Tramp administrasiyasının Türkiyəyə qarşı sanksiyalarının iqtisadi baxımdan heç bir anlamı yoxdur. Vaşinqton bu sanksiyalarla sadəcə yaxınlaşmaqda olan böyük fəlakətin siqnalını verir.

Modern.az Axar.az-a istinadən xəbər verir ki, bu iddia ilə “Die Velt”də məqalədə dərc edilib. Məqalədə hər iki ölkənin NATO üzvü olmasına rəğmən, ABŞ-ın yaranan ixtilafı daha da gərginləşdirdiyi bildirilib:

“Prezident Ərdoğan güzəştlərə getməsə və əlavə sanksiyalar qüvvəyə minsə, bunun nəticələri daha dəhşətli olacaq. Bu proses dövlətin iflasına qədər gedə bilər.

İnvestorlar yeni sanksiyaların gələcəyindən qorxurlar. Ona görə ki, hər iki tərəf güzəştə getməyə hazır kimi dayanmır. Türkiyə keçən il Avropa İnkişaf Bankından 1,8 milyard dollarlıq kredit götürdü və bununla buradan ən çox borc alan ölkə oldu. Türkiyənin beynəlxalq maliyyə quruluşlarından borc almasının qarşısının alınmasına dair sanksiya paketi artıq ABŞ Senatına təqdim edilib. Əgər Senat bunu qəbul etsə, Türkiyəyə çox ağır zərbə olacaq”.

Məqalədə Türkiyədən xarici investorların qaçışı məsələsinə də toxunulub: “İnflyasiyadan sonra gəlirindən məhrum olan xarici sərmayə Türkiyədən qaçmağa başlayıb. Dünyada Türkiyə qədər xarici sərmayədən asılı olan başqa ölkə yoxdur. Ona görə ki, ölkə ixrac etdiyindən daha çox idxal edir.

Türkiyənin bu ən zəif, ən müdafiəsiz nöqtəsindən ABŞ rəhbərliyi qəsdən açıq şəkildə istifadə edir. Əgər Senatdakı sanksiyalar qəbul edilsə, bu, ilk növbədə ölkəyə xarici investisiya axınını hədəf alacaq. Bu axın dayansa, təkcə lirə dəyər itirməz, həm də ödənişlərin balansı böhranı riski artmış olar. O zaman vəziyyət iflaslara və ödənişlərin edilməməsi nöqtəsinə gəlib çıxar. Dövlətlə bərabər banklar da turbulent zonaya daxil olar, insanlar topladıqlarını itirmiş olarlar”.