Gürcüstan prezidenti Mixail Saakaşvili Rusiyalı ekspertləri casus adlandırdı. Modern.az xəbər verir ki, bu barədə Gürcüstan dövlət başçısının mətbuat katibi Manana Mancqaladze mətbuata bugünkü açıqlamasında bildirib.
Gürcü tərəfi Tiflis beynəlxalq hava limanında Rusiya Dövlət Arxivinin direktoru Sergey Mironenko və Moskva Beynəlxalq Münasibətlər İnstitutunun Qafqaş Araşdırmalar Mərkəzinin baş elmi işçisi Nikolay Silayevə ölkəyə giriş üçün viza verməkdən imtina edib.
Prezident Saakaşvili əmin olduğunu bildirib ki, Gürcüstan ərazisinə buraxılmayan rusiyalı ekspertlər Rusiya xüsusi xidmət orqanları ilə əməkdaşlıq edir. Mətbuat katibi qeyd edib ki, prezident yalnız iki kateqoriyadan olan şəxslərin ölkə ərazisində olmasını alqışlamır. Bunlar işğalçı qoşunlar və Rusiya təhlükəsizlik xidmətinin gödərdiyi casuslardır. Mancqaladzenin sözlərinə görə, gürcü tərəfin əldə etdiyi informasiylara görə, ölkə ərazisinə buraxılmayan rus ekspertləri Rusiya xüsusi xidməti ilə fəal əməkdaşlıq edir və Gürcüstan ərazilərinin işğalını dəstəkləyirlər. Bununla belə, prezident Saakaşvili ölkəsinə rusiyalı turistlərin, biznesmenlərin, incəsənət xadimlərinin, idmançıların və sıravi şəxslərin gəlişini alqışlayır.
