AzEdu.az-ın təşkil etdiyi “Bu günün məktəblisi, sabahın əsgəri”adlı  rəsm müsabiqəsi yekunlaşıb. Yarışmanın qalibi Tovuz rayon Qovlar şəhər İnteqrasiya təlimli İnternat tipli gimnaziya orta məktəbin VIII sinif şagirdi Əli Əmirov olub. Digər yerlərdə isə eyni məktəbin VII sinif Müşfiq Əsgərov,  Dilman Süleymanov adına tam orta məktəbin IX sinif şagirdi Abdullayeva Ləman, Abşeron rayonu Mehdiabad qəsəbəsi 1 saylı orta məktəbin VI sinif şagirdi Erturan İsmayıl və Xətai rayonu 27 saylı məktəbin VI sinif şagirdi İskəndərov  Vəzirxan eyni balla qərarlaşıb. 

Müsabiqədə münsif kimi iştirak edən rəssam Soltan Soltanlı göndərilən işlərin qənaətbəxş olmadığını bildirib:

 “Bəlkə vaxt az olduğuna görədir. Müsabiqə ümumi yox, rəsmlə məşğul olan uşaqlar arasında keçirilsəydi, daha yaxşı nəticə verərdi.  Bu cür istedadlı  uşaqlar müxtəlif yarışlarda iştirak edirlər. Göndərilən işlər arasında bir o  qədər də gərgin mübarizə yox idi. Ən az yarım il, 4-5 ay vaxt verilməli idi. Yəni oturub düşünsünlər, işləsinlər”.

Digər münsif, jurnalist Seymur Verdizadə göndərilən rəsmləri, ümumiyyətlə, müsabiqəninin mahiyyətini  müsbət qiymətləndirib. O, vurğulayıb ki, iştirakçılar arasında ən çox təqdir etdiyicəhət, onların  rəngarəng mövzulara müraciət etmələri olub:

“Demək olar ki, təkrarçılığa, şablon mövzulara rast gəlmədim. Şagirdlərin çəkdikləri rəsm əsərləri ilə tanış olanda, onların Azərbaycanın yaxın tarixi ilə bağlı kifayət qədər məlumatlı olduqları qənaətinə gəldim. Sevindirici haldır ki, yeniyetmə və gənclərimiz Azərbaycanın dövlət atributlarını yaxşı tanıyır, onları sevir, hörmət edirlər”.

Seymur bəy rəsmlərdə ən çox bəyəndiyi cəhətin müəlliflərin qələbə ovqatına köklənməsi olduğunu deyib:

“Birinci Qarabağ Müharibəsindəki məğlubiyyət onlarda pessimist ovqat yarada bilməyib.Onlar qələbəyə inanırlar.Bu gün fırçaya sarılanların, sabah silaha sarılacağına heç bir şübhə yoxdur. Rəsmləri nəzərdən keçirərkən gəldiyim qənaət belə oldu.

Parlament Jurnalistlər Birliyinin sədri, münsif  Elşad Eyvazlı müsabiqənin mahiyyətini müsbət qiymətləndirib və onun ictimaiyyətə ötürdüyü mesajın əhəmiyyətindən danışıb:

 “Göndərilən rəsm işlərinin keyfiyyətinin necəliyindən asılı olmayaraq, məktəblilərin bu mövzuya toxunması, öz düşüncə və hisslərini rənglərin dili ilə əks etdirmələri çox müsbət haldır. Bu gün orta məktəbdə oxuyan şagird, həmin rəsmdə özünü sabahın əsgəri kimi görür. Gənc “rəssam” eşitdiyi, televiziyadan gördüyü, oxuduğu qəhrəmanlıq əhvalatlarında özünü də diktə etməyə çalışır.

Ona görə də, müsabiqəyə göndərilən rəsm işlərində daha çox düşüncəyə, peşəkarlıq meyarlarına (bu heç tələb də olunmurdu) deyil, emosionnalığa varıblar. Onların duyğu və həyacanlarının mərkəzi obyekti isə məlumdur – Vətən, Bayraq, Azərbaycan!!!”