Fövqəladə hallar naziri, general-polkovnik Kəmaləddin Heydərov və nazirliyin digər rəhbər şəxsləri vəziyyətlə yerində tanış olmaq üçün Zaqatala rayonunda səfərdədir.
Bu barədə Fövqəladə Hallar Nazirliyindən (FHN) Modern.az-a verilən məlumatda bildirilib.
Respublika Seysmoloji Xidmət Mərkəzinin baş direktoru Qurban Yetirmişli səhər saatlarında helikopterlə Zaqatalaya uçduqlarını bildirib:
“Əməkdaşlarımız əraziyə baxış keçirir. Daha sonra ətraflı məlumat açıqlayacağıq”.
Azərbaycan Milli Elmlər Akademiyası nəzdində Respublika Seysmoloji Xidmət Mərkəzindən daxil olmuş məlumata əsasən, iyunun 5-də yerli vaxtla saat 22:40 dəqiqədə Zaqatala rayonu ərazisində 16 km dərinlikdə 5.5 maqnituda zəlzələ qeydə alınıb.
Zəlzələ episentrdə 6 bal, ətraf rayonlarda 5-3 bala qədər hiss olunub.
İlkin məlumatlara əsasən, dağıntılar yoxdur. Bəzi köhnə tikililərdə çatlar yaranıb. Bir nəfər hadisənin şokundan keçirdiyi həyacandan infarkt olub və dünyasını dəyişib.