Gürcüstan Azərbaycanın şimal-qərb qonşusu və Cənubi Qafqaz regionunda ən etibarlı tərəfdaşıdır. Bakı və Tbilisi arasında həm siyasi, həm iqtisadi, həm də iqtisadi kontekstdə konstruktiv dialoq qurulub.
Bu dialoq Bakı-Tbilisi-Qars dəmir yolu xəttinin, Bakı-Tbilisi-Ceyhan neft xəttinin və Bakı-Tbilisi-Ərzurum qaz xəttinin çəkilişi ilə bütün mənalarda keyfiyyətcə yeni səviyyəyə qalxıb.
Ermənistan həm Azərbaycan, həm də Gürcüstan üçün təhlükə mənbəyidir
Münasibətlərin mexanizmi elə qurulub ki, həm Gürcüstan, həm də Azərbayncanın hazırki və gələcək xarici kursu ikitərəfli münasibətlərin daha da inkişaf etdirilməsi üzərində köklənib. Parael olaraq, hər iki ölkənin separatizm xəstəiliyindən əziyyət çəkməsi, müstəqilliyinin ilk illərində təcavüzə uğraması da münasibətləri yaxınlaşdıran amillərdən sayılır. Təəssüflə qeyd edilməlidir ki, həm Azərbaycan, həm də Gürcüstan üçün Ermənistan təhlükə mənbəyidir. Fərq odur ki, Qarabağda açıq görünən Ermənistan Abxaziyada hələlik pərdə arxasında oynayır. Bütün bunları isə şübhəsiz ki, Azərbaycan və Gürcüstan rəhbərliyi bilir və çıxış yolu kimi birliyə üstünlük verir.
Bu fonda Gürcüstanda yaşayan 500 mindən çox azərbaycanlının mövculduğu, fəaliyyəti Bakı-Tbilisi münasibətlərində əsas yerlərdən birini tutur. Gürcüstanın çoxmillətli və multikultural cəmiyyətində rəngarəgliyə önəmli töhfə olan Borçalı və Tbilisi azərbaycanlıları daim vətəndaşı olduqları ölkənin milli maraqlarından çıxış etməklə yanaşı, soydaşları olduqları Azərbaycan Respublikasına da loyallıqları ilə seçilirlər.
Təəssüf ki, bütün sahələrdə olduğu kimi, Gürcüstan-Azərbaycan münasibətlərində, Gürcüstandakı Azərbaycan icmasına və onun diasporal təşkilatlanmasına qarşı ermənilər tərəfindən gizli və açıq təxribatlar həyata keçirilməkdə davam edir.
Uzun illərdir ki, Ermənistan hakimiyyəti və onun Gürcüstandakı erməni agentləri hər vəchlə Bakı və Tbilisi arasında gərginlik yaratmağa, uydurma, saxta məlumatlarla gürcü millətçilərini qızışdırmağa cəhd göstərir.
“Qara piar” kampaniyasının əsas oyunçuları
Bu “qara piar” kampaniyasının əsas oyunçularını tanımaqda böyük fayda var. Gürcüstanda antiazərbaycan isteriyası yaratmağa çalışanlar arasında ilk növbədə Vaaqn Çaxalyanın adını çəkmək olar. 2005-ci ildə "Vaih Cavaxk” təşkilatını yaradan Çaxalyan Gürcüstandakı erməni məktəblərində erməni dili fəninin saatlarının azaldılması bəhanəsi ilə Axalkalaki şəhərində bir sıra aksiyalar təşkil etmişdi.
Məhz Çaxalyan 2005-ci ilin martında Cavaxetiya regionunda yerləşən Rusiya hərbi bazalarının çıxarılmasına qarşı çıxış etmişdi.
Radikallaşan Çaxalyan Mixail Saakaşvili hakimiyyəti və Gürcüstanın təhlükəsizliyi üçün ciddi təhlükə törədirdi. Təsadüfi deyil ki, bu erməni millətçisi 2008-ci il iyulun 20-də gürcü polisi tərəfindən həbs olunmuşdu. Evində döyüş sursatları tapılan Çaxalyan yalnız 2013-cü ilin yanvarında amnistiya nəticəsində azadlığa çıxmışdı. Bununla belə, o, separatçı ritorikasından imtina etməyək təhlükəli fəaliyyətini davam etdirir.
Ermənistanda fəaliyyət göstərən marginal siyasi partiya – “Əriklər ölkəsi”nin lideri Arpine Ovannisyanın Cavaxetiya bölgəsinə səfəri zamanı yerli erməniləri ayağa qalxmağa səsləməsi, onları öz hüquqlarını qorumağa çağırması da Tbilisi ilə Yerevan arasında gərginlik doğurmuşdu.
2018-ci ilin yanvarın 31-də Postancyan tərəfdarları ilə Gürcüstana daxil olmaq istəyən zaman gürcü sərhədçiləri tərəfindən ölkəyə buraxılmamışdı. Ölkənin milli təhlükəsizliyinə təhdid olduğu üçün Serj Sarkisyanın başçılıq etdiyi “Respublika” partiyasının üzvü, əslən Cavaxetiyadan olan separatçı deputat Şirak Torosyan da analoji qadağa ilə qarşılaşmışdı.
Gürcüstanda Azərbaycan maraqlarına qarşı fəal olan şəxslər arasında “Çoxmillətli Gürcüstan” Vətəndaş Hərəkatının lideri və keçmiş parlament üzvü Arnold Stepanyanın da adını çəkmək olar. Şöhrətpərəst siyasətçi liberal fon verdiyi təşkilatının və Yerevandan aldığı təlimatlar əsasında Gürcüstanda müxtəlif səpkili tədbirlər, dəyirmi masalar təşkil etməklə gözdən pərdə asmağa, Gürcüstandakı fəal azərbaycanlı gəncləri əməkdaşlığa cəlb etməyə çalışır.
Səfirin antiAzərbaycan siyasəti
Bundan başqa, erməni kilsəsinin Gürcüstan Yeparxiyasının rəhbəri Vazgen Mirzaxanyan da Gürcüstanda Azərbaycanın artan nüfuzunu azaltmağa səy göstərən şəxslərdəndir. Bu əslində, təəccüblü deyil. Erməni kilsəsinin həmişə xarici ölkələrdə Yerevanın iradəsini, türk düşmənçilyini yaydığını dəfələrlə xatırlamaq olar. Yeparxiya Cavaxetiya və Tbilisidə yerləşən kilsələrinin nəzdində əsasən gənclərin təmsil olunduğu dərnəklər yaradaraq 24 aprel günü “erməni soyqırımı” aksiyaları təşkil edir, Tbilisidə Türkiyə səfirliyi önündə aksiyalar keçirir.
AntiAzərbaycan siyasətinin aparılmasında Ermənistanın Gürcüstandakı səfiri Ruben Sadoyanın da adı çəkilməlidir. Sadoyan 2017-ci il oktyabrın 31-də Sarkisyanın imzası ilə səfir göndərilib. Maraqlıdır ki, rəsmi Yerevan ilk olaraq bu posta politoloq Sergey Minasyanı təyin etmək istəyirdi. Lakin bütün diplomatik etiket qaydalarının ziddinə olaraq, Ermənistan hakimiyyəti Gürcüstanla onun namizədliyini müzakirə etmədən mətbuata bu barədə xəbər sızdırmışdı.
Gürcüstan prezidentinin keçmiş aparat rəhbəri Petre Mamradze bunu Ermənistan hakimiyyətinin təxribatı adlandırmışdı. Diplomatik qalmaqaldan sonra əslən Axalkalikdən olan və Tbilsiinin ünvanına zamanında yersiz ittihamlar səsləndirən Minasyan Rumıniyaya səfir göndərilmişdi.
Ermənistanın Gürcüstanda azərbaycanlılara qarşı cəbhə açmaq cəhdi
Hazrki situasiyada Tbilisi və Yerevan arasında gərginliyin olduğu, ermənilərin Azərbaycan dövlətini və Borçalıdakı azərbaycanlıları bu konfliktdə tərəf olmağa çalışdıqları aydın sezilir. Amma bu cəhdlərin hamısının iflasa uğrayacağını və Gürcüstanda azərbaycanlıların ictimai həyatdakı rolu və cəmiyyətə inteqrasiyasının daha da sürətlənəcəyini əminliklə demək olar.
Bu məsələdən isə Ermənistan ciddi narahatdır. Ermənistan bütün gücünü işə salaraq Gürcüstanda Azərbaycana, azərbaycanlılara qarşı müxtəlif istiqamətlərdə cəbhə açıb.
Diqqət edin, bu il iyun ayının 13-də Azərbaycanın Diasporla İş üzrə Dövlət Komitəsinin təşkil etdiyi nümayəndə heyəti Gürcüstana səfər edir. Rəsmi və ictimaiyyət nümayəndələri ilə görüşlər keçirilir.
Az keçməmiş Ermənistanın narahatçılığı üzə çıxır.
Ermənistanın Gürcüstandakı səfiri iyunun 27-dən başlayaraq Marneulidə Diaspor Komitəsinin keçirdiyi formatda görüşlər təşkil edir və guya problemlərlə maraqlanır.
Hətta Marneuli merinin funksiyasını icra edən Zaur Tabatadzeni də səfir öz kampaniyasına qatır.
Ermənistan Azərbaycanın Diaspor Komitəsi rəhbərliyinin bölgəyə səfərindən sonra Marneuli barədə narahat olub. Görünən odur ki, onlar həm ermənilər, həm də gürcülərin yanında psixoloji üstünlük qazanmaq istəyirlər.
Ermənistanın Gürcüstandakı səfiri keçirdiyi görüşlərdə açıq şəkildə bildirir ki, Azərbaycanın region ilə bağlı daha ciddi planları var. O, bunu Diasporla İş üzrə Dövlət Komitəsi rəhbərliyinin səfəri ilə əlaqələndirir. Eyni zamanda ciddi narahatlıqların olduğunu da gizlətmir.
Hiss olunur ki, Ermənistan Azərbaycan-Gürcüstan münasibətlərindən əndişədədir. Azərbaycanın inkişafı, ətraf və uzaq ölkələrlə əməkdaşlığı düşmən ölkə üçün kabusa çevrilib.
Diasporla İş üzrə Dövlət Komitəsinin Gürcüstanda apardığı işlər Ermənistanı narahat edir
Qeyd edildiyi kimi, bir müddət öncə Diasporla İş üzrə Dövlət Komitəsi Gürcüstanda yüksək səviyyədə görüşlər keçirdi. Yeni rəhbərliyin səfəri, həm rəsmi, həm də qeyri-rəsmi səviyyədə görüşləri çox önəmli oldu. Gürcüstanda yaşayan azərbaycanlılarla çox isti münasibət saxlanıldı və məhsuldar görüşlər keçirildi. Bu səfər nəinki rəsmi, siyasi tərəfdən, eyni zamanda, sadə vətəndaşlar tərəfindən də sevinclə qarşılandı.
Gürcüstan parlamentində təmsil olunan azərbaycanlı deputat Ruslan Hacıyev bu məsələni belə şərh edib: “Ümumiyyətlə, ermənilərin hərəkətləri ciddi qəbul olunmur. Bədnam qonşularımızın o cür qıcıq yaradan davranışlarına fikir vermirik. Təbii ki, bu cür hallar olacaq. Kimin nə düşünməsindən asılı olmayaraq, Gürcüstan-Azərbaycan münasibətləri çox yaxşıdır. İki ölkə arasında dost münasibətlər mövcuddur. Həmin görüşlərdə Gürcüstandakı azərbaycanlılara Gürcüstan dövlətinə daha sıx bağlı olmaq tövsiyə olundu. Görünür, ermənilər bunun əksini gözləyirmiş. Ona görə də belə addımlar atırlar.
Gürcüstanda yaşayan sıravi insanlar bu görüşü yüksək qiymətləndirirlər. İnanırıq ki, gələcəkdə Diaspor Komitəsinin yeni rəhbərinin atdığı addımlar bütün dünyada yaşayan azərbaycanlıları sevindirdiyi kimi, bizi də sevindirəcək. Çox istərdik ki, komitənin bu cür aktiv fəaliyyəti davamlı olsun”.
