardıcıl sərəncamlar əhalinin həyat səviyyəsini daha da yaxşılaşdıracaq. Ümumilikdə, dinamik artım tempi Azəraycanı daha da gücləndirəcək, istehsal və ixracı artıracaq və ölkə vətəndaşlarının həyat tərzində müsbət dəyişikliklərə səbəb olacaq.

İqtisadi islahatlar davamli bir prossesə çevrilib. Məsələn, kənd təsərrüfatı sahəsində emal sənayesi müəsssilərinin yaradılmasının təşviq edilməsi artan kənd təsərrüfatı məhsularının emal edilərək yeni dəyərlə ixrac olunmasına şərait yaradacaq”.

T.Mirkişilinin sözlərinə görə, beynəlxalq nəqliyyat dəhlizlərinin Azərbaycandan keçən hissəsində iqtisadi aktiviyi artırmaq üçün daha əlverişli infrastrukturun yaradılması, əlavə dəyər yarada bilən müəssisələrin tikintisi də əsas istiqamətlərdəndir.