Azərbaycanda daha bir siyasi təşkilat qurultaya hazırlaşır. Belə ki, Ümid Partiyası sentyabrın 8-də qurultay keçirmək fikrindədir.
Bu barədə Ümid Partiyasının sədri İqbal Ağazadə Modern.az saytına açıqlama verib.
“Qurultayla bağlı hazırda partiyada gərgin işlər gedir. Həm qurultayın materialları, həm nümayəndəliklər, həm də konfrans keçirməmiş rayon şöbələrinin hazırlıq işləri davam edir. Çalışacağıq ki, sentyabrın 8-də qurultayımız baş tutsun. Artıq nümayəndələrin böyük əksəriyyəti seçilib”.
Partiya sədri qeyd edib ki, qurultaya hazırlıq üzrə təşkilat komitəsi qurultayın keçirilməsi üçün müxtəlif məkanlar üzərində çalışır:
“Çünki 450-500 nəfər qurultay nümayəndəsidir. Hesab edirəm, qurultay üçün böyük bir sahə lazımdır ki, adamları yerləşdirə bilək. Biz son qurultayımızı açıq havada keçirmişdik. Qurultayda sədr seçkisi, hesabat xarakterli çıxışlar olacaq. Mərkəzi Nəzarət Təftiş Komitəsi, Ali Məclisin sərbəst üzvləri və digər seçki strukturları seçiləcək. Lakin hələ ki sədrliyə namizədlər yoxdur. Qurultayda bu məsələ açıqdır. Elə bir norma yoxdur ki, onu əvvəlcədən müəyyənləşdirəsən, namizədliyini verəsən. Yəni namizəd olmaq istəyənlər qurultayda olacaq. Amma təbliğat məsələsi açıqdır. Qurultaya seçilmiş üzvlərin siyahısı mütəmadi olaraq partiya qərargahında çap olunur”.
İqbal Ağazadə “digər partiyalarla funksional əməkdaşlıq etmək haqqında düşüncəniz varmı?” sualını belə cavablandırıb:
“Hələlik funksional əməkdaşlıq və ya bloklaşma barədə ciddi bir fikir yoxdur. Çünki qarşıda hər hansı seçkilərin keçirilməsi gözlənilmir. Belə olan halda adətən müxalifət partiyaları bir-birindən gen gəzirlər”.
Qeyd edək ki, bu il Müsavat Partiyası, Müasir Müsavat Partiyası və Klassik Xalq Cəbhəsi Partiyası da qurultay keçirmək fikrindədir.