“Hazırda Məryəm xanımın cənazəsini dəfn etmək üçün yola salırıq. Siyəzən onun ata yurdudur. Orada dəfn olunacaq”.

Bunu Modern.az-a açıqlamasında Müsavat Partiyasının başqan müavini Razim Əmiraslanlı “İstiqlalçı deputat” Məryəm Həsənovanın  dəfni barədə danışarkən deyib.

Onun sözlərinə görə, Məryəm xanımın xəstəliyi son vaxtlarda ağırlaşmışdı.

“Son vaxtlarda Bakıda, bacısıgildə qalırdı. Ürək-damar xəstəliyindən əziyyət çəkirdi.  Ailəsi, övladları olmadığından baxan kimsəsi yox idi”.

Müsavat  Partiyasının başqan müavini istiqlalçı deputatın dəfninə gələnlərdən də söz açıb.

“Təəssüf ki, dövlət adamlarından kimsə gözə dəymir. Sabah Təzə Pir məscidində 3 mərasimi keçiriləcək. Bəlkə, o zaman kimlərsə dəfndə iştirak edə”.

Uzun illər Siyəzəndə müəllimə, orta məktəb direktoru vəzifəsində çalışan Məryəm Həsənova milli-azadlıq hərəkatının iştirakçılarından idi. O, 1990-cı ildə keçirilən parlament seçkilərində AXC-dən deputat seçilmiş.

M.Həsənova dünən vəfat edib. Bu gün Təzəpir məscidində mərhumla vida mərasimi keçirilib.